National Conference of PwD Icons for Accessible Elections hmasa ber nei

Aizawl | Nov 5, 2022: Nimin ni 4.11.2022 (Zirtawpni) chawhnu khan Election Commission of India buatsaihin Rang Bhavan, New Delhi-ah 'National Conference of Persons with Disabilities (PwD) Icons for Accessible Elections' hmasa ber hman a ni a. He hun hi Chief Election Commissioner Pu Rajiv Kumar leh Election Commissioner Pu Anup Chandra Pandey te kaihhruaina hnuaiah neih a ni.


Thusawiin CEC Pu Rajiv Kumar chuan Election Commission of India chuan mitinte ban phak leh tel ve theihna kawng engkimah nih an tum thu a sawi a. ECI-in pianphunga rualbanlote ban phak inthlanpui buatsaih a nih nana hma a lak hrang hrangte sawiin, heng bakah hian huapzo zawka inthlan kalpui a nih theih nan conference neih mek atangin rawtnate chu an ngaihtuah zui dawn tih a sawi bawk. Department of Persons with Disabilities te nena thawk hovin ECI chuan rualbanlo voter-te zawng chhuak zel turin hma an lak chhoh zel thu a sawi.

He huna thusawitu dang Election Commissioner Pu Anup Chandra Pandey chuan hetiang hun hi kan inthlante mitin banphak leh huapzo zawk a lo nih zel na atana rilru senhona leh ngaihdan inhriattawnna hun tha a nih thu a sawi a. ECI hmathlir chu rualbanlote huapzo leh an tan tel ve awlsamna te, an theihna te vantlangin an hriatsak mai bakah intluktlang taka vantlang nunah an tel ve theihna chu a ni a ti a. Inthlan huapzo leh mitin banphak huaihawt chu Election Commission of India duhdan leh thuthlung nghet a ni a ti bawk.


DEPwD Secretary, Pu Rajesh Agarwal chuan kum engemaw zat chhunga ECI-in inthlan huapzo, ban phak leh thleng phak buatsaih tura hmalakna a neih hrang hrang te a sawi a. Padma Shree Dr Niru Kumar, ECI PwD National Icon pawhin ECI-in rualbanlo te samkhaina leh awlsamna thlen kawnga hma a lakna chu fakawm a tih thu a sawi bawk.

Commission hotute leh State tina PwD Icon-te chuan hmaichhana inkawmhona hun an hmang a, Delhi, Kerala, Haryana, Chhattisgarh, Goa, Uttar Pradesh, Karnataka, Mizoram, Chandigarh, Rajasthan, Tamil Nadu leh West Bengal CEO office atangin online hmangin he hun hi an rawn zawm ve bawk. Inkawmhonaah hian PwD Icon-te hian an tawnhriat leh inthlan huapzo zawk buatsaih a nihna atana rawtna hrang hrangte an thlen a. DePwD hotute, All India Radio, ECI leh tlawmngai pawl hruaitute he Conference-ah hian an tel a ni.

CEC Pu Rajiv Kumar leh EC Pu Anup Chandra Pandey-te chuan PwD App 2.0 chu an tlangzarh a. Rualbanlote awlsam lehzualna thlentu atana thuamthar application ah hian inziahluh (registration) bakah inthlanni a vah vel puitu an neih theih nan ruahmanna siam a ni. Application thar hi a landan leh ruangam thar tha zawk mai bakah rualbanlote tana hman nuam zawk ni turin Screen reader, Text to Speech, Visibility enhancements, colour adjustments a thuam thar a ni bawk.

ECI hian inthlan buatsaihtu te training inkaihhruaina - rualbanlo leh kum upa zawk te puala siam chu a tlangzar bawk a ni.

Nimin a neih rampum huap PwD Conference-ah hian Aizawl NIC Studio atangin Jt.CEO Pu David L Pachuau, Asst. CEO Pi Laldinfeli bakah State PwD Icon Asst.Prof. Pu Lalbuatsaiha, J.Thankima College te chu an tel ve a. Hun hmangtu dangte nena sawihonaah Pu Lalbuatsaiha hian thu a sawi ve a ni.


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post