Ticker

10/recent/ticker-posts

School Education minister-in Darlawn PHC building thar hawng

Aizawl | Nov 25, 2022: School Education Minister Pu Lalchhandama Ralte chuan cheng 1,36,12,690/- senga sak Primary Health Centre, Darlawn building thar chu vawiin khan a hawng.


Hawngtu School Education Minister Pu Lalchhandama Ralte chuan thusawiin covid hripui avangin harsatna hrang hrang karah sum harsatna tawk chung pawh a, mipuite hman tangkai theih tur Primary Health Centre hawn a ni thei chu lawmawm a tih thu a sawi a. Tun hnaiah a Bial chhung khawtinah sorkar duhsakna avangin hriselna lamah hmasawnna tam tak hmuh tur a awm zel a, Sub Centre leh Health Centre te a awm vek tawh thu a sawi bawk. Pu Lalchhandama Ralte chuan hripui avanga hun harsaah pawh Darlawn PHC-a thawktute doctor, nurse, medical staff dangte leh NGO hruaitute thawhhona tha an neih avangin harsatna lian tham a awm lo chu a entawntlak hle a ni a ti bawk. Tihdam hna thawktute chu an hnathawhnaah an tawngkam leh an nunchangte atang ringawt pawhin damloten damna an chang thei a ni tih sawiin, an tawngkam leh an chetziaah fimkhur turin a fuih.


Minister chuan NGO hruaitute chu PHC-a thawktute nen thawhhona tha nei zel tura chahin, sorkar ram humhalhna kawngah pawh nakin hun thlir thiam chunga ngaihtuahna fim hmang thin turin a chah bawk.

Darlawn PHC hawnna inkhawm hi Dr. Lalhlunpuii, SMO, Aizawl-in a kaihruai a, Dr.:Vanlalmuankima, Medical Officer, Darlawn PHC-in lawmthu sawiin hun a khar a ni.

Darlawn Primary Health Centre Building hi NABARD RIDF XXIV sum atanga sak niin ni 6.4.2020 khan sak tan niin ni 13.9.2021 khan sak zawh a ni a, a vaiin cheng 1,36,12,690/- sen ral a ni. PHC Bulidingah hian Ground floor ah Male Ward, Female Ward, Operation Theatre, Labour Room & Induction Room, Casualty, Nursing Station, Pharmacy, Toilet, Waiting room te a awm a; Basement-ah hian Office, OPD, Toilet, Waiting room a awm bawk.







(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments