Saitual | Oct 13, 2022: Governor Hari Babu Kambhampati chuan vawiin khan ni 2 chhung official programme nei turin Saitual a thleng a. Chawhnu khan Conference Hall, DC Office-ah Head of Office te, Bank hotute, political party hruaitute, kohhran hruaitute leh tlawmngai pawl hruaitute nen inkawmna hun an hmang nghal a ni.
Saitual District Bawrhsap Pu VL Hruaizela Khiangte in Saitual District mipuite aiawhin Governor Hari Babu Kambhampati lawmna thu a sawi hmasa a. District Profile tih thupui hnuaiah Saitual District chhung chanchin kimchang, hmasawnna te, hmalakna kal mek te leh hmachhawp te Powerpoint presentation hmangin a tarlang chhunzawm a. Hemi hnu hian Pu J Lalmuankima, Superintendent of Police in Saitual District venhimna kawnga police hnathawh te bakah dan leh thupek kenkawh kawnga Saitual District dinhmun te Powerpoint presentation hmangin a sawifiah bawk a ni.
Governor Hari Babu Kambhampati chuan District la naupang tak ni mahse Saitual District chuan hmasawnna kawng a zawh mek niin a hmuh thu a sawi a. Faina kawngah Saitual district in State pum huapa intihsiaknaah District fai ber dinhmun a hauh nghal thei te chu chhuanawm a tih thu a sawi bawk a ni.
Governor hian zirna lam, kawlphetha dinhmun, tui intur sem chungchang, MNREGA hmalakna, Agriculture, Horticulture, UDPA hnuaia hmalakna leh agriculture huanga hmalakna te chipchiar takin official te a zawt a. Tan lak ngai lai te sawiin mipui tana theihtawp chhuah chhunzawm turin a fuih.
Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana(PMJJBY), PM Ujjwala Yojana(PMUY) scheme, etc hmalakna leh mipuiten an tangkaipui dan tur te uar takin a sawi a. Heng scheme te hi mi tam tak a lo kawm tawh atangin mipuiin an hre chiang lo hle a, a hlawkna tel thei pawh an la tlem hle nia a hriat thu sawiin pawi a tih thu a sawi a ni. Mi harsa ten heng scheme atanga engemaw vanduaina leh harsatna tawh thulha pawisa tam tham tak an dawn theihna turin kum khatah pawisa tlem te an thawh ve a ngai a. Hemi chungchang te hi chiang taka hrilhfiahtute awm se mi zawng zawngin heng social security scheme te hi an zawm vek duh a rin thu a sawi a ni. Tun dinhmunah chuan Banker te leh concern official te mipui zirtirna pe turin nasa zawk tan an lak a ngai tih sawiin a bik takin banker te chu tan la zual turin a chah a ni.
In sak tanpuina, Gas connection neih theih dan leh central scheme dang tam tak khua leh tui te zinga khawsak harsa zawk ten an tangkaipui tur leh an la hriat chian loh te hi a awm mek a. Hengah hian official te tan lak a ngai tih sawiin beneficiary te scheme hmanga hlawkna an tel theih nan official te pawn tihtur tul te dah khawmuang lova, central lama nawr ngai te pawh an nawr zung zung a ngai tih a sawi bawk.
Pu VL Hruaizela Khiangte, Deputy Commissioner, Saitual District in report a pek dan chuan kum 2018 khan Saitual chu District atan siam a ni a, kum 2019 atangin district adminiatration kalpui a ni. Saitual District zau zawng hi 1757.34 sqkm a ni a, a chhungah hian Saitualah district headquarters leh SDO Subdivision(Sadar) leh Ngopa Civil Sub-division te a awm a. Department hrang hrang ten District office 23 an hawng tawh a. Tunah Saitual District ah hian khaw 40 awm mekin mipui 61108 bawr vel an cheng mek a ni. Bawrhsap hian Agriculture, Horticulture leh Eco-tourism huangah te hlawhtlin theihna tur remchanna kawng tam takah a nei tih a sawi lang a. Faina kawngah phei chuan endikna neih hnuhnung berah khan Saitual District chu District fai ber lawmman a la a, thingtlang khaw lian te inelnaah Ngopa in pahnihna an hauh bawk tih a sawi a.District chhungah hmalakna tam tak kalpui mek a ni tih sawiin kawngpui lian pahnih NH 06 leh NH 102B laih hna thawh mek chungchangah pawh report a pe bawk a ni.
Pu J.Lalmuankima, SP, Saitual District pawhin dan leh thupek kenkawh chungchanga Police hmalakna te sawina hun a hmang a. Tun dinhmunah Saitual District chu a ralmuang thawkhat a, harsatna lian tham thleng thei buaina emaw pawikhawihna liantham thleng a la awm lo tih a sawi. Tunah hian District headquarters Saitualah a awm a, Police Station pahnih Saitualah leh Ngopaah te awmin hmun pawimawh deuhah outpost te dah an ni a. Police personnel 78 ten Saitual DEF hnuaiah dan leh thupek hna an thawk mek a ni.
Pi Magaret Lalrinawmi Fanai, Addl.DC, Saitual in lawmthu sawiiin Governor leh Official te inkawmna hun hi khar a ni a. Hemi hnu hian Governor chuan a hran te tein Kohhran hruaitute, political party aiawhtute leh tlawmngai pawl hruaitute a kawm chhunzawm nghal a ni.
- DIPR
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: