Ticker

10/recent/ticker-posts

Dy. CM-in Aizawl tui laknaa hman tur bik power substation hawng

Aizawl | Oct 31, 2022: Vawiin khan Deputy Chief Minister Pu Tawnluia chuan SIPMIU project hna thawh zawh tawh Dedicated Power Supply Transmission Line & 132/33 kV Substation leh Supervisory Control and Data Acquisition (SCADA) for Water Management of Aizawl GWSS Phase I & II, Dihmunzawl-a mi chu a hawng.


Hawnna inkhawm buatsaihah khuallian Pu Tawnluia chuan UD&PA leh PHE Department hian khawpui hmasawnna kawng chi hrang hrang - a bik takin mipuite hnena tui thianghlim pek leh faina chungchangah hna an thawhho a ngai a thin a, anni thawhho thatna azarah hmasawnna kan hmu nasa hle a ni, a ti a. Aizawl khawpui a thang zel a, mihring kan pun zel bakah tui kan hmanna pawh a pung zel a, tui pump khawl liante chawmtu a hranpa a power substation kan nei ta hi a lawmawm takzet a, mipuite pawhin kawlphetha leh tui tun aia hnianghnar zawka kan neih phah tur hi thil chhinchhiahtlak a ni, a ti a. Tui pawh mumal zawka pump theih a nih tawh dawn avangin mitinin kan tuihna leh luite kan humhalh a pawimawh tih kan hriat a, midangte zirtir hna pawh kan mawh a kan lak a tul a ni a ti a, sawrkarin tuihna venhim leh humhim kawngah ruahmanna mumal tak siam turin hma a la mek tih a sawi bawk.


Aizawl GWSS Phase-III pawh chak taka thawh mek a ni a, tluang taka kan kal thei a ni chuan kum thar lamah chuan kan hawn theih kan inbeisei a ni, a ti a. Mipuite hian tui renchem erawh kan zir a la ngai hle tih sawiin, fur ruahtui kan hmuh thatte hi dahkhawl thin tura ngaihtuahna senga hma la turin mitin a chah bawk a ni.

Khualzahawm Aizawl Mayor Pu Lalrinenga Sailo chuan SIPMIU in Aizawl mai ni lo, Mizoram rohlu tur hmasawnna ruhrel tha tak tak an tihlawhtling thin hi a lawmawm a tih thu a sawi a, AMC dinhmunte tarlangin Sawrkarin AMC pawimawhna hriain a hmasawnna turin ruahmanna a siam zel thin a, mawhphurhna pawh kan lak belh zel avangin sawrkar department hrang hrangte nen thawhhona tha tak neih zel kan duh a ni a ti a. Vawiina 133/33 kV station hawn a ni leh dedicated power supply transmission line a nei chuan tui hnianghnar tak min pek dawn bakah SCADA hmanga mipuite hnena tui sem chhuah dinhmun leh thianghlim dante engkim kan hre thei tur pawh hi a lawmawm tih sawiin, ruahtui dahkhawl a pawimawhzia te a sawi a ni.

132/33 kV Substation hi Aizawl khawpui tui lakna hmunpui Greater Aizawl Water Supply Schemes (GAWSS) Phase I & II, Dihmunzawlin a hranpa liau liau a kawlphetha (power) a lakna atana duan a ni a, GAWSS Phase I & II-te hi 33kV line Luangmual Substation atanga chawm thin niin, mipui chawmtu Transformer (Luangmual Substation) nen hmanpawlh a nih avangin power shutdown/load shedding a ngai fo thin a, hei vang hian Aizawl khawpui tana tui pump chu nasa takin a khaihlak fo thin a, Luangmual Transformer in a chawm mipuite pawhin duhthusamin power supply an hmuh loh phah fo a ni. Transformer hman dun vang hian tui hi duh duh huna pump a remchang lo fo thin a, mipui tan tui thianghlim indaihlohna nasa tak an thlen thin a ni. He harsatna sukiang tur hian 132/33kV Substation hi tui pumpna hmunpui GAWSS Phase I & II chauh chawmtu tura (dedicated power supply) siam a lo ni ta a ni. He hna hi SIPMIU, UD&PA Department chuan a thawk a, September 30, 2022 khan Luangmual Substation atangin Power & Electricity Department chuan harsatna awm lovin a charge fel a, Public Health Engineering Department kutah hlan a ni dawn a ni.

132/33 kV Substation leh Luangmual Substation hi 4.3 kms a inhlat niin Transmission Tower sawmhnih (20) hmanga thlunzawm a ni a. Tui pump-na hmunpui nghet taka chawm thei tur 12.5 MVA step-down Transformer pahnih (2) dah a ni a, 33 kV bay pahnihah (Bay I & Bay II) a sem chhuak leh a, hmun hnih (2) ah in sem darh lehin tuna GAWSS Phase I & II, 33/11 kV substation awmsa chawm turin line chuktuah leh a ni a. Control room atangin ngawrh leh felfai tak a monitoring leh control a ni bawk. He 132/33 kV Substation hian AC Control Room Building mumal tak neiin, SCADA Station, substation equipment control leh protection relay panel-te bun a ni. 132/33 kV Substation mumal taka kalpui a nih theih nan a enkawltute awmna tur staff quarters – Type 2 quarters pali (4) leh type 4 quarters pakhat (1), a vaiin quarters panga (5) sak a ni.

132/33 kV Substation, Dihmunzawl hman a nih hnu hian Luangmual Substation Transformer load sang tual tual avanga power supply mumal lo leh load shedding-in tui pump a tih khaihlak thin chu a awm tawh lova. Mipui tan thil tha tak niin, Transformer load sang lutuk thin kha a thawl phah a, mipui hnenah power mumal zawk a sem darh theih phah a ni. Power Supply awm loh chang a tui pump-na atan Diesel Generator hman a tlem phah a, diesel man senso nasa takin a tlak hniam phah a ni. Power Supply a mumal tak avangin Aizawl mipuite hnenah tui tam zawk pump chhuah a ni a, O&M chhung ringawt pawh hian chawhrualin, a hma aiin 4 MLD vel a tamin tui sem chhuah tawh a ni.

SIPMIU in he project a khawih mekah hian GAWSS Phase I leh II thuam thatu tur Supervisory Control and Data Acquisition (SCADA) chuan 2019 atang khan hna a thawk tan a, he khawl thar hmang hian tui thianghlim dan (quality) te, tui tam leh tam loh (quantity) te, harsatna awm thei chi hrang hrang a lo hmu lawk thei a, khawl hrang hrang hnathawh dan a vil a, harsatna thleng theite a hrilhlawk a, harsatna thlenna hmun a tilang thei bawk. Heng bakah hian information hrang hrang la khawmin online hmangin data mumal zawk leh felfai zawk a enkawl theihna turin a SCADA station-ah a chhawpchhuak a tangkai tak a hman a nih ngei beisei a ni.

GAWSS Phase I & II a SCADA hian tui tehna chi hrang hrang heng – tui luang tam zawng te, tui chim san zawng te, tui nawr nat zawng te, tui nut dan te, tui al leh al loh bakah tui thinghlim leh thianghlimte a endik a. Hei bakah hian Water Treatment Plant leh Tui Pump-na in power/current a hman zat hi online in a endik reng a, tul lova sum senral tur a veng bawk a ni. Chumi bakah, hmun khat atanga engkim endik a thunun theihna tur SCADA station pawh la buatsaih belh zel theihna tur kawng a in hawn phah bawk a ni.

SCADA hian Greater Aizawl Water Supply Scheme Phase I&II hnathawhah hmasawna tam tak a thlen dawn a. Enkawlna man tlawm si, hnathawh a tichak a, a rintlak bawk a, tin, tui luang ral mai mai tur a venpui dawn bawk a ni. Tui luang zat leh a kaihhnawih a chhinchhiah reng avangin a hranpa a reading lak a ngai tawh lova, hei hian enkawltute hna tam takin a pui dawn a ni.

He hawnna inkhawm hi Pu Lalmalsawma Pachuau, Secretary, Urban Development & Poverty Alleviation Department in kaihruaiin , Pu Lalrothanga, Program Director, SIPMIU in Technical Report a pe a. Pu H.C. Lalnunzira, Engineer-in-Chief, PHED in kharna thu a sawi a ni.

Vawiin hun hi Dy Govt. Chief Whip Pu Lalrintluanga Sailo, Human Resource Development Board Vice Chairman Pu L. Thangmawia MLA, Man Power Development Board Vice Chairman Pu Zothantluanga, MLA, ZIDCO Chairman Pu Lalthlengliana bakah AMC, PHED, UD&PA leh department hrang hrang atang sawm bik official ten an hmanpui a ni.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments