CHANAI EIRUK SAKNA : POLICE-AH

- David Sailo

6th October 2022

Hun chu a kal ve deuh tawh, mahse an chanvo hi pe kir leh vek rawh se tiin kan auchhuak a ni. 25th July 2007 a boral tawh, Lalrinsanga chanchin leh dik lo inphum te chu!!

LALRINSANGA:

Kum 1991 October thla khan 1st Bn MAP ah Constable in alut a, kum 1993 ah dah ngheh (Confirm) ani. Khawlian post ah kum thum a awm hnuin Headquaters ah thla hnih a awm a, Zohmun post ah awm lehin Zohmun post a zawh hnu in Headquaters ah thlahnih vel bawk a awm leh a, Marpara Post ah dah leh a ni a, Marpara post aṭangin Headquaters ah dah a ni leh a, he hmuna a awm lai hian 13th October 1999 chhun dar 2 ah Roll Call tura a kal chu insawifiahna pawh awm hman lo in an lo ban tawp a ni.

CHAWLH PEK DUH LOHNA !! 

Marpara aṭang hian damsam lo chungin a haw a, GD mil tura a kal chu 3-Gate a Duty turin an Detail a, a chhungte hnenah "Ka nuamsam lo e mai Leave min dilsak teh u" a tih avangin an hotute hnenah leave an dilsak  ta ani.

Hei hi 2nd December 1998 kha a ni. An hotute chuan "A damlo anih chuan Police in damdawiin kan nei a, M.I Room ah rawn inentir sela, kan Doctor in Sick a lo pek chuan Leave ah kan pawm ang" tiin an lo chhang a, Police Motor in Police damdawiin panpui a ni ta a, Police Doctor chuan Sick pe lovin karhnih hnua kal leh turin damdawi a lo chawh a ni.

Police Doctor chuan Sick a pe silo a, Duty a kal thei bawk silo, in lamah an inenkawl ta a, hetih laia a hna a kal lohna hi Kal lo (Absent) angin an chhiar sak char char a ni. Police damdawiin aṭanga an damdawi chawh chu ni 4 vel a ei hnu pawhin ziaawm lam pan lovin a hma aia a zual zel avangin mangang takin Civil Hospital an panpui ta a, an lo Admit ta hmak a. Civil Hospital Doctor chuan damlo dinhmun hria in Medical Leave ni 30 a  ziah sak ta a (Thlalak a mi hi). He lehkha keng hian Leave an dil ṭha leh ta a. Mahse, chu pawh chu pawmsak an ni lo!! Damdawiina let reng, a enkawltu Doctor in Leave a ziah sak thlap tawh chu Absent angin an kaltir lui ngar ngar a nih chu!!

Civil Hospital ah hian a natna chu chuap TB niin an hria a, mahse TB hrik an hmu thei mai lo ( A hmaa Police Doctor damdawi  chawh a lo ei tam deuh tawh vang pawh a ni thei). TB hrik an hmuh mai loh avang chuan TB a enkawl Risk kha an ngam bik si lova, chuap tha lo enkawlin an enkawl ta a, a chuapa tui tling pawh vawi 3 lai siak chhuah a ni nghe nghe a ni.

Civil Hospital aṭanga an chhuah hnu pawh hian a hna han zawm thei chi ziazang a la ni lova, in lamah an inenkawl zui zel a, a chuap a TB tih an hre mai lo nen damdawia an inenkawl pawhin dam ṭha pangngai hleithei lovin a awm reng ta a ni.

11th May 1999 khan damsam lo chung chungin a hna zawm turin a in Report ve ta a, Quarter Guard ah an lo dah lut nghal a, Quarter Guard ah ni 5 lai an dah hnu in 17th May 1999 ah Duty pangngai chhunzawm turin an ti ta a ni. "A dam ṭhat loh em avangin Barrack atangin Duty kal mai rawh se, a dam ṭha si lo a, inlam aṭanga Duty kal a harsa ang" an tih avangin Barrack ah chuan a awm ve ta a.

HLAWH PAWNGSUALNA :

Bawrhsawmna avanga Leave an pek duh tlat loh avangin inenkawlna hautak tak karah a thlabi hlawh an hren sak char char a, dam ṭha lo chunga Duty a kal ve hram hramna thleng chuan a hlawh an hren bakah an Cut sak bawk a, heti chung hian sawi tawh angin 13th october 1999, chhun dar 2 Roll Call tura a kal chu ban a nih thu an lo hrilh ta tawp mai a nih chu.

EIRUKNA CHU !!

Ban a nih takah chuan a thawmhnaw la tura an kal chu an hotu pakhat chuan "Thla 6 hnu ah GPF dil rawh u, thla 6 thleng hi Interest a pung ve ania" tiin a lo hrilh a, chu chu zawmin an ban hnu thla 6 ah a GPF an han dil chu Account and Treasury lam chuan ban anih thu an lo hre reng reng lo!! Tun thlengin a GPF hi a la rawn lut zel a, Rifle Allowance, GIS te pawh a in Cut ngaiin ala in cut thlap thlap tiin an lo hrilh ta mai a.

"Engtikah nge an ban?" ti a an lo zawh chu an han hrilh a, an ni lam chuan "Ban a la ni lo tlat, a GPF pawh thlatin a la rawn lut ziah, a hlawh lakna en dil rawh u" tiin lehkha an lo ziah sak a. A hlawh lakna an han enfiah chuan ni 2nd December 1998 (Leave an pek duh loh avanga hlawh an hren sak hun) atanga an ban hnu thla 6 thleng khan a hlawh chu lak vek angin an lo Sign a nih chu!! Hei hi CORRUPTION dik tak a ni.

MAWHPHURTU A LANGTE :

Hlawh lakna lamah leh Account & Treasury lamah ban a lo ni si lova, hnaa luh leh dan dap a ni ta a, khatih laia an Commandant chu Pu Hmingdailova Khiangte a ni a, la lut leh turin an ngen a, "Ka ban tawh ka la lut leh ngai lo" tih zawng hi an thu dawn a ni tawp mai. Pu Hmingdailova chu Pu John Neihlaian a thlak a, GPF lak beiseina nen an han bawhzui leh a, a ni hian a Service book (Sheet) enfiah a tum chu RO ah an zawng hmu lova, PHQ ah an zawng hmu zo hek lo!! An ti bo a ni tawp mai. Tihluihna nge Corruption laka thiam taka fihlim tum an awm vang zawk ni ang le?!! DE File tak ngial pawh an zawng hmu zo lo leh zel!! 

Pu Johna chuan chinfel tumin Cashier leh C-Company a hlawh semtute chu a ko a, an in hnial a ni ta ringawt mai. Cashier lamin kan pe lut an tih laiin C-Company hlawh semtuten kan dawng lo tiin an inhnial ta ringawt a, thu a tawp ringawt.

Hetih hun laia Cashier te chu  Pi Malsawmi leh Pu Lalrinliana te an ni a, C-Company a hlawh semtute chu Pu HK.Vanlalchhuanga leh Pu Thanpara te an ni a, ADM chu Pu Chhunzika niin RO chu Pu Lalrinmawia a ni.

Heng ho hian Pu Lalrinsanga (L) dam loh chhung Leave pe duh si lova Absent anga kal luih tira a hlawh Cut sak te (Cut anga lantira hlawh lakna lama pek vek anga lang si) ban a nih hnu thla 6 thlenga hlawh pangngai taka la anga a lo awm char charna ah hian mawh an phur a, a titu zawn chhuah ngei tur a ni ang!!

NGENNA :

Police zawng zawng hi an fel lo, an dik lo ti a vaihmer a, puhchhiat tumna lam a ni lova, Police Officer dik tak tak lo chhuak thar zel te hian he thil dik lo tak hi rang taka chhuichhuak a, hrem ngai hrem a, an dikna chanvo pe turte, ban tak tak a lo nih si loh chuan Medical a Pension tir mai turin kan ngen a ni zawk. 

Pu Lalrinsanga erawh a hnu fe ah Chuap TB hmuhchhuah niin a lo benvawn nasa tawh a, kum 7 teh meuh harsa taka chhungkua an inenkawl hnu ah kum 2007 khan mual a liam ta. A awmna aṭang erawh chuan a chanvo leh a nupui fanaute chanpual tur ti khawbaw zo tute hi a hmu kiau tawh ang a, an dinhmun hriaa khawngaiha ke pensak tute pawh he leia a nupui fanau mangang tak te nen hian beiseina nen an thlir ngei ang le.

(Pu Lalrinsanga hi a awm tawhna Post hrang hranga a Attendance Sheet pawh en theihin a awm e!!)

TLIPNA :

Police Training na hmun, PTS Thenzawl a tun ṭuma Training tura koh (Armed) pawimawh tak tak, a ṭhen chu kaisanna (DPC) kaltlang turte hi eng ti tiha Principal hian Training hming pu si a rawn chhuah chum chum mai nge a nih le?!!

Thla 3 Training hmingpu tur si, a taka Training na hmuna awm si lo, Training anga kaltir ni bawk si an awm a nih chuan chhui chhuah vat a ngai ang a, Principal mawh nge chunglam thupek tih thlengin. Hetianga Training hi chu Police zawng zawngin an duh vek a rinawm. Lo ngaichang leh phawt ang.