Aizawl | Sept 15, 2022: Mizo Students' Union (MSU) General Headquarters, Aizawl buatsaih UPSC Challenge Inter-College Quiz Competition 2022 chu nizan Dar 8:00 khan Ignite Studio, Khatla; Aizawl ah Grand Finale neih a ni a, Govt Hrangbana College an thiam ber!
Govt. Hrangbana College leh Govt. Saiha College ten inelna an nei a ni. UPSC Challenge Inter- College Quiz Competition 2022 kharna hun inkhawm hi Pu Lalhmangaihzuala, Adviser MSU chuan kaihhruaiin Pi Lalremfeli, Owner, Vintage Bussiness Enterprise chu khuallian a ni.
Khuallian Pi Lalremfeli chuan thusawiin, "Mihring tupawh hi Pathian hian ruat dan min nei ṭheuh a, dinhmun inang lo tak tak aṭang pianga seilian ni mah ila, kan hma a tihtur awm reng reng hi tumruhna nen a ka ti thei ang tih rilru pu tlat chunga kan tih chuan kan thei ṭhin a ni" a ti. Pathian malsawmna dawng tlak ni tur hian a dawn thlengin kan zir a pawimawh thu sawiin, mi hlawhtling ni tur hian mi fate nih kher a ngai lova, tumruhna te, huaisenna te nei zel turin zirlai kalkhawm te a fuih a ni.
Pu J. Lalmuanzuala, President, MSU General Headquarters chuan thusawina hun neiin, UPSC Challenge Inter-College Quiz Competition chu Central Services leh All India Services a Mzio zirlaite tun aia nasa a kan inziah tlin ve theihna tura inbuatsaihna kawng pawimawh tak a nih avangin Quiz Competition hi kum tina buatsaih ṭhin a nih thu a sawi. Pu Muana chuan, sawrkarin College Zirlai admission an tihna aṭanga revenue lak ṭhin a ni chu pawi a tih thu sawiin, zirlaiten ṭangkai zawka kan hman theih nan, admission fees aṭanga sawrkarin a an sum lak hi zirtirtu kan mamawhna zawnah leh College mamawhna kawng hrang hrangah min hmansak zawk se tiin sawrkar a ngen a ni.
MSU President Pu J. Lalmuanzuala chuan, India ram hrang hrangah chhungkua anga ram rawngbawl hna thawk Poltician tam tak an awm a, chutihlaiin kan Mizoram chhungah erawh Politician fate'n Politics an tui lo chu mak a tih thu a sawi. Ram rawngbawl tura inpe te hian dik lo takin sum an la lut a, dik lo taka sum an lak luh chenin an chhungkua an ralin politics khel tlak lohin an awm em ni? Ram rawngbawl hna hi chhungkua anga thawh tlak a ni em, ram rawngbawl hna hi chhungkuaa thawh tlak a nih chuan tinge an hnung zui turin an fate an chher loh? tiin Mizoram Politician te zawhna a zawt a, ṭhalaite hian ram hi kan vei tawh a, a tluk chhiat kan phal lo a ni a ti.
UPSC Challenge Inter-College Quiz Competition 2022 ah hian Mizoram chhung college hrang hrang 22 ten inelna an nei a, Govt. Hrangbana College chu pakhatna niin Govt. Saiha College chu pahnihna an ni. Quiz Competition lawmman pakhatna hian sum fai ₹50,000 bakah Trophy, Citation leh lehkhabu a keng tel a, pahnihna hian sum fai ₹30,000 bakah Trophy, citation leh lehkhabu a keng tel bawk a ni.
Post a Comment
He post chungchanga i ngaihdan lo sawi ve rawh: