Ticker

10/recent/ticker-posts

School Education Minister-in State Level Children's Science Congress hmanpui

Aizawl | Oct 22, 2022: Nimin, 21st October, 2022 khan School Education Directorate Conference Hall-ah Ni hnih chhung awh 30th State Level Children's Science Congress kharna neih a ni a. School Education Minister Pu Lalchhandama Ralte chu Khuallian a ni.


Kharna inkhawmah thu sawiin Minister chuan Mizoram sorkarin Science zirna tih hmasawn nan țan a la mek a ni, a ti a. Bilingual textbook tihchhuah a ni dawn a, Science leh Mathematics zirlaibu te chu țawng pahnih English leh Mizo țawngin bu khatah siam mek a ni, tiin November thla tawpah tih chhuah hman beisei a nih thu a sawi a. Tun hnaia JEE lo chhuakah Mizo 5 te chu IIT a lut thei turin an inziak tling tih sawiin an zinga pakhat phei chuan 99.17% a score phak a, midangin an tih theih chu Mizoten mahni bu zawl ațangin a tih ve theih tih a tilang chiang a, a lawmawm hle a ni a ti a. MBSE syllabus chu NCERT syllabus te nen in ang reng a ni a, exam dan phung Scheme of Examination pawh siam țhat zel a ni a, zirlaite thiamna tak tak sawrchhuak turin tuai thar zel a ni a ti bawk.

Khualzahawm Er H.Lalsawmliana Chief Scientific Officer pawhin thu sawiin Child Scientist te chu an vanneihzia leh hma lam hun eng tak nei an ni tih a sawi a, phur tak leh taima taka in zir sauh sauh turin a fuih bawk a ni.

Pu V.L.Malsawma State Coordinator Children's Science Congress chuan report a pe a. District tinah District Level Children's Science Congress buatsaih a ni a, chumi hnuah State Level Children's Science Congress chu buatsaih a ni. State level-ah hian District tin aiawh an tel kim a, school 35 ațangin project 37 an entir a, Child Scientist te hian kumina thupui "Understanding Ecosystem for health and well-being" tih behchhanin an thil zir bing an pho lang a ni.

State Level Children's Science Congress-ah hian National Children's Science Congress a tel tur Child Scientist 8 thlan an ni a, Indian Science Congress-a tel tur Child Scientist 2 thlan an ni bawk.

National Children's Science Congress hi Ahmedabad Science City, Gujarat-ah January 27-31, 2023 chhungin neih a ni dawn a. Child scientist tel turte chu-

-ah:
1) Nancy Lalkhawpuimawii, Govt. Saitual High School
2) VB Khochai Zahneichhua, Lorrain English School, Siaha
3) T. Lalremsangi, Tualte High School, Khawzawl District
4) Valeric JH Lalchhanhimi, Govt. Ruantlang High School, Champhai
5) KC Lalpeksangi, Govt. Bethlehem Vengthlang High School, Aizawl
6) Lalrinnungi Ralte, Marian High School, Serchhip

Junior-ah :
7) Lalrinzuali Ralte, Saihnuni Sailo Memorial School, Aizawl
8) Martina Sonarung, Govt. Middle School-II, Mamit te an ni.

Indian Science Congress RTM Nagpur University, Maharastra-ah January ni 3-7, 2023 chhungin neih a ni dawn a, Child Scientist tel tur te chu-
1) PC Lalremsiami, Buhban Secondary School, Saitual
2) Lalnunthara, Govt. Mizo High School, Aizawl te an ni.


State Level Children's Science Congress kharna hunah hian Samagra Shiksha Officer thenkhat te, a buatsaihtu Science Teachers Association Mizoram (STAM) hruaitute, District tin ațanga tel Child Scientist te, Guide teacher te leh Evaluator te an tel a ni.




(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments