Ticker

10/recent/ticker-posts

World Day of the Deaf pualin hun hmang

Aizawl | Sept 23, 2002: World Day of the Deaf pualjn vawiin khan Ephatha Special School Kulikawn West, Aizawl ah hman a ni a, Baryl Vanneihsangi, AMC Ward No.19, Councillor leh Pi Vanlaldiki Sailo, Commissioner of PwD te chu khuallian niin, Dr. Robert L. Khawlhring, State Nodal Officer, National Programme For Prevention & Control of Deafness (NPPCD) chu Chairman a ni.




Dr. Lalthanmawii Khalthang, State Consultant, NPPCD in National Programme for Prevention and Control of Deafness (NPPCD) hnuai a hmalakna hrang hrang te a sawi a, NPPCD hi kum 2014, April atang khan Mizoram ah hman tan niin, tunah hian Mizoram pumah he programme hi hman a ni.  NPPCD in a tum ber chu Bengngawnna thlen thei tu natna leh intihpalhna lak atanga inveng tura mipuite zirtirna pek te, beng natna a hma thei ang ber a hmuh chhuah a, enkawl dam vat te,
 Beng enna khawl hrang hrang changtlung taka neih leh beng lama mithiam te training pek  leh Bengngawng te endawngna leh hmuhsitna tih bo te hi an ni. District hrang hrangah beng lama mithiam te – ENT Doctor/Trained Medical Officer, Audiologist, Audiometric Assistant leh Hearing Instructor te dah an ni. Kum 2022 financial kal mek a Damlo en tawh zat hi 8295, Ri hriatna tha lo 1254, Bengdar vuah tuara Refer zat 529, Beng zai zat 35, Beng natna hmuh chhuah zat 5622, Investigation 1954 a ni.

Hei bak ah hian Dr. Lalrinmawii, MS (ENT), Civil Hospital chuan “World Day of the Deaf”, 2022 thupui “Building Inclusive Communities for all” a sawi a. hei hian a tum ber chu Bengngawng endawngna te, thliarhranna te leh hmuhsitna te tih bo a ni a. Tin, Khawtlangah te, hnathawhna hmunah leh hna lak chungchangah te pawh midang nen ang khata kan inen theih nan hmalak a tul thu a kawk a ni.

Pi Vanlaldiki, Commissioner of Person with Disabilities (PwD) chuan NPPCD hnuai a thawktu te an rawngbawlna ah thahnemngai taka thawk zel turin a fuih a. Tun ah chuan hna dilna ah pawh rualbanlo ten 4% seat dah sak zel an nih tawh thu sawi in, heng post te hnawhkhat thei tur hian ri hriatna thalo nei naupang te theihtawp a tang leh inbuatsaih turin a chah.

Baryl Vanneihsangi, AMC Councillor Ward No.19 chuan Programme hetiang a beng lam hriselna atana hmalakna lo awm ta hi lawmawm a tih thu  a sawi a. “Beng thalo leh bengngawng te inkiltawih leh inthlahrung lova an tel theihna khawtlang leh kohhran kan din hi a pawimawh a, hemi atan hian kan zavai a kan tan tlan a pawimawh a ni” a ti.


World Day of the Deaf hi September Pathianni hnuhnung berah kum tin hman thin a ni a. Tun kum ah pawh a remchan zawk nan Mizoram pumpuiah he Ni hi September ni 23 (Zirtawpni) ah hman a ni.

Post i hmuh dan

Post a Comment

0 Comments