GOLD MEDALIST | MZU M. Sc Life Sciences Gold Medalist 2022 JH Zorinpuii

MZU M. Sc Life Sciences Gold Medalist 2022 JH Zorinpuii kan belchiang.

Zorin/Rinpui/Zo/Zori a koh thin MZU M. Sc Life Sciences Gold Medalist 2022 JH Zorinpuii hi Vanlalhruaia leh C Lalduhthangi (L) te fanu niin, March 2, 1996 khan a lo piang a. Bungkawn Vengthar, Aizawl-ah chengin, Presbyterian Kohhran-ah an lawi a ni.

Zorin-i te hi unau pakua niin, hmeichhe 8 leh mipa 1 an ni a, amah hi a upa ber a ni.

JH Zorinpuii hi 2020 khan MZU hnuaiah vek hian B.Sc Gold Medalist a lo ni tawh a ni.

JH Zorinpuii'n Explore Mizoram zawhna a chhannate:

📌 Zirna lam:

~ Pawl 10 leh 12 hi St.Paul’s Higher Secondary School atangin 2012 leh 2014 khan ka pass a, B.Sc hi 2020 khan Pachhunga University College ka zo leh a, kuminah M.Sc Life Sciences hi  Pachhunga University College atang vekin ka zo leh a ni.

📌 I lehkha zir dan? 

~ Pathian zarah lehkha zir harsat mi ka ni lova, class a zirtirna rilru pe taka ka ngaihthlak hi chuan ka hrethiam duak ve zel a, chumi chuan 50% lai hi chu thiamna min pe in ka hria. Zan lamah, zanriah kil zawhah hian ka tan deuh mai thin a, chawlh lailawk ka nei zeuh zeuh a, lehkhabu leh online materials bakah youtube te hi ka hmang tangkai em em a ni. Zir rei zawng hi chu a inthlau ve hle a, thiam tur a intuk chin ka nei a, chumi ka thiam kim hma chuan ka zir mai thin. Kan zirlaiah zawhna ka ngah em em thin a, zirtirtute ka rawn nasa thin hle. Lehkha zir hi chuan chhiar liam mai ai hian a ziak a ziak ngei hian, thiam a nghet in ka hria a, ziak chung hian ka zir ber thin. By-heart tawp mai mi ka ni lova, mahse hriatthiam hnua erawh hi chuan mark hmuh that nan ka by- heart ve thin. 

📌 Harsatna i hmachhawn dan?

~ Job-an a lo sawi, “Engkimtitheia hnenah chuan sawi ngei ka duh a, Pathian nena ngaihtuah dun ka chak a ni” a tih ang deuh khan harsatna ka tawhin, a tê emaw a lian emaw, Pathian bak hi thlenna tur tha zawk ka hre lova, tah mai ka awlsam bawk nen, tap chung hian a hnenah ka thlen thin. Bible thu han chhiarte hian rilru hi a thlak danglam a min ti hahdam suai suai thei. Chumi bakah ka thiante leh ka chhungte, min hrethiam a, hun leh tha ka tan a seng hreh miah lo ka nei te hian harsatna hmachhawnna kawngah min pui nasa em em bawk. Harsatna reng reng hi chu a pumpelh kawng dap lova, han hmachhawn tawp mai chi hi niin ka hria a, pumpelh dan zawn ai chuan, hmachawn zir hi a hlawk ta ber mai. 

📌 Gold medalist i nihna (Subject) leh CGPA?

~ M. Sc Life Sciences, CGPA- 9.59

📌 Gold medalist ni tura i beih dan?

~ Gold medalist ni tur hian a hranpa in tumna emaw, a position aim ngawr ngawr na hi ka la nei ngai lova, mahse ka zirlai hi chu thiam ka duh a, pass ringawt hi ka tum ngai lo. Syllabus a awm chin thiam tura beih chuan, Pathian khawngaihna zarah kan nih theih tha ber hi min lo nihtir ve mai a ni. 

📌 Gold medalist ni tura i beihnaah faculty lamin an ṭawiawm/pui ṭha chein i hria em?

~ Faculty lam hian min pui nasa khawp mai. A hmasa ber  a ka sawi duh chu, kan college hian zirlai lut thar te lawmluhna program an neih tum hian zirlai pass chhuak ta ti tha zualte chawimawina hun an hmang a, zirlai sang tam tak hmaah dawhsan a lawman an dawng ka hmuh khan keimahah chona leh phurna min pe nasa em em a, inthlahdah duh miah loin chu chuan min siam a ni. Ka han sawi lan kher chhan chu kan faculty te lamin khatiang program an buatsaih thin khan, zirtirna kawng ringawtah ni lo pawh hian nasa takin ka thinlungah thu a sawi a ni. Tin, zirlai chungchangah zawhna ka ngah em em thin a, chhun leh zanin zawh theihin an awm reng a, ka tan an hlu em em a ni. Laboratory lam enkawltute, research scholar te pawh hi kan zar buai nasa thin hle a, an chungah ka lawm em em bawk a ni.

📌 I zirna atana i chhungte pawimawhna:

~ Lehkha ka zir chhung zawngin, min awl nasa em em a, sum leh pai leh lehkha zirna atana ka thil mamawh zawng zawng min lakkhawmsak bakah bang lova min tawngtaisak tute an nih avangin ka tan an hlu em em a ni.

📌 I zirna atana i ṭhiante pawimawhna:

~ Ka thian tha tak tak te hi ka tan an pawimawh em em a notes/ materials siam leh lak khawm chungchangah kan inpui nasa thin hle. Hminghmer hiala ka sawi lan loh theih loh Pca te, Samuela te hi ka tan an hlu em em a, kawng engkima ka tihbuai leh min pui nasa em em tu  te  an ni.

📌 I duhzawng leh ngainat zawngte:

• Rawng – beige, white, black, brown

• Chawhmeh  - vawksa , bawngsa, thlai hnah leh thlai rah chi hrang hrang, bai leh bawl te ka ngaina em em vek

• Incheina – hun leh hmun a zira hak nuam leh ni chei chuai lo, simple leh basic lam hian ka inchei thin.

• Rimawi – Country music 

• Mizo Ziaktu zingah – Tsa Khupchawng

• Hla- With you by Elevation Worship

• Hla phuahtu – Elevation Worship

• Teacher – Kan department a min zirtirtute zawng zawng

• Leader - Dr APJ Abdul Kalam

📌 Mize ngainat zawng:

~ Nihna ang a lang ngam a nih bakah mi rinawm ni se, timing leh schedule vawng mi, mi khawngaihna ngah tak leh ngilnei tak, uangthuang chiam lo mahse kulhmuk lutuk ni lo leh ran ngaina mi.

📌 Mize ngai nat loh zawng:

~ Mi Tawng hnem, hun vawng dik lo lutuk mi, phunchiar leh mi rinawm lo.

📌 Hobby-

~ Trekking te, zai leh hla ngaihthlak, movie en leh lehkhabu chhiar leh ka uite nen a infiam, thuziak lamah ka tui ve em em bawk.

📌 Relationship status:

~ Unmarried

📌 Kawppui atan duhzawng:

~ Ruih theih thil ti lo, Pathian tih mi, mahni ke a ding, mi rinawm leh lerh lo, mi taima, chhungkaw ngaihsak mi.

Zawhna dang:::

1. A tel lova i awm theih loh:

~ Pathian, chhungte, thiante leh ka ui te.

2. I nun kaihruaitu:

~ Ka nu tawngtaina, Isua leh a zirtirna, ka hmathlir te.

3. Hringnuna i hlauh ber:

~ Hmangaihten min kalsan

4. I tih ngai miah loh tur:

~ Mi phatsan

5. Mizo Tualzal nuna ṭha i tih:

~ Mizote hi khawi hmunah pawh awm ila, unau ang a kan han inthuikhawm tlat thin te, chhiat that a kan inchhawmdawl zel mai te, thenawmnute nen a bai insuah tawn thin leh Pathian ringtu kan nihna in kan khawtlang nun a thunun tlatnate hi, kan sawi cham chi tlawmngaihna, aia upa zah leh a dangte nen hian tha ka ti em em a ni.

6.  Quote i duh ber:

~ "Ka khawngaihna i tan a tawk e; Ka thiltihtheina hi chak lohnaah asin tihfamkimin a awm ni." - 2 Korinth 12:19

7. Mizoram leh Mizo tualzal nuna Mizo hmeichhiate dinhmun:

~ Khawpui lam han thlir hi chuan sumdawnna hmunah a ni emaw, zirna in lamah a ni emaw, pisa kaina hmunah a ni emaw, hmeichhiate hi a tam zawk kan ni a, inchhungkhurah hmeichhia zawk sum la luttu ber an nih chang a tam awm e, chutiang han thlir chuan, "Mipate hian min umpha lo zawk em aw?" han tih theih tur a ni a chutih rual erawh chuan rorelna hmun sangah ram inrelbawlna a ni emaw, kohhran inrelbawlna thilah a ni emaw, a fawng vuantute hi a tam zawkah chuan mipa an la ni thung, kan "population leh contribution" han ngaihtuah chuan hmeichhiate hian kan phu ang tawk dinhmun hi kan la hauh tawk lo hle. 

Tin, thingtlang lamah erawh chuan zirna hi mitin banphak a la nih loh bakah, pasal neih avanga zirna leh eizawnna han tawpsan mai an la tam hle, chu chuan dinhmun tha zawk an hauh theihna turah nasa takin a pawt hniam niin ka hria. Chutih rual chuan, khawpui a dawr nghak a ei rawn zawngte, mi in a a tul tul thawk tur a inhlawhte, mahni intum chawpa zirna sang zawk rawn kaite zingah hian a tam zawk hi hmeichhia an la ni fan. Hei hian hmeichhiaten kan thawh hlawk ve zia a ti lang chungin, social ladder a dinhmun tha zawk min hauhtir phah si lo hi a runthlak ka ti khawp mai. 

8. Hnam hmingṭhat leh hmingchhiat kawngah Hmeichhiate'n mawhphurhna:

~ Mizo hmeichhiate leh mipate  hian mawhphurhna intluk si, inang si lo kan neiin ka hria. Mizo hmeichhiate hian Miss India, Miss North- East tih velah chauh ni lo, zirna lamahte, thiamna lamahte, Mizoram leh India ram aiawha lo penchhuak an tam tawh hle mahse sawi tam an hlawh lo deuh a, taksa mawina avanga kan hmingthanna bakah newspaper hma luah kuau thei tur thil tam tak kan hlawhchhuak nasa tawh hle. 

Chutihrualchuan, Mizo hmeichhiate kan hmingchhiatna tam tak, che mawi lo deuh emaw, mi tam zawk ngaihdan ang lo deuh a lo che kan awmin, kan Mizo mipate bawk hian min kawkin, min diriamna tawngkam an chhakchhuak nasa hle in a lang thin. Mizo mipate hian an hmeichhiate leh a hnam anga Mizote kan hmingthat lehzual nan, duat kan ngaihna lai leh a awm nem zawk kan nihna lai hi min hriatthiampui thar leh se ka ti hle a ni.

9. Hnam ziarang chawinun kawnga Hmeichhiate mawhphurna:

~ Mizo nulain hnam zia râng a chawikân tlatte, nula hmeltha em em a 'Zo' riaute hian a mawi em em a. Mizo nunzia chhuan thar apiang hnena tuh thintu chu kan nu-te hi an ni bawk. Mizo chawhmeh siam dân te thleng hian thiam kan tum theuh a tulin ka hria, hnamzia chu incheinaah ringawt ni lo, nitin a kan ka min fahtu thleng hian a tel vek avang a ni. Kan thenawmte, khawtlang Ieh kohhrana kan nunphungah hmeichhia tih atana mawi bik tam tak a awm a, hei te hi chhungtin in  a in hrilhhriat a tha hle. Chhungtin-ah mawhphurhna kan inhrilh hriat that hian, khawtlangah bul tan that a ngai lovang.

10. Mizote tan 'Fa neih tlem' inzirtir hi a ṭulin i hria em? -

~ He zawhna hi chhungtin in a hran theuhin min han zawt ta se, chhanna inang pek theih a ni dawn lova, mahse a hnam anga kan thlir chuan "fa neih tlem" aia kan au chhuahpui nasat tur thupui a tam hle. Mizote hi kan la thahnem lo hle a sorkar laipui pawhin phalna an pek bik lehkha nei tan lo chuan luh mai theih a ni lo, hnam dangin min chiahpiah hneh lutuk avanga hnam boral thei kan la nih avangin kan chawm zawh tawk tur hi chu nei theuh ila a tha ka ti.

11. Mizo hnam ṭhanmawh bawk nia i hriat?

~ Mi hlawhtling apiangte nun a kan hmuh, "teirei peihna" kan tlachham lutuk hi Mizote than ti ṭhutu lian tak a niin ka hria, a tam lam apiang pan dul dul thin hnam kan nihna hi a la lang deuh a, tla fal ngam khawp a mi huaisen leh tumruh kan la thahnem tawk lo hian a hnam ang a kan thanna tur a dal nasa hle niin ka hria.

 

12. Mizo hnam damna atana  kawng awm nia i hriatte?

~ Sanglianthangan, "Ram leh hnam dinchhuahna bulpui ber chu Krista chanchin tha hril hi a ni" a lo tih kha ka rilru ah a lo lang hmasa ber, hei tluka pawimawh hi kan ram tan chuan sawi tur ka hre meuh lo. Isua zirtirna nen a in mawi mimal nunah, chhungkuaah, kohhranah leh khawtlangah mahni phak tawk theuhin han nunpui tum ila kan ram hi a dam sawng sawngin ka ring.

13. Hnam chhan nana Hmeichhiate ṭangkaina leh mawhphurna?

~ Mizo hmeichhhiate hian thiamna leh theihna tam tak kan nei a, puantah thiam leh ram lama ṭang thei, pisa kai leh inchhung sekrek khawihte, rorëltu leh rawngbawltu tha tak kan ni kawp thei vek a. Kan thiam leh theih a tam em avang hian kan mawhphurhna pawh a sang hle. Hnam pawisawi zawnga Mizo mipa leh hmeichhiate kan chêtna sawi tur a tam lo hle a, chuvang chuan mimal tinin nitin a kan lo chin than tha apiangte hi kan chhawm nun zel chuan kan hnam hi engtikah mah a ral bik ka ring lo. Hmeichhe lu chu mipa a ni a, mipa lu chu Krista a nih ang hian, mipa-te dawh thiam tak a hmeichhiate kan awma, mipa in Krista a lu atana a vawn tlat chuan Mizo hnam hi Pathianin mal a sawm reng ang.

14. Zirna, Khawtlang leh Kohhran hi?

~ Zirna sang zawk leh thiamna bik nei apiang hi khawtlang leh kohhran pawhin kan pûr nasat an ni lo thei lova; thiamna hi mimal tan a ni lova, khawtlang leh kohhran rawngbawl hna kan thawh theihna kawngka zau taka hawngtu a nih avang hian zirna leh kohhran leh khawtlang rawngbawlna hi a kalkawp tlatin ka hria. 

15. Khawtlang, Kohhran leh nangmah:

~ A hmasa a ka lo chhan tawh ang khian, ka thiamna leh theihnate hi tlem tak ni mahse khawtlang leh kohhran tana mi tangkai zawk ka nih theihna atana min puitu a nih ngei ka beisei. 

16. Social Media leh Nangmah:

~ Social media hi khawvel eng min hmuhtirtu lian tak  pakhat a ni a ka hmang  tangkai hle a, nimahsela thil tangkai tam tak bakah rilru la peng thei thil a tam em em bawk avang hian, zirna lama ka inthlurbing duh lai hi chuan ka hmang lo tawp mai thin.

17. Mizoram ṭhalai tam tak tlakchham:

~ Heti zawng hian han chhang dawn ila, Mizoram thalaite hian thiamna (professional level) leh "employment opportunity" kan tlachham em em a ni. Social media han en ila, mahni kutkawih thil zuarte, an secondhand thin an chei that hret hnua man to deuh zawka hralh thinte, ram dang atanga thil chah lutte, mahni ke a din tum mi tam tak ka hmu a, kan tlakchham ber chu sorkar hna chauh ni lo mahni kutkawih a, mahni inchhung atanga ei kan zawn theihna tur rahbi min tuksaktu tur sorkar, thalaite hmakhaw ngai kan mamawh em em in ka hria. Skill development lama min chawisangtu tur leh eizawnna kawng min kawhhmuhtu tur hi kan tlakchham ber niin ka hria.

18. Mizo ṭhalaite hian ngaihsan tur dik an ngaisangin i hria em?

~ Kan mi/ thil ngaihsante hian kan nun a hruai em em thin a, tuna kan Mizo thalaite dinhmun han en hian,  "Ngaihsan tur dik hi kan ngaisang meuh em aw? kan rilru sukthlek hi han kuai her hret ila a tha zawk ang em aw?" han tihna tur a awm ve maithei a ni.

19. Ngaihsan tur dik nia i hriat:

~ Bible zirtirna hi kan ngaihsan tur dik tak niin ka hria. Lehkhabu tha tam tak pawh han keu ila, nunphung, thiamna leh ram inrelbawlna thlengin Bible a inziak ang bawk hi hmuh tur a lo tam em em mai a, a thuruk haichhuak tur khawpa bih peih apiangte hian an ngaisang zel maiin ka hria. 

20. Hlawhtlinna tura pawimawh:

~ Hlawhtlinna chang tur hian kailâwn tam tak kan sawi fo thin taimaknate, tumruhnate,teirei peihna, beidawn lohte, chhel-te a ngaia, a bâk sawi belh tur kan hre theuh awm e. Pathianin lei malsawmna a dah a, kan tuhrah apiang seng tur kan ni;

Ringlotute pawh hian an taimak rah an seng ve tho ang hian. Nimahsela, Ringtute kan vanneihna chu Pathian hmangaihna,

malsawmna, khawngaihna leh duhsakna kan theih leh kan tih bak a min pek belchhah thin hi a ni. Hei hi ringtute tan chuan kan hlawhtlinna thuruk niin ka hria.

21. Hloh i hlauh ber:

~ Khawvelah hian mi beidawng tam takin an sawi thin ni a lang chu, "dam chhan tur ka nei tawh lo" tih hi a ni awm e; ka dam chhan ni a ka hriat- Pathianin ni tura min duan, ka mihringpuite tana bat nei a ka inhriatnate , ka damchhan tia ka lo vuah ve zawng zawngte hian keimahah an hlutna an hloh ka hlau ber.

22. Hnam dang nupui pasal neih hi-

~ Hnam dang nupui pasal neih hi hnam lian lo tan chuan a pawi hle a, hnam dang mi kan society a kan seng lut ve a nih pawhin pawlh dal kan ni a, kan society kan chhuahsanin hnam tan channa a ni. Duhthlanna siam thei vek kan ni a, hnam vawn him duhtu chuan duhthlanna thiam taka a siam ngei ka ring.

23. Nupui pasal inneih hmaa mipat hmeichhiatna hman hi?

~ Nupui pasal inneih hmaa mipat hmeichhiatna hmangtuten a that lohzia an sawi thin leh nupui pasal inneih hnu chauhva mipat hmeichhiatna hmangtuten a thatzia sawi tur an ngah em em  te hian a ti chiang maiin ka hria. Bible in a lo sawi angin, "Inngaihna sual hi bânsan rawh u. Thil sual dang eng pawh miin an tih chuan, an taksa pâwn lam thil a ni a; inngaihna erawh hi chu mahni taksa chunga thil tihsualna a ni." - 1 Korinth 6: 18 (Flee from sexual immorality. All other sins a person commits are outside the body, but whoever sins sexually, sins against their own body.) a lo ti a hei hian a ti lang chiang hle in ka hria.

24. Hlawhtlinna hi?

~ Chan theih tam tak ka la neih ka beisei; Pathian leh ka mihringpuite tana ka tangkai theihna tur hlawhtlinna ka chan ve ngei ka beisei a ni.

I thalaipuite tan fuihna--- 

~ Kan kawng hruaitu tur , kan tlatna hmun tur hi thlan fimkhur kan mamawh in ka hria, " Show me your friends and I will show you your future" tih ziak ang khan.

EXPLOREMIZORAM.COM i hmuh dan:

~ Explore Mizoram hi platform tha tak, Mizote tana ro tling, thu bengvarthlak leh mit ti tlaitu tam tak min chhawpchhuahsaktu a ni a, chumi bakah kei tak ngial pawh ka vei zawngte sawi chhuahna hun min siamsak a, Explore Mizoram chungah ka lawm e.

(He website kal zel theih nan hian fakna lo langte hi i lo hmet ve thin dawn nia.)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

EXPLORE MIZORAM

https://www.exploremizoram.com

email: admin@exploremizoram.com

Telegram channel:

https://t.me/exploremizoramchannel

FB page: https://www.facebook.com/exploremizoramportal

FB Group: https://www.facebook.com/groups/exploremizoram

Twitter: https://twitter.com/exploremizoram

Instagram: https://www.instagram.com/explore.mizoram

Youtube Channel: https://www.youtube.com/channel/UCyNrX06aSZ26HkIB25eo1YQ

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

(Website leh a hnuaia fakna hi lo hmet ve rawh.)