Champhai | Nov 29, 2022: Govt. Ruantlang High School Golden Jubilee (1972-2022) lawmna School tualzawla neih chu vawiin chawhma dar 10 khan Law & Judicial Minister Pu T.J. Lalnuntluanga chuan khuallian niin a hmanpui a, Golden Jubilee lungphun a hawng nghal bawk. Minister tawiawmtu District Bawrhsap Pu James Lalrinchhana, Chairman, District Education Committee ni bawkin Jubilee Souvenir a tlangzarh a, DEO & DPC Champhai District Pu TT Laltanpuia'n CWSN leh Rainwater Harvest siam a hawng bawk.
Khuallian Pu T.J. Lalnuntluanga chuan Govt. Ruantlang High School-in Golden Jubilee hun lawmawm tak a thleng thei chu thinlung taka a lawmpui thu a sawi a. Zirtirtu leh zirlai ni mek leh hun hmasa lama mite zahna chibai bukin Golden Jubilee chuan hlimna leh hmasawn lehzual duhna thlen se a duh thu a sawi a. Sikul hmasawnna leh kalzelna tura thawktute leh khawtlang hruaitute thahnemngaihna fakawm tiin, an thawhrimna zarah zirlai hlawhtling khawtlang, ram leh kohhran tana chhawr tangkai tak tak an awm nual chu chhuanawm a tih thu a sawi a. Zirna chu hmasawnna hrang hrang thlentu leh inghahna anih thu sawiin, mihring puitling ram leh hnam tana chhawrnahawm chher chhuak tura tan la chhunzawm turin thawktute a chah a ni.
Law & Judicial Minister chuan sawi chhunzawmin, lehkhathiamna chu kuthnathawh pumpelhna tur anih loh thu leh hnathawh hreh nei lo leh zahpui lo tura inzirtirna anih zawk thu sawiin, zirna chu hnathawh thiam zawkna tura pawimawh a ni, a ti a. Zalenna hman thiam a pawimawh thu sawiin, rilru leh ngaihtuahna hrisel nei tura nunkawng dik zawh chu kan ram mamawh hmasa a ni, a ti a. Midangte thil tih dik lo leh that lohnaah buai mai lova, dik leh tha ni a hriatah huai taka dinga, rinawm leh taima taka mahni, chhungkua, ram leh hnam dinchhuah theih nana kal mai a finthlak thu a sawi a. Sikul motto 'All Round Development' chu ngun taka ngaihtuah chian leh ataka chhawr tangkai thiam a duhawm hle thu sawiin, zirna leh thiamna tak tak hmangin hmasawnna tluantling leh tlo a siam theih a ni, a ti a. Mipuite chu a eng zawnga khawvel hun inher zel leh hmabak awmte thlir hram hram tur leh, beidawng mai lova tumruhna nena theihtawp chhuah turin a fuih a. Govt. Ruantlang High School hlawhtlin tawhnate chhuanawm tiin an kalzelna turah duhsakna a hlan a ni.
District Bawrhsap Pu James Lalrinchhana, District Education Committee Chairman ni bawk chuan Govt. Ruantlang High School-in din anih atanga kum 50-na hmel a hmu ta leh hmasawnna rahbi thar a nei zel chu lawmawm a tih thu a sawi a. Zirna meichher keng nungtu zirtirtute fakawm a tih thu sawiin, mei mit lova tun hun thleng tura tha leh zung sengtu zawng zawngte chhuanawm a tih thu a sawi a. Zirna in leh hmunhma cheibawl kawngah thawktute leh zirlaite chauh nilo, khawtlang huapa neitu thinlung pua tanrual thiam a pawimawh thu sawiin, District Education Committee hmalaknain zirna tihhmasawn kawngah theihtawp chhuah mek zel anih thu a sawi bawk.
Ramri depa awm sumdawnna hmun pawimawh tak Champhai District-ah zirna tih hmasawn leh inthununna tha nunpui a tul thu pawh sawiin, zirlaite chu zirtirtu leh nu leh pate thu awih fo turin a chah a. Champhai District-ah hmasawnna dangte ngaihpawimawh vek anih rualin zirna, hriselna leh infiamna kawnga hmasawnna ngaihven nasat zual bik a ni, a ti a. Zirlaite chu zuk leh hmuam, ruihhlo leh a kaihhnawih dangte laka inthiar fihlim tura chahin, ruihhlo tawlh, zawrh leh hman khawlohna dolet kawnga tanrualpuiah a sawm nghal bawk a ni.
Golden Jubilee lawmna hun hi Pi Lalhmunsiami Fanai, Headmaster, Govt. Ruantlang High School chuan kaihruaiin kalkhawmte lawmna thu a sawi a. Rev H.Zalianchama'n hunserh a hmang a. He hunah hian Headmaster leh Staff lo thawk tawhte chawimawina leh thawktu boral tawhte sunna hun hman a ni a. Pu TT Laltanpuia, DEO & DPC Champhai District leh Pu Bethlehemtlangchullova, VCP Ruantlang te'n lawmpuina thu an sawi bawk a. Zai leh lamte a hun hlimawm tak hman niin, Pi HT Lalthangliani, Teacher-in lawmthu sawiin hun a khar a ni.
Govt. Ruantlang High School-ah hian tun dinhmunah zirtirtu 9, thawktu dang 2 leh zirlai 107 an awm mek a ni.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: