Eng ang hniak nge kan hnutchhiah dawn le?



NAUPAN zual deuh lai khan u te khân, “I theihnghilh ka hria,” an han ti a, ngaih tha lo zetin, “Eng?” kan han ti he haw a. “I hniak,” an han ti liam puat a. A awmze hre chiang lo zetin kan dang der hin a nih kha!

Middle sikul kan kal laia kan zirtirtu pakhat chu kan pawl la tura a lo luh veleh khan, “Thawk leh mit khap chauh awih,” a ti hin a. Che zeuh emaw kha chu min vaw fawk zel mai kha a ni a, tun thleng hian eng subject nge min zirtir tih leh eng nge a zirtirna
atang khan ka thiam sawi tur ka hre hauh lo zu nia!

Sikul kal rual kan la nih lai khan pawisa khâwl tur tuakin rora kan chhu thin a. Zing sikul kal hmain lung lian deuh leh lian vak lo te kan zawng khawm a, chawhnu bânah, zanriah ei hmain kan chhu leh hin.

Khatih lai khan tin khat man chu siki (pawisa sawmhnih panga) a ni a, kan rora chhut khâwl chu kan veng pa officer hmasa pakhat hnenah kan hralh hin. Ka u Tluangtea khan tawlailirin a nawr a, kan ûm a, pawisa kan neih dawn avangin kan hlim hin hle. Mahse, kan lawmna tifamkim lo thintu pakhat a awm a, chu chu kan hralhna pa, hausa kan tih êm êm khan min lo dawn ziah kha a ni a, keini naupang khan kan hnial ngam thin si lo. um khat chu Rs.3.25 manah khan .25 kha min pe tel duh lo va, in 13 tlin tura kan hahzia kha a hre lo nge naupang kan nih avangin min ngai pawimawh lo ni ang aw tih kha ka rilruah a awm reng hin. Tun thleng hian an in zâwn ka pelh apiangin Rs.3.25 kha ka hrechhuak hin (Keimaha a nghawng tâk erawh chu khatiang hun tawng tawh ka nih avang khan naupang thil zuar ka dawrin ka dawn ngai lo).


Ka pa kha kohhran leh khawtlanga inhmang tak a nih avang khan kan unau, a tê lam ho kha chu komiti kohna sem leh chanchinbu semin sikul bânah kan chhuak nasa hle. Kan pian leh murna Chanmari Veng kha a zau hle a, tuna Chanmari, Chanmari West, Chanmari West ‘N’ leh Aizawl Venglai tih zawng zawng hi a huamin in pawh a la inhlat viau hlawm a. Lalpa Grep Huan leh Kristian Tlangau kan semin a man kan khawn bâkah Thlaraubo Zawng thawhlawm te kan khawn bawk hin. Heng hun lai hian pawisa khawn harsa, kal nawn ngei ngei ngai leh vawi khatnaa min pe mai hin te kha kan hre rân a, ka u Kimi nen hian chûng ina kal chu kan inchuh/inhnawn nasa thei hle a, an in leh an hming nen lam hian pe nghâl hin leh khawn nawn ngei ngei ngai kha rilruin a vawng reng hin. A khawntu kan naupan deuh avanga min namnul an ni em ka hre lo nâin, tun hnu hian keima pek tur ang chi pawisa khawn a nihin ka awm lo emaw, rokhawlh tak zet ka nei emaw a nih loh chuan pek nghal ngei ka duh hin.

MA kan zir zawh hnu, KP vela kan inhman chhoh lai khan kan veng nu pakhat chuan min hmuh apiang deuhthaw hian, “Pasal nei tawh rawh, i senior lutuk dawn,” min ti chamchi a. A fanu te pasal neiha an kum ka chhût hian khatih laia kam chhe tleuhna
atana min hman kha ka hrechhuak lo thei lo!

Mi nunah hian eng ang hniak nge kan hnutchhiah le? Eng ang hian nge miin min hriat reng ang? Mi tam tak chuan mi hmuha hat tum ringawt hi kan dam chhan a ni lo kan ti mai thei a, a dikna chen pawh a awm âwm e. Amaherawhchu, he khawvelah hian tumah dam hlen tur kan awm lo va, a dam rei tur leh tisaa kan awm loh hnu pawha la awm tur chu kan ‘hniak’ hi a ni.

Mizote hi kan thih hnua infaka inchawimawi chîng kan ni a. Kan thih niah chuan kan chanchina a ṭha leh a mawi lai chauhvin sawi a hlawh ang a, kan chhungte bulah pawh kan hatna lai chauh sawi a ni ngei ang. Amaherawhchu, mi rilru chhungril kan luah rengna tur chu anmahnia kan ‘hniak’ hnutchhiah tho tho kha a ni lo thei lo.

Kan ngaihdan a nih loh avanga mi dang thiltih deusawh leh na deuh taka khin let hian kan khin te aiin keimahni min nghawng na zawk ti ila a sual âwm lo asin. Tu emaw han khei deuh tâk te, han hliam deuh sak te hi châk mah ila keimahni lam bawk hi a tuartu kan ni fo va, chutiang kan tih avanga kan ‘hniak’ hnutchhiah erawh a bâl deuh nge nge zel chu a lo ni.

Hun khirh tak kan hmachhawn mekah hian ‘inlungrualna hniak’ te, ‘thuawihna hniak’ te, ‘tawrhchhelna hniak’ te, ‘mi dang lainatna hniak’ te hnutchhiah ila. Mihring, tungchhova piangte hi mi dang nena cheng ho tura duan kan nih miau avang hian ‘mahni’ chauh inngaihtuah thei kan ni si lo va. Mi dangte nen inrem taka cheng ho tura a ul dan anga mahni insiamremin mi dangte hriat reng tlak ‘hniak’ hnutchhiah turin theihtawp chhuah zel ang u.

A bik takin naupang, thil hrethiam rual an nih chhoh laia kan hniak hnutchhiah hian an nunah thu a sawi rin bik em avangin upa zawk te hian kan kephah hi fai taka silin hniak felfai tak kalsan turin tang sauh sauh ila.

Tuna naupangte hi nakina kan ram hruaitu an la nih dawn avangin rilru puthmang dik tak neia an lo puitlin chhoh theih nan tuna puitling ni mek te hi mawhphurtu kan ni si a.

=============
16 May 2021

[He thuziak 'Eng ang hniak nge kan hnutchhiah dawn le?' hi Dikteii Hnamte lehkhabu ziah 'Par Har' (Eng ang hniak nge kan hnutchhiah dawn le?) tih atanga a ziaktu remtihnaa lakchhuah a ni, 'Par Har' Lehkhabu hi lehkhabu dawr hrang hrangah cheng 300-in lei tur a awm e. FB lama ziaktu be duh tan a hmingah hian hmeh kauh mai tur a ni.]



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post