Aizawl | Oct 29, 2022: India ramin zalenna a hmuh kum 75-na lawmna kalzel “Azadi Ka Amrit Mahotsav” puala Department of Mizo, Pachhunga University College leh Social Welfare & Tribal Affairs Department, Government of Mizoram tangkawpin an buatsaih ni hnih awh tur “Seminar on Vai Len leh Mizote : Hman pasalthate Hnuhma” (Revisiting Lushai/Chin Expedition : Role of Mizo Freedom Fighters) chu nimin chawhma khan Home Minister Pu Lalchamliana’n a hawng.
Seminar hawnna inkhawm PUC Seminar Hall-a neihah khuallian Pu Lalchamliana chuan zalenna sual hian a man kan pe tam em em mai a, vai len hre pha lo mah ila rambuai (Mizoram) kan hre pha ve a, nunna hlu tak tak kan chan bakah in leh lo kan chan a, mihring zahawmna nasa taka tihbawrhban a ni a, a tuartute thinlungah ser nung lian tak tak hnutchhiah a ni thin a, zalenna suala kan mihuaisente inpekna hi thangthar lo awm zel turte pawhin kan hriat reng mai bakah kan inhrilh thar fo a pawimawh a ni a ti.
Pu Lalchamliana chuan tunlai khawvel thlirin ram leh hnam humhalh tura tharum thawh a rem lohna tam tak a awm tawh avangin kawng dang kan dap a ngai a, a pawimawh ber zinga pakhat chu mahni intodelh a, midang rinchhan lova kan dinchhuah hi a ni a ti a. Kawng hrang hrang – zirna leh thiamna lamahte, ei leh bara intodelh kawngahte, infiamna kawngahte theihtawp kan chhuah a, mi thawhchhuah sa vek ringa khawsa lova, keimahni kutchhuak ngei ringa kan intunnun theihnan theihtawp kan chhuah vek a tul a ni, a ti a. Central YMA in hlemhletna (corruption) do kawnga tan lak a tum chu lawmawm a tih thu a sawi bawk.
Khualzahawm Pu L. Thangmawia, MLA, Human Resources Development Board Vice-Chairman ni bawk pawhin thu sawiin Vai len tum hnih kan tawk a, min tun thlenga min nghawng dan hi a sawihnawm tuh dan sawi tur a tamin a rinawm a, chutih lai erawh chuan Mizote Kristian sakhua min rawn petu a nihna hi a ropui a ni, a ti a. Kristian sakhua min din sak mai bakah hmun hrang hranga pem darh mizote rorelna huang khatah min chhungkhawmin Mizo hnam min din saka, kan duhthusamin la famkim rih lo mahse kan thang zel ang a, Pathianin hnam khata min din chhoh merknaah hian kan chian vek hunah midangte chungah kan la leng ngei dawn a ni, a ti. Assembly Session hnuhn ung bera pawm tak Mizo Language Board chu a taka thawk thei turin chak taka hmalak a nih thu a sawi a, inkaihhruaina dan pawh peihfel tawh a nih thu leh post creation buaipui mek a nih thu sawiin he Board hi Mizo tawng tihhausak leh humhalh kawngah tangkai tak a nih bakah Mizo hnam inpumkhatna atan pawh tangkai tak a nih tur thu a sawi a ni.
Seminar thupui sawi hawngtu Prof. Jangkhongam Dougel, Mizoram University chuan Vai len thawh khatna leh thawh hnihna in Zo hnahthlak hnam hrang hrangte a nghawng dan chanchin a zirchianna a sawifiah a, Mizote chanchin hi khawvel hriatah sapho leh Vaihovin an ziak nasa a, Mizote ziak zirchianna mumal leh chipchiar hmuh tur kan nei mumal lo hi a pawi a tih thu sawiin, keimahni chanchin hi kan zirchian a kan ziah ngei a tul tawh a ni, tiin Mizo subject-a zirlaite leh thiamna bik neite a cho a, mahni subject ni lo subject dang fumfe si lova thlur tel vak ai chuan mahni subject bikah hian a tawp thleng rat thei tura kan inzir a ngai a, Ph.D degree neih a dawhkana thut chhunzawm duhtawk mai lovin kan thiamnate hi field-a luhchilh pui ngam a tul tawh a, Mizote khawvelin min hmuh dan pawh kan her dik zel thei dawn a ni a ti.
Seminar hawnna inkhawmah hian lehkhabu pahnih tlangzarh a ni a, Khuallian Pu Lalchamliana’n Department of Mizo, Pachhunga University buatsaih “Mi Pangate Chanchin Tawi – Mizo Hnam pasalthate” (A Short Biography of Five Mizo Freedom Fighters) a tlangzarh a, he lehkhabu hi Mizo tawng leh sap tawnga buatsaih a ni. Khualzahawm Pu L. Thangmawia’n Pu Lalzuitluanga, Asst. Professor, Department of Mizo, Pachhunga University lehkhabu ziah Mizo Thufingte Zirzauna – An Analytical Study of Mizo Proverbs” a tlangzarh bawk.
Seminar hawnna inkhawm hi Pu Remlalthlamuanpuia, Asst. Professor, Department of Mizo, Pachhunga University in a kaihruaia, Pi Enid H. Lalrammuani, HoD, Department of Mizo, Pachhunga University in inlawmna thu a sawi a, Dr H. Laldinmawia, Asst. professor, Department of Mizo, Pachhunga University hnen atang seminar chungchang report ngaihthlak niin, Prof. H. Lalthanzara, Principal, Pachhunga University College leh Pi Zodingpuii, Director, Social Welfare & Tribal Affairs Department ten thuchah an sawi a, Dr Lalnunpuia Renthlei, Asst. professor, Department of Mizo, Pachhunga University in lawmthu sawin in a khar a ni.
Nimin chawhnu lamah session hnih awmin session hmasa zawkah resource person mi pali –
1) Dr Samuel Vanlalthlanga, Associate Professor, Department of History, Govt. Aizawl West College
2) Dr Lalrinnunga, Department of History, Ambedhar College, Fatikroy, Unakoti, Tripura
3) Dr Lalzarzova, Department of History, Govt. J.Buana College, Lunglei
4) Dr Roluahpuia, Asst. Professor, IIT, Roorkee & Research Affiliate, S0uth Asia Institute, Harvard University te paper buatsaih zirho niin sawihona hun man a ni a.
Session hnihnaah resource person mi pali –
1) Pu Lalhruaitluanga Ralte, General Manager (Rtd), Presscom
2) Dr Rohmingmawii, Associate Professor, Department of History, Pachhunga University College
3) Pu C. Lalnunchanga, Writer, MAL Book of the Year Awardee
4) Pu Lalsangzuala, Asst. Professor, Department of Mizo, Mizoram University te paper buatsaih zirho niin sawihona hun man a ni.
Vawiin hian session hnih bawk neih leh tur niin mi thiam sawm bikte paper buatsaih zirho leh a ni ang.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: