Mamit | Nov 11, 2022: Vawiin chawhma khan Governor Hari Babu Kambhampati chuan JNV school sak mek chu a hmunah a tlawh a. Chak zawka hna kal mek thawh dan tur contract hna viltute leh District official te a sawipui a ni.
Governor chuan JNV sak hna viltu engineer te leh a sak hna thawktu contractor te hnenah sak zawh thuai a nih theih nan chak taka hma la turin a hrilh a. Furtui tam leh kawngchhia chu in sak hna muan lutuk chhanah puh a fuh lo a, Mizoram sik leh sa hrechiangtute chuan an hnathawh hun chhung leh tanlak hun tur te chiang takin an hre sa vek a ni a ti.
JNV sak hna chak zawka thawh a nih theih nan Mamit Deputy Commissioner Pu Lalnunhlua kaihruaina hnuaiah engineer te leh contractor te inhmukhawmin tanlak ngai lai te sawi a, harsatna awm thei te sutkian dan ngaihtuah ni se tha a tih thu a sawi bawk.
Pu Lalbiakthanga Chhangte , Executive Engineer, Project Division ,MAMCO chuan JNV sakna atana a sum ruahman hmasak chu Rs18.05 cr a nih thu a sawi a. Tunah chuan ennawn tawh niin Rs 29.73 cr ah tihpun a ni a ti a. Tun dinhmunah Rs 21.26 cr an hman tawh thu a sawi.
Governor hian District Hospital, Mamit pawh a tlawh a. Medical Superintendent Dr Lalzuatlianan lo dawngsawngin Mamit Hospital dinhmun tlangpui Governor chu a lo hrilh a. Mamit District Hospital chu Aizawl a hnaih avanga damlo inentir an tam lutuk loh thu sawiin nikum chhung khan mamit district a nau nei zawng zawng 850 zingah Hospital a nei chu 280 an nih thu a sawi. Mamit District Hospital-ah hian Naupang lam enkawltu Doctor an neih loh thu an sawi a. Pediatrician an neih theih nan a tul anga hmalakpui turin Governor chu an ngen nghal bawk a ni.
Governor Hari Babu Kambhampati chuan Doctor indaih lohna awm thin chu pawi a tih thu a sawi a. Specialist Doctor thenkhat sawrkara an luh duh loh avanga Doctor nei lo a an awm ai chuan Mizoram state pawn a mi Doctor te pawh lakluh dan ngaihtuah se, Doctor indaih lohna a chhawk zangkhai a rin thu Medical Superintendent chu a hrilh a ni.
JNV temporary campus pawh Governor hian a tlawh nghal a. Hetah hian zirlai te leh an Principal Pu Kaizalam Tungnung ten an lo dawngsawng a, inkhawm tawi Governor pual hian an lo buatsaih a ni.
Governor chuan JNV a tlawh remchang thei chu lawmawm a tih thu a sawi a. Navodaya school te chu quality education atan an hlu a, an tangkai bawk tih a sawi a. JNV chu India rama school tha zinga an sawi a ni a. Helai hmuna lehkha zir thei sikul naupang te chu an vannei hle a ni a ti.
He inkhawm tawi buatsaihah hian Governor chuan New Education Policy chungchang sawiin New education Policy chu zirlai te tana an mahni hmasawn zelna tura an zirna kawngah inherrem a awlsam zawkna atan siam a ni a ti a. JNV zirlai te chu tawng chi thum Mizo, English leh Hindi a zirna an dawn theih avangin tawng chi khat chauh hmanna sikula lut te ai chuan an hmalam hunah hna zawn thu-ah pawh an ngaihtuahawm lo zawk turah a ngai tih a sawi.
JNV Mamit hi tun dinhmunah temporary campus ah an la awm a, an campus thar sak mek hi nakum June thla vela zo fel tura beisei niin September 2023 ah luah theih tura beisei a ni.
Governor in Mamit District Hospital leh JNV campus a tlawh chhung zawng hian Mamit DC Pu Lalnunhlua leh SP Pi Lalthangpuii Pulamte leh senior officers dang ten an tawiawm a ni.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: