ARGENTINA SQUAD BIHCHIANNA

- K. Remruatfela

​Coaching Staff:

1. Lionel Scaloni (Manager)

 

Argentina khua leh tui dik tak niin amah hi footballer hlui a ni bawk a. FIFA World Cup 2006-ah pawh khan Lionel Messi ten squad-ah an awm ho tawh nghe nghe. Coaching lamah hian experience a la nei tam lo hle a. A bul tanna chu kum 2017 chauh kha la niin Spanish Club Sevilla FC Coaching Staff zingah a tel a. Tin, FIFA World Cup 2018-a Argentina an tlak hlim hlawl khan Coaching Staff zingah lak luh ve nghal a ni a. Ni 3 August, 2018 khan Manager puitling atan lakluh a ni.

 

Kum 3 chuang awrh chauh Argentina team a la enkawl chhung hian sulhnu a nei ropui hman em em a. A enkawl chhunga game 47 khelh tawhah vawi 32 lai hnehna chanpuiin vawi 12 an intumpuite an inhnentawkpui tawh bawk a, chak loh vawi 4 chiah a la neihpui a ni. Tin, Copa America leh Finalissima Trophy a lakpui tawh bawk a. Ram tana a achievement tam tak avang hian nikum khan Best FIFA Football Coach nominee ah a tel phak hial nghe nghe a ni. Amah hi thluak fim leh tactic nei tha tak a ni a, uluk taka game chhut thin mi a ni bawk a. Kuminah pawh hian Argentina team te hi nomawi a chawipui ngei tura beiseina a sang hle.

 

2. Pablo Aimar (Asst. Manager):

 

Argentine Footballer hlui niin ram tan World Cup 2002 leh 2006 pawh a lo inlan tawh a, a ball thiamna leh thathona hi khawvelin kan hriatna a ni. Kum 2017 khan Argentina National Under 17 Coach atan lak luh a ni a. Chumi hnu, FIFA World Cup 2018-a Argentina an tlak hlim hlawl khan Lionel Scaloni rual khan Coaching Staff zingah lak luh ve chhunzawm nghal a ni bawk a. Lionel Scaloni kaihza vektu rinawm, football tawnhriat ngah tawh tak a ni.

 

3. Walter Samuel (Asst. Manager):

 

Ani pawh hi Argentine player hlui tho a ni a. A hunlaia khawvel defender tha berte zinga chhiar tel thin a ni. Ram tan FIFA World Cup 2002 leh 2006 a lo inlan tawh a. Argentina tlar hnung kulh rinawm a ni. Kum 2019 khan UEFA Pro License Course a zo a, hemi kum vek hian Argentina National team Assistant Manager atan lakluh ve nghal a ni. Tlar hnung remphui dan tur kawnga Lionel Scaloni thluak bur ber a ni ngei turah ngai ang.

 

4. Roberto Ayala (Assistant Manager):

 

Argentina ti Argentina tu ber leh an Captain hlui a ni a. Vawiin thlenga Argentina mipuite tan rawn leh ngaihsan a la ni. A chanchin kimchang hi phek hmasa lamah tarlan tawh a nih avangin tarlan nawn a tul tawh lo ah ngai ila. Kum 2019 khan Argentina Coaching Staff-ah lak luh a ni a. Leadership quality nei tha leh Football khawvela tawhriat nei tam tawh a nih avangin kawng engkima Lionel Scaloni innghahna leh thurawn lakna ber tur a ni tih a chiang hle. A puihna hnuaiah hian Argentina hian champion nomawi an chawi ngei ringtu pawh an thahnem hle.

 

PLAYERS

​Goal Keepers:

1. Emiliano Martinez:

Kum 30 mi niin tunlai khawvela goal keeper tha berte zinga mi ni-a ngaih a ni. English Premier Leaque Club hlun tak, Aston Villa keeper rinrawl ber niin penalty a save fuh theih em avangin a invawrhsan phah hle. Kum 2020 – 2021 season khan Aston Villa player tha ber atan thlan a lo ni tawh a. Tin, Copa America 2021 Golden Glove lawmman a lo dawng tawh bawk. Tun World Cup-ah pawh hian Argentine first choice goal keeper ni leh ngei tura ngaih a ni.

 

2. Franco Armani:

 

Kum 36 laia upa a ni tawh a. Nimahsela, a kum upat ngaihtuah chuan ram tana tawhriat erawh a nei tam lo hle. Tunah hian Argentina Club lar tak, River Plate goal keeper rinrawl ber a ni mek a. Kum 2018 World Cup khan Argentina squad-ah a lo tel tawh bawk. Khawvelin goal keeper tha anga a sawi thin ni lo mah se, tunhnaiah club tan a che tha em em a. A form vanglai tak a nih avangin Argentina first choice goal keeper atan pawha iai lo tu an tam phah hle.

 

4. Geronimo Rulli:

Kum 30-a upa niin Spanish La liga club lar, Villareal first choice goalkeeper ni lai mek a ni. Kum 2018 khan ram tan a inlan tan a. Match 3 goal a ven sak tawh. Kum 2020-2021UEFA Europa leaque Squad of Season-ah telh a ni a. Chuta tang ringawt pawh chuan goal keeper tha tak a ni ang tih a rin theih awm e.

Defender:

1. Nahuel Molina Lucero:

 

Kum 24 mi niin Atletico Madrid right back a ni. Atletico-a a khelh hma hian Italian club Udinese ah a khel thin a, an innghahna berte zinga mi a ni thin. Kum 2021 khan ram tan a khel tan chauh a. Nimahsela, Copa America trophy leh Finalissima trophy erawh a chawi ve der tawh. Player theihna ngah tak mah ni se, Argentina tlar hnung khawng vanglai tak a nih avangin a start phak ang em tih erawh hriatthiam a har viau.

 

2. Gonzalo Montiel:

 

Kum 25 mi niin Spanish club tho, Sevilla right back a ni. A larchhuahna tak chu an ram club, River Plate atangin a ni a. River Plate-a a awm lai hian Argentine leaque defender tha berte zinga sawi hial a ni thin. Nimahsela, Sevilla lama a insawn hnuah erawh duh angin khelhna hun a chang tam tawk lo thin hle a. A insiamtha chho zel turah ngai ang. Kum 2019 khan ram tan a in lan ve tan chauh a. Copa America hnuhnung berah khan game 7 atangin game 4 a start a. Kumin World Cup-ah pawh hian Atletico right back Molina nen hmunruak an inchuh ngei a rinawm.

 

3. German Pezella:

Kum 31 laia upa ni tawhin Spanish club Real Betis centre back a ni. Ani pawh hi World Cup experience a la nei bik lo a ni a. Ram tan erawh kum 2017 atang khan in lan tan tawhin vawi 30 lai Argentine jersey a ha tawh. Nimahsela, kumin hi Argentina tlar hnung khawng vanglai tak a nih avangin field chhunga kan hmuh tam erawh a rinawm lem lo!

 

4. Nicolas Otamendi:

 

Kum 34 laia upa ni tawh mah se, khawvela defender khawng berte zinga chhiar tel a la ni pha hial tho. English Club lian Manchester City tan pawha lo khel hrep tawh niin tunah hian Portuguese Club ropui, Benfica tan a khel mek a. An centre back rinrawl le an captain a ni. Ram tan pawh vawi 91 zet inlan tawhin World Cup 2010 leh 2018-ah te pawh Argentina jersey a lo ha tawh a. Chutiang taka tawhriat ngah tawh a nih avang chuan Argentina tlar hnung innghahna ber ni turin, a elpui Lisandro Martinez hi a hahchawlhtir thei ngei tura ngaih a ni.

 

5. Facundo Axel Medina:

 

Kum 23 mi lek la niin Ligue 1 club Lens tana khel a ni a. Left-back ah leh centre back ah pawh chhawr theih ve ve a ni. Kum naupangte mah ni se, club rinrawl a ni pha der tawh a. Season 2 bak a la khelh loh laiin game 63 lai a khel der tawh. Hei hian rin ngam a hlawh zia a tarlang chiah hle awm e. Ram tan erawh game 2 chiah a la khel a, tawnhriat a la nei tam tawk lo hle.

 

6. Nehuen Perez:

Kum 22 leka upa niin Serie A club Udinese centre back a ni. A kum a la naupan vangin sulhnu a la nei tam lo hle a. Ram tan phei chuan game khat mah a la khel lo! Chuvangin, tun World Cup-ah pawh khelmual chhugah a hmel kan hmuh a rinawm chiah lem lo.

7. Christian Romero:

 

Tunlai khawvela defender tha thlang chhuak dawn ta ila, Christian Romero hi a langsang berte zinga mi a ni hial awm e. Tunah hian kum 24 chauha upa a la ni a, hma lam hun eng tak nei a ni. English Premier Leaque-a club vung chho mek, Tottenham Hotspur kulhpui nghet a ni a. Tin, a club hmasa Atalanta tana a khelh lai pawhin Serie A Best Defender lawmman dawng thei tawh ngat a ni. Tlar hnung pawp fo thin an sawi, Argentina team te hi tun hnaiah eng vangin nge an phui sawt em em kan tih chuan, a hnawhpuitu Chrisian Romero a awm tak vang a ni ti hial pawh ni ila kan sawi sual awm lo ve.

 

8. Lisandro Martinez:

 

Centre back meuha ding tur chuan a pa te mah mah e ti-a an sawi thin, Lisandro Martinez hi kum 24 leka upa a ni a. Selna tam tak karah pawh khawvela club hlun berte zinga Manchester United tana centre back rinrawl ni thei ngat a ni a. Hei hian a pa tet vanga ngaihhniam ngawt chi a ni lo tih a tilang chiang! Tun hnaia Manchester United te an lo insiamthat chhohna kawnga ki pawimawh berte zinga sawi theih a ni a, ground ball-ah a hlauhawmzia leh a chet ran zia chu Premier leaque en thinte chuan kan hre theuh awm e. Kum 2019 khan ram tan a in lan tan a, kumin World Cup-ah hian tawnhriat ngah Otamendi nen dingchangtu zawk nih an inchuh ngei rin a ni.

 

 

9. Nicolas Tagliafico:

Kum 30-a upa ni tawhin Ligue 1 club Lyon tana khel mek a ni a. A position chu left back niin a lar chhuahna ber club chu Dutch Club, Ajax atangin a ni. Kum 2017 khan ram tan a in lan tan a. World Cup 2018 pawh khan a lo inlan tawh a. Players tawhriat ngah tak tawh a nih avangin dressing room thlenga tangkai thei turte zinga mi a ni. Kuminah hian Marcus Acuna nen vei lam hmun ruak an inchuh ngei a rinawm.

 

10. Marcos Acuna:

 

Ani pawh hi kum 31 laia upa ni tawhin Spanish Club Sevilla left back rinrawl ni mek a ni. Kum 2016 khan ram tan a in lan tan a, Argentina jersey ha hian game 42 lai a lo inlan tawh. Amaherawhchu, tawhriat ngah tak tawh a ni e ti lo chuan World Cup experience hi a la nei bik lova. Kumin World Cup lo awm turah hian tawhriat ngah, Tagliafico nen vei lam hmun ruak an inchuh ngei a rinawm.

 

11. Lucas Martinez Quarta:

Kum 26-a upa niin Serie A club Fiorentina tana khel mek a ni a. A position chu Centre back a ni. Kum 2019 khan ram tan bul a tan a, game 48 a khel tawh. Players tha tak ni mah se, a khelhna position tak hi Argentina hnianghnar kum a ni kher kher a. Chuvang chuan khelmualah a hmel kan hmuh tam hi chu a rinawm lutuk lem lo.

 

Midfielders:

1. Guido Rodriguez:

 

Kum 28 mi niin La liga club Real Betis tana khel mek a ni a. A position chu Defensive midfield a ni. Real Betis tan hian season hnih lek a la khelh chhungin game 87 a khel hman der tawh a. A dam that phawt chuan an thlak ngai meuh lo. Kum 2017 atang khan ram tan a inlan tan a. Amaherawhchu, World Cup experience erawh a thiante dang ang thovin a la nei bik lo.

 

2. Rodrigo De Paul:

Kum 28-a upa niin tunlaia Defensive Midfielder tha ber pawla ngaih a ni. Copa America 2021 khelh taka mimal taka a chet that em avangin Spanish club hlun Atletico Madrid chuan Seria A club Udinese atangin an la a, an inchhir lo khawp ang. Kum 2018 World Cup zawh hnu lawk atang khan ram tan a inlan tan a, game 41 a khel tling der tawh. Kumin ah pawh hian Argentina rinrawl leh innngahna ni tur zinga mi ni-a ngaih a ni.

3. Exequiel Palacios:

 

Kum 24 mi niin Bundesliga club Bayern Leverkusen tana khel mek a ni a. Field chhunga khelh bikna fumfe nei lova, field lai luahlam tawp thin tu a ni. A inkhelh thiamna lam aimaha a hmingthanna chu a nula mi na hi a ni a. Nula te ngaihzawn rawn a hlawh thin hle. Kum 2020 khan ram tan a inlan tan a, game 20 a khel tawh. Kuminah pawh hian field chhungah a hmel kan hmu  thei a nih phawt chuan kum 1998 World Cup-a David Beckham lo lar hluai ang khan lar hluaina chance a nei ve tho mai.

 

4. Alexis Mac Allister:

Tun hnaia Premier league lama che tha em em, Brighton & Hove Albion club tana a kila lung pawimawh tak chu kum 23 mi lek, Alexis Mac Allister hi a ni kan ti thei ang. Kum 2019 khan ram tan a inlan tan a. Game 5 chiah a la khel thung. Kum hmasa lamah te chu ti tehvutin langsar ngai lo mah se, tun season kal lai meka a chet that em avangin mi benkhawn leh enrawn a hlawh der tawh.

 

5. Enzo Fernandez:

 

Kum 21 chauha upa a la ni a. Central Midfielder niin tun season atang khan Primeira Liga club, Benfica tan a khel tan a. Bul a tan tha bawk a niang, August thla khan Primeira Liga ‘Midfielder of the month’ ah an thlang hial mai. A kum a la tam lo bawk nen kumin atang hian ram tana koh a ni ve tan chiah a. Amaherawhchu, a ball a fin theih em avang leh cool taka game control a thiam em avangin mi en rawn a hlawh chho em em a, hmalam hun eng tak nei tura ngaih leh beisei a ni.

 

6. Thiago Almada:

Ani pawh hi kum 21 chauha upa niin Attacking midfielder leh winger ni kawp a ni a. Major League Soccer club, Atlanta United tana khel mek a ni. Ram tan hian a la inlan chiah lova. Nimahsela, playmaker leh winger anga chhawr kawp theih player indaihzai a nih avang hian game boruak zir zela tangkaina thuk tak nei thei tur chi niin a lang.

7. Alejandro Darioz Gomez:

 

Papu Gomez ti-a hriat lar niin kum 34 laia upa a ni tawh a. Ani pawh hi Almada ang thoa position hrang hranga khel kual thei, Forwad/Attacking Midfielder/Winger ni kawp vek a ni. Ram tan kum 2017 khan a inlan tan a. Amaherawhchu, a kum upat tawh ang hu in ram tan erawh sulhnu a la hnutchhiah tam lo hle a, World Cup boruak pawh a la hip pha bik lo! Tunah hian Spanish la liga club, Sevilla tan a khel mek. A club khelhna hmasa, Atalanta tan khan a che tha thin hle a. Kum 2019 – 2020 season phei kha chuan ‘Serie A Best Midfielder of the Season’ atana thlan a lo ni tawh nghe nghe.

 

8. Angel Di Maria:

 

Tun tum Argentina squad zinga Captain Lionel Messi tih lova tawhriat ngah ber a ni a. Tunah hian kum 34 mi ni tawhin Serie A club lalpa an tih mai, Juventus jersey ha mek a ni. A vanglai, kum 2010 chhoa khawvela club lar ber berte – Real Madrid, Manchester United, PSG tana a khelh chhoh thin lai phei chuan khawvela winger/forward tha ber anga ngaitu pawh tam tak a nei hial thin. Kum 2008 khan ram tan a lo inlan tan tawh a. Argentina jersey ha hian game 155 zet khel tawhin goal 31 lai a thun tawh a. FIFA World Cup vawi 3 lai a lo inlan pui tawh nghe nghe bawk. Game level sanga goal pawimawh tak khung thei leh pressure thunun theih mi a nih avangin khelmual pawn leh chhunga Argentina thluak bur ber tur pakhat a ni.

 

 

9. Leandro Parades:

Kum 28-a upa niin defensive midfielder a ni. PSG lama a tal hrep tawh hnuah tun hnai khan a thianpa Di Maria hnung zuiin Juventus tan a khel a. Bul  a tan tha nghal hle. Kum 2017 khan ram tan a in lan tan a. World Cup tawhriat erawh a la nei lo. Tun hnaiah a khelh that chhoh em avangin Argentina FC rinrawl ni tura hming ri ring berte zinga mi a ni.

Forward:

1. Lionel Messi:

 

Argentina Captain hi a chanchin sawi thui ngai lo ve a hrechiangtu vekte kan ni awm e. Kumin hi World Cup a vawi 5 khelhna tur a ni tawh a. Mimal chawimawina sang zual, a dawn theih ang ang dawng kim vek tawh niin a mimal ang phei chuan beisei leh tur chuang pawh nei tawh lova, a chungnung ber, a peak thleng tawh anga ngaih hial a ni bawk a. Chutiang taka khelmual chhunga mi ropui chu a ni. Amaherawhchu, ball boot a  khai hma ngei hian hlenchhuah tur pawimawh em em a la nei a. Chu chu Argentina jersey ha chunga World Cup trophy chawi hi a ni. Kuminah hian a tum hi a hlen thei dawn em i lo thlir ang.

 

2. Nicolas Gonzalez:

 

Kum 24 mi niin Serie A club, Fiorentina forward a ni a. Kum naupang te la ni siin club career-ah goal 41 lai a thun tawh a, a la thun chho zel tura ngaih a ni. Nikum khan ram tan a la inlan tan ve chauh a, nimahsela goal 3 lai a khung leh hman der tawh! Chutiang khawpa talent nei tha chu a ni.

 

3. Angel Correa:

 

Kum 27 mi niin Atletico Madrid forward a ni a, a tul dan azirin wing lamah pawh a tlan thei bawk. Tun hnaiah club tan hian a khel tha chho hle a. Kumin January thla khan La liga player khel tha berah thlan a lo ni tawh bawk. Kum 2015 khan ram tan a in lan tan a. Amaherawhchu, World Cup tawnhriat erawh a la nei bik lova. Kumin hi a tan chona nasa tak tur a ni.

 

4. Lautaro Martinez:

 

Captain Messi tih lova tun World Cup lo awm tura Argentina innghana ber tur pakhat chu kum 25 mi, Inter Milan inghahna Lautaro Martinez hi a ni kan ti thei ang. Tunlai khawvela forward tha berte zinga mi ni-a ngaih a ni a. Nikum lam pawh khan Ballon d`Or nominee a ni pha hial nghe nghe. World Cup 2018 zawh hnu lawk khan ram tan a inlan tan a. Game 40 ah goal 22 a khung der tawh. World Cup qualifying match-a Argentina FC tana goal khung hnem ber pahnih zinga pakhat a ni a. A pakhat zawk chu Lionel Messi bawk hi niin goal 7 ve ve an thun. A dam tha a nih phawt chuan Argentina innghahna ber tur pakhat a ni.

 

5. Paulo Dybala:

 

Kum 29-a upa niin Serie A khelmual chhunga roreltu a ni. A khelh dan leh Messi khelh dan hi a inan em avangin ram tan erawh a inlan tam loh phah hle a. World Cup 2018 ah te pawh khan team zingah tel mah se, game 1 chiah a khel a, a thahrui ngah zia ngaihtuah chuan a uiawm angreng khawp mai. Club tan erawh a che ropui tak zet a. Serie A team of the season ah tum 4 ngawt a tel tawh a, player of the season lawmman hialte pawh a dawng tawh bawk. Lionel Messi awm chhung hi chuan khelhna hun a hi a chan tam a rinawm lova, a mimal tak chuan ka player duh berte zinga mi a ni thung.

 

6. Julian Alvarez:

 

Kum 22 chauha upa niin Manchester City forward a ni. Angel Correa ang thoa forward leh wing lama khel kawp thei a ni a. South American player ni awm takin ball a thiamin a skills a tha em em a. Nakin lawka Argentina forward rinrawl la ni tura beisei a ni. Nikum khan South America Footballer tha bera thlan a ni a. Hemi kum vek hian ram tana koh tan a ni bawk. Kumin World Cup-ah pawh hian hun tawp lama a hmel kan hmuh zeuh zeuh a beiseiawm.

 

7. Joaquin Correa:

 

Kum 28-a upa niin Inter Milan forward a ni a, chumi hma chuan Lazio, Sampdoria, Sevilla club-ah te a lo khel kual nawk tawh. Kum 2017 khan ram tana koh tan a ni a, World Cup tawhriat erawh a la nei bik lo. A hmingthanna ber chu accurate passing a thiamna hi a ni a, hman thiam chuan sang taka invawrh thei tura theihna ngah a ni. Nimahsela, Agentina hian forward an neih that rih em avangin khelmual chhungah a hmel kan hmuh fo erawh a rinawm lem loh.