Aizawl | Nov 24, 2022: Rural Development Minister Pu Lalruatkima, Information & Public Relations changtu ni bawk chuan vawiin khan Mizorama science lama mithiamte leh science chungchanga intawhkhawmna lian ber - Mizoram Science Congress 2022 chu Mizoram Legislative Assembly Annexe Conference Hall ah a hawnna programme khuallian niin a hmanpui. He programme puala Science Exhibition Aizawl City Park a buatsaih pawh hawnna programme a hmanpui bawk a. Pu L. Thangmawia, MLA leh Vice Chairman, Human Resources Development Board pawhin he hun hi khualzahawm niin a telpui a ni.
Minister Pu Lalruatkima chuan science lam thiamnain kawngtin rengin mihring nitin nunah awlsamna leh remchana nasa taka siamsakin mihring nun a kaihruai nasat dan te sawiin Science thiamna avanga thil hmuhchhuah leh siamchhuah hian bu a khuar thuk hle tawh a ni, a ti. Science kaltlanga hmasawnna thlen dante sawi zelin Science thiamna leh hmasawnna hian khawvel boruak a tidanglam zel thu te, sik leh sa a inthlak nasat dante a, mihring duhdan, ngaihtuahna leh beiseina thlengin a tidanglam mek thute a sawi a. Heng thil inthlak zelin harsatna tam tak a rawn thlen hi, Science thiamna hmang tho hian sut kian kan tum tur tiin mithiam kalkhawmte chu chutiang zawnga an ngaihtuahna te seng turin a chah a ni.
Mizoram Science Congress thupui ‘Science & Technology for Sustainable Ecosystem’ hmang zauvin tum bulpui ni a lang chu, Science leh a thiamna hmanga hmanrua ten, mihring te leh a chenpuite tan, tun hun leh hun lo kal zel tur chenfakawm taka siam a nih thu sawi a. A tawi zawngin, “Science thiamna, kan tun hun leh nakin hun atan” tih chu thupui in a kawk tiin a sawi bawk. Science Congress thupui in a zirtir a tum ber chu kan vawiin hun atan Science thiamna hmanga mihring mamawh leh awlsamna siam piah lamah kan thlahte (generation) lo la kal zel turte thlenga mihringin dam khaw chhuahna atana a mamawh ang hnutchhiah leh a ruangam lo din chu a ni a ti a.
Pu Lalruatkima chuan he Congress (khawmpui) atanga kan thil hmuh leh siamchhuah leh zirchhuahte hi kan ram tan tiin a kalte leh a ngaihthlatute pawhin tangkai lehzuala kan hman a thain ka hria a, keini ram hruaitu (Politician) te hi chuan Science & Technology lamah thiamna thui tak kan nei vek lova, hetiang thiamna nei vawiin nia lo kal te hian min finchhuah a, kan ram tana thil tha leh tangkai siamchhuak thei tur hian thurawn pawh min pe thin turin ka chah duh bawk che u a ni. Science thiamna hmang tangkai ram apiang khawvelah ram hausa an ni zel tawh a, chumi hre renga mahni ram tan tiin Pathianin thiamna min pek hi hmang turin vawiin ni hian kalkhawmte ka chah duh che u a ni, a ti.
Pu L. Thangmawia, MLA pawhin thusawiin Mizorama science zirtirna bultanna a la rei loh dan ngaituahin hmasawnna kan nei chak hle nia a hriat thu a sawi a. Mithiam chhuanawm tak tak science discipline hrang hrangah ram pum huap ang pawha hming lang kan nei belh zel hi lawmawm tiin he hunah researchers kalkhawmte chu an zirbinga chu Mizoram mamawh zawnga an kalpui leh an zirchian a pawimawh thu a sawilang bawk.
Hawnna programme ah hian Er. Lalsawmlaiana, Chief Scientific Officer leh Chairman, MSC 2022 chuan palaite lawmin Dr. Lalhriatzuala, Asso. Prof., PUC leh Secretary, MSC 2022 ni bawk chuan report sawina hun a nei a. Thupui chungchang sawi hawnna chu Er. H. Duhkima, Director, Project Management Unit (PMU), PHE in a nei a. Dr. Davy Lalruatliana, Scientific Officer chuan lawmthu sawiin hawnna programme a khar a ni.
Mizoram Science Congress hi kum 2016 atanga khan neih tan niin kum hnih dana zel buatsaih thin a ni a. Kumina Congress thupui atan 'Science & Technology for Sustainable Development' tih chu thlan niin Exhibition hi 'Science and Technology for Management of Water Resources' tih thupui hmangin Aizawl City Park a buatsaih a ni. Hetah hian Science nena inkhaihhnawih Department thenkhatte, mimal innovator khawl siamchhuakte leh zirlai naupang ten exhibit an phochhuak a ni.
Mizoram Science Congress ah hian state chung leh state pawn atangin science discipline hrang hrang scientist leh mithiam 130 chuangin oral leh poster presentation an nei dawn a. Aijal Club ah Technical Session pali kaltlangin presentation te hi buatsaih a ni dawn a, hengah hian India rama institution hmingthang - National Geophysical Institute, Indian Council of Medical Research, IIT Guwahati leh Barkhatullah University atanga lo kal mithiam ten Thuhmaruai sawina Keynote Address te sawiin hun an hawng dawn a ni.
Mizoram Science Congress thawhkhat nan October ni 21,2022 khan Mizoram Children Science Congress buatsaih niin hetah zirlai ti tha 10 te chu nakuma neih tur National Science Congress ah an tel dawn a ni. Mizoram Science Congress hi Mizorama science lam hawi leh hemi chungchanga buaipuitu pawl - MISTIC, MSS, STAM, MAS, MMS, BIOCONE, GSM leh MITSte tangkawp buatsaihin a main sponsor te chu PMU, PHE leh Directorate of Science & Technology an ni a, sponsor dangte chu - Trade Centre, Digital House, Genesis Enterprise leh Mizoram Business Centre te an ni.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: