Danglam duhna: Thlarau zungkaihna hmasawn tir
—Rick Warren
— October 5, 2022
"Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a." 1 Thessalonika 5:18
Pathian hmangaihna i hriat ril poh leh, i lawmna a zual ang.
Bible chuan lawmna in i nun fanchhuak rawh se a ti a: “Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a.” (1 Thessalonika 5:18).
Hei hi chhinchiah bik teh, Bible chuan engkim avangin lawmthu sawi rawh min ti lova, engkimah lawmthu sawi rawh min ti zawk a ni. Thil inanglo tak a ni!
I nuna thil ṭhalo lo thleng avang khan i lawm tur a ni tihna a ni lova. He khawvela thil lo thleng zawng zawng hi Pathian duhzawng a ni kher lo. Diktak chuan, Pathian duhzawng ang hian thil tam tak hi a thlenglo zawk a, mihring duhzawng hi a thleng zawk fo ṭhin a ni.
He khawvelah hian sualna hrang hrang a awm a, chungte avang chuan Pathian hnenah lawmthu i sawi a ngai lova. Chung zawng zawng karah chuan Pathian hnenah lawmthu i sawi zawk tur a ni.
Keima nun bikah chuan, engkima lawmthu sawi hi ka zirchhuak tawh a. Hengte hi a chhante chu an ni:
• Pathianin engkim a thunun.
• Pathianin thil ṭha lo aṭangin thil ṭha a rawn thlentir thei.
• Pathian chuan ka thiltihsual pawh thil duhawm zawkah a herchhuah tir thei a; chung aṭang chuan thil ṭha zawk a rawn herchhuah tir thei.
• He Leiah hian kumkhuain ka cheng dawn lo; engtik niah emaw chuan vanramah ka kal ang.
• Ka chhandamna hi ka hloh thei tawh lo.
• Eng pawh lo thleng se, Pathianin min hmangaihna hi a bang dawn lo.
Hei hi thudik chu a ni, thil thleng duhawmlo deuh chang awm mahse, kawng engkimah lawmna tur tam tak ka ngaihtuah chhuak thei a ni.
1 Thessalonika 5:18 kha en leh ila. Lawmthu sawina tur chu kawng “engkimah” a ti a. Greek ah chuan _pos_ an hmanga, chumi awmzia chu, zawng zawng, engkim, engah pawh, engtik lai pawhin, khawihmunah pawh, eng thilah pawh. A awmzia tak chuan, engmah telh loh a nei lo, chhuanlam a siam lo, engmah huamloh a neilo bawk a ni.
Chu tak chu a danglamna a ni, a ni lovem ni? Chuvangin chu lawmna chu lawmna ril tak a ni.
Miin thilpek mawi tak an pek che a lawm tur khan i insen a ngai miah lo. Tute pawhin an ti thei. Mahse lawmna riltak neitu chuan lawmna ril tak neih a ngai thung a ni.
Pathian duhzawng hriat kan duh an ti ṭhin a. An nun danah Pathian duhzawng eng nge ni ang tih hriat an duh ṭhin a ni. 1 Thessalonika 5:18 ah Pathianin chiang takin a sawi a: “Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a” a ti a ni.
Engkima lawmthu sawi hi i tan a ṭha a. I lawmna a zual poh leh Pathian i hnaih zual ang!
Ngaihtuah zui atan
* Harsatna tawh lai pawha Pathian hnena lawmthu sawi dan Bible-in min tiam vawn tur i hria em? Lehkhaah ziak la, i en fo theih turin tar ang che.
* Hun harsaah pawh lawmna thuk tak nei ṭhin i hmuh hian, engtin nge nangmah a nghawng che le?
* Pathian duhzawng “engkima lawm” chu engvangin nge i tan zawm ve a ṭhatna chhan? Chu chu i nunpui chuan i nun kawng dangah engte nge nghawng a neih ang?
*Krista nena nun bul ṭan i duh em?*
Bible chuan Pathian Fapa, Krista Isua i rin chauhin vanram i lut thei ang a ti a: ““Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi 2:8-9.
I sualna te i puang duh aniha, i nunah Isua i thlang duh anih chuan, heti hian ṭawngṭai ang che.
“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a ni.
"Aw Lapa, misual ka nih ka inhria a, chuvang chuan i ngaihdamna ka dil a che. Isua Krista hi i fapa a ni tih ka ring a. Ka sualna avangin a thi tih leh thihna hnehin i kaitho tih ka hria e. Ka chhandamtu atan ka duh che a, vawiin aṭang hian i hnungzui ka duh a ni. Ka nun min kaihruai la i duhzawng ka tih theih nan min pui ang che. Isua hmingin ka dil e. Amen
Isua thlanga i ṭawngṭai thei a nih chuan, hetah hian min lo email mai la Rick@PastorRick.com. Tichuan Isua nena zinkawng i zawh theihnana i mamawhte a thlawnin kan inpe dawnia.
*[Lettu: Sangpuia]*
Post a Comment
He post chungchanga i ngaihdan lo sawi ve rawh: