'PUM’ Mizoram Innovation Fair 2022, Aizawl ITI-ah Dy. CM-in hawng

byAdmin — 0
Aizawl | Nov 10, 2022:  ‘PUM’ Mizoram Innovation Fair 2022 chu Aizawl ITI hmunah Deputy Chief Minister Pu Tawnluia’n nimin khan a hawng.


 Pu Tawnluia chuan thalaite thiam thil tihpuna eizawnna tlinga siam chu tunlai khawvelah a pawimawh em em a, hemi kawnga hmalatu LESDE Department pawh sawrkarin a tuaihnum chho zel a ni, a ti. Zirna tluang pangngai chu a inrelfelin a inremfel thlup tawh a, zirchhuak an tam a, degree sang pui pui nei pawh tam tak an awm tawh a, amaherawhchu, eizawnna hna in a daih seng si lo, a ti a. Miin a thiam thil hmanga ei a zawn theihna tur kawng zawnpui hi thil pawimawh leh tul a lo ni lehzual ta a, degree sang tak nei kher lo pawha eizawnna hlawk tak neih theihna kawng a nih avangin a tangkaiin a pawimawh ta tawlh tawlh a ni, a ti. Pu Tawnluia chuan Sawrkar hmalakna SEDP hnuaiah kuthnathawktute khaichhuahna leh intodelhna tur ruahman a ni a, Skill Training hi SEDP hlawhtlinna tura hmanraw pawimawh a ni, a ti a. LESDE hian tunhma aia awmze nei leh mumal zawkin hma a la a, World Education Summit ah te hial lawmman hial a dawng thei tiin Department a thawktute zawng zawng a lawmpui thu a sawi bawk. Mahni kutkawih hmanga kut themthiam ten an thil siamchhuah pholanna hun ‘PUM’ tih hming an puttir chu a inhmeh hle tiin Deputy Chief Minister Pu Tawnluia chuan he huna tel zawng zawngte duhsakna a hlan a ni.


 LESDE Minister Pu Lalchhandama Ralte chuan tun dinhmunah Mizoramah ITI pathum - Aizawl, Lunglei leh Siahaah te a awm mek a, hmun pali dang - Champhai, Serchhip, Kolasib leh Mamit ah te din leh tum niin ruahmanna a kal mek, a ti a, Mamitah hian building sak zawh tawh niin session tharah tan hman tum a ni, a ti. Minister chuan ram hmasawn apiangah skill development an ngai pawimawh a, Prime Minister ngei pawhin ngai pawimawhin skill development hmang tangkaia ram tihhausak a tum, a ti a. National Education Policy 2020 pawhin skill development chu a dah lian hle a, India ram leh khawvel ram dangte pawhin an ngaih pawimawh skill development hi Mizoram Sawrkar pawhin ngai pawimawhin hma a la mek a ni, a ti. PUM 2022 a tel zawng zawngte a lawmpui thu sawiin Pu Lalchhandama Ralte chuan an talent tuaihnum zel turin duhsakna  a hlan a, hetiang lama tui mite tan LESDE Department a inhawng em em a ni, a ti bawk.


 ‘PUM’ Mizoram Innovation Fair hi ITI-a zir mekte, zir chhuak tawhte leh kut themthiamna lama tui leh thiamthil neite tana buatsaih niin, an thil siamchhuahte chu he hunah hian phochhuah a ni a. Inelna a nih bakah an thil siam te mipui tan lei theiha zawrhchhuah a ni.

Ni thum awh tur PUM-2022, Innovation Competition & Exhibition Fair-ah hian inelna hi thuang hnih - Engineering leh Non-Engineering Group-ah then a ni a.  Engineering ah hian mi 25 telin Non-engineering ah 39, a vaiin 64 an tel. Skill and Entrepreneurship Award sem a ni dawn bawk a, hei hi District tin atangin District Screening Committee ten thlang chhuakin State level Screening Committee in a lo endik leh dawn a ni.

 Hawnna inkhawma thusawitu dang LESDE Secretary Pu Lalramsanga Sailo chuan PUM nih phung leh thiltum a sawifiah a. ITI chungchang pawh sawilangin All India Trade Test, kum kalta a neih zawh takah Aizawl ITI chu parukna a ni a ti a ni.

Pic:



























(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post