Ticker

10/recent/ticker-posts

Transport Minister-in I&C Centre sakna tur lungphum a phum

Aizawl | Oct 20, 2022: Vawiin khan Transport Minister Pu TJ Lalnuntluanga chuan Hlimena Transport Department ramah Vehicle Inspection and Certification Centre (I&C Centre) sakna tur lungphum a phum. He hunah hian bialtu MLA Prof F.Lalnunmawia pawh a tel a ni.

Transport Minister Pu TJ Lalnuntluanga chuan Transport Department hnuaiah hmasawnna hrang hrang thleng chho zelin chung zingah chuan Mizoram mipuite tana tangkai tur project lian tak Vehicle Inspection and Certification Centre sakna tur bul tan a ni dawn ta chu lawmawm a tih thu a sawi. Hma thar lak hian rilru a tihlimin a ti phur thin a, hmasawnna hna lian tham tak thawk thei tur leh bul tan thei tur hian a phenah thawktu engemawzat, hun leh tha tam tak senga lo bei an awm thin a, chung mite chu an zahawmin an chhuanawm a ni, Minister chuan a ti a. Heng miten theihtawpa an lo thawh zarah, harsatna tam tak paltlangin tun hun hi kan thleng a ni, a ti.


India ram chhunga state upa tawh leh changtlung tawhte um pha turin Mizoramin tan a la a, Transport department bikah phei chuan state changkang zawkte tih dan tun hnaiah kan um pha chho ve thuai thuai thei hi a lawmawm hle a ni, Transport Minister chuan a ti a. Hmasawn zel turin kan ramin a mamawh ber ni a ka hriat chu inhmangaih tlanna leh thawhhona tha a ni, a ti a. Ramin hma a sawn theihna turin mimal leh chhungkaw bil ngawt ni loin a huhoa hma kan sawn tlan a, inhmangaih tak leh inlungrual taka ke pen tlan a ngai a ni tiin department a thawkte chu rilru tha pu a, thawhpui te hmangaiha, an nitin hna thawk thin tur leh chu chuan an hma hun zelah rah tha a chhuah ngei a beisei thu khuallian chuan a sawi a ni.

Prof F.Lalnunmawia pawhin Mizorama a hmasa ber tur I&C Centre a bial chhungah dah a ni chu lawmawm a tih thu sawiin a bial chhung mipui te mai bakah Mizoram mipui tan malsawmna a ni dawn a ni, a ti a. A bial chhung kawng chei that leh tihzauh tur chungchang te, Aizawl by pass road atana ruahmanna siam mek te sawi langin MLA chuan hmasawnna hi inlungrual taka dawnsawn tlan a ngai a, hmalaknaah harsatna awm thei te pawh su kiang zelin thinlung inhawng taka awm turin mipuite a chah a ni.

Lirthei khalhtu leh a chuang te himna hi State Transport Department bakah India sawrkarin a ngai pawimawh hle a. Ram pumah State leh UT tinah I & C Centre hi dah tura ruahmanna siamin vawiina lungphum phum tak pawh hi chumi ruahmanna peng pakhat chu a ni a. He project pumpum atan hian sawrkar laipui chuan nuai 1550 dahin Mizoram sawrkar nen 90:10 a intum sem tur a ni. Khawl leh hmanraw changkang tak taka thuam a nih dawn avangin mihring mit lawng (manual) a motor him leh him lo endik thin chu computer leh khawlin a thlak vek tawh dawn a. Heng endikna khawl in motor test te a fit lo a tih chuan khawlai ah tlan phal an ni dawn tawh lo a. Pollution check na tha tak a nih bakah motor chuanna atana him tawk leh tha tawk a ni em tih enfiahna tha tak a ni dawn a ni. A building sak leh a hmunhma siam hna thawk tur hian Central Institute of Road Transport (CIRT), Pune hnuaiah e-tender tihchhuah niin Vinco Construction te chu thawk tura thlan an ni.

Lungphum phumna puala programme buatsaih hi Transport Department Commissioner & Secretary Pu KT Beicho chuan kaihhruaiin Transport Director Er.R.Lalrammawia’n he project intan dan leh funding hmu thei tura tan an lak dan te a sawifiah a. Vinco Construction CEO in project chungchang sawifiahna hun a hmang bawk a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments