Ticker

10/recent/ticker-posts

School Education minister-in US State department hnenah Raltlante dinhmun hrilh

Aizawl | Sept 11, 2022: Nimin khan School Education Minister Pu Lalchhandama Ralte chuan Washington DC-a Department of State Office-ah kalin US State Department hotute chu Mizoram țhenawm Myanmar February 1, 2021 atanga sipaiten an awp hnua Myanmar atanga Chin leh a mi cheng dangte Mizorama an ratlan dan leh Mizoramin a lo dawnsawn dan a hrilh.

(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


Pu Lalchhandama Ralte leh amah tawiawmtute chuan Mizoram-in raltlante a lo mikhual dan te, sorkar, kohhran, tlawmngai pawl hrang hrang leh mipuiten an lo buaipui thu te an hrilh a. India danpuiin naupangte dikna chanvo a pek anga raltlan naupangte chu lehkha an lo zirtir dan te, zirlaibu te leh chaw chhun a thlawna an lo pek dan te an hrilh bawk a. Minister leh amah tawiawmtute chuan Chief Minister Pu Zoramthanga’n raltlan naupangte chu zirna pek a ngaih pawimawhzia te, hetih laia zirlai naupang lo pung chho zel leh mamawh sang zelah, chhawmdawlna tur hmanrua indaih tawk loh avanga harsatna awm te, Chief Minister-in India sorkar laipui thuneitute a hrilh thu leh an thawhpuina leh tanpuina pawh a dil thu te an hrilh bawk. 

U.S State Department thuneitute chuan Mizoram sorkar, kohhran leh tlawmngai pawlte leh mipuite chu Myanmar atanga raltlante an lo chhawmdawl danah te, zirna, khawsakna, ei tur leh damdawi lam thlenga an lo pe chu lawmawm an tih thu an sawi a. Mizoram mipuiten raltlante an dawnsawn dan chu lawmawm an tih thu an sawi. US State Department chuan central sorkar nena indawr tawnna an neihah Central leh Mizoram sorkar chu raltlante a tanpui kawngah an thawhpui theih thu an sawi bawk.


School Education Minister Pu Lalchhandama Ralte hi Pu Lalhmachhuana, State Project Director, Samagra Shiksha leh Pu Lalliansanga, Finance Controller, Samagra Shiksha te bakah US-a awm mek Zo Tum Hmung, Executive Director, Chin Association of Maryland (CAM) leh Matthew Wilch, Adviser CAM ten an tawiawm a. US State Department a thawkte hi Nicole R.Gaertner, Acting Director, Bureau of Population, Refugees and Migration/Office of Asia and the Near East (PRM/ANE)-in a hova, US State Department-a a thawhpui Mr Jackson C Dart, Burma Unit Chief, Bureau of East Asia, Mr. Robert W Ogburn, Director, EAP/MLS te, Mr. Thomas Carnegie Deputy Director for India, Bureau of South and Central Asia Affairs/India te, Ms. Meredith L. Houck, South Asia Program Officer, PRM/ANE leh Mr. Peter T Chisolm, India External Unit Chief ten an tawiawm a ni.

- DIPR


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
Post i hmuh dan

Post a Comment

0 Comments