Thlai thar kût hmang

Aizawl | September 3, 2022: Thingsai leh a chhehhvel khaw tlangdung chuan vawiin khan Thlai Thar Kût ropui takin an hmang hlawm.

(He website kal zel theih nan hian fakna lo langte hi i lo hmet ve thin dawn nia.)

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Thlai thar kut hi ni 08.09.1956-ah hman ṭan niin, thlai thar läwm inkhawm erawh hemi hma ni 16.08.1947 aṭangin neih a lo ni tawh.

A chunga tarlan tâk ang hian Fanai tlangdungah (Thingsai khua leh a chhehvel) hian hmanlai hun aṭangin Thlai thar kut hi September Inrinni hmasa bêrah an hmang ṭhîn a. Bualpui H (Thingsai khua aṭanga chhim lam kms 8) hi Thlai thar kut hmang hmasa bêr khúa nia hriat a ni.

An hman chhan, a lo chhuahna bul chu - September hi kan hriat angin Mìmkut thla a ni a, zu nên sa nena hun hmang ṭhîn an ni a, ringtu hmasate kha khawvel lamah an kir leh fo mai a, chu an kut do lêt nan chuan an thlai tharte mitthi puala chhiah lo vin Pathian tána pek ve duhna a lo awm a, kut sate zawngin chutiang chuan an lo hmang tan niin a lang.

Kan hriat angin thingtlanga chengte chu tlângram lo neia eizawng deuh vek an ni a. An thawhrim rah an sengkhawm theih ang angte pawh hi September chho hian lakkhawm tur a vul vanglai tak a ni ṭhîn a, a hun thuah pawh thlai thar kut hi a inhmeh em em a. Tun thlengin kohhran pawl bîk awm lo vin mahni lawina kohhran ṭheuh vah Thlai thar kut hi hlim leh hlung takin kum tin hman ṭhin a ni.

Fanai tlangdunga chengte hian thlai thar kut hi an la urhsun hle a, a hma aṭanga loin buatsaihin kut chawhmeh zawng ten an ramchhuak a, kut tukah chuan ni dang aia chawhmeh pawh ṭha khat turin an inbuatsaih a, an lo lama thlai tharte hemi ni hian Biak In-ah keng khawmin an lilam a, chu chu Pathian ram rawngbawlna sum pawimawh tak atan an hmang ṭhin. A chang chuan ruai te buatsaihin Inkhawm leh Pathian hming faka zaikhawm te'n hun an hmang ṭhin. He hun an hman aṭanga Kohhran/khawtlangah thlarau thianghlim pawl tharna/harhna te lo thlengin; hun rei tak tak (thlà khat dâwn) Pathian hming faka zaikhawma hun an hman kum a awm fo ṭhîn.

Fanai Tlangdung khúa zawng zawng - Thingsai, Cherhlun, Bualpui H, Khawhri, Tarpho, Aithur, Chawngtui, Ngharchhip, New Ngharchhip, Muallianpui, S. Vanlaiphai.