Ticker

10/recent/ticker-posts

Home minister-in Mizoram Police Service officer te puala buatsaih Mid-Career Training Programme hawng

Aizawl | Oct 10, 2022: Mizoram Police Service Officer te puala buatsaih ni 5 chhung awh tur Mid-Career Training Programme (MCTP) chu vawiin chawhma dar 10:00 khan Home Minister Pu Lalchamliana’n ATI Auditorium, Aizawlah a hawng.


Police Officer kalkhawm hmaah Home Minister chuan thu sawiin khawvelin hma a sawn ang zelin dan bawhchhiatna (crime) ven leh misual chhui kawngah thil thar, kan la hriat ngai loh te kan tawng chho zel a, hemi a nih avang hian Mizoram Police Service officer te chu an hnathawh kawngah nitin inzirthar zel an mamawh a, tha thlah thiang kan ni lo, a ti a. DGP taima tak leh ngaihtuahna seng nasa tak, police chhungkua mai bakah Zoram mipuite tana thahnemngai taka theihtawp chhuah mi kan nei hi kan vannei hle a ni, a ti.



Home Minister chuan dan leh thupek kenkawh kawngah leh thil dang dangah chona tharlam kan hmachhawn reng thin a, International border leh state ramri chungchangah tan mar pat kan ngai a, heng bakah hian nitina office hna kan thawh kawngah pawh pawh zir thar tur a tam em em a, training course huam zau tak leh hawl kim tak kan nei thei tur hi a phurawm takzet a ni, a ti a. Cyber Crime chungchangte, mihring leh ruihhlo a sumdawn chungchangte, human rights, nu leh naupang laka hleilenna, ruihhlo ngaite enkawl leh dan bawhchhiatna awm thei chi tinreng chungchang chipchiar taka zir tur a ni hian Mizoram police te hnathawhna leh hmalakna a ti chakin bung thar min kaipui ngei ka ring a ni, a ti a. Zirtirtu anmahni field a a tha ber ber ten zirtirna an pe tur leh inkawmhona an nei tur hian rah tha a chhuah ngei ngei dawn a ni, a ti.

Mid-Career Training Programme (MCTP) hi ni 5 chhung (10th October, 2022 – 14th October, 2022) neih tur a ni a, Mizoram Police Service a direct-a lut senior officerte an tel a, Mizoram University, Police, sawrkar official, NGO leh kawng hrang hranga thiamna bik nei ten zirtirna an pe dawn a ni.

Vawiin training hawn inkhawmah hian Pu LR Dingliana Sailo, IPS, DIG (Trg.) in inlawmna thu a sawi a, DGP Pu Devesh Chandra Srivastva-in thuchah sawina hun a hmang bawk a, Pu Bhisham Singh, IPS, AIGP (Trg.), Course Co-ordinator ni bawkin lawmthu sawina hun hmangin a khar a ni.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments