BoxRec vangin Pro Fight Semi final sawn hla; Boxer Awpa Australia-ah

Aizawl | Sept 11, 2022: Tata Yodha 4x4 LPS Pro Fight semifinal khelh hun tura ruahman chu boxrec-a ziah luh tur a nih avangin sawn hlat a ni.

R Dengṭhuama Indoor Stadium, Mualpuiah September 23 (zirtawpnnni) leh 24 (inrinni) chhungin semifinal khel tura tih chu sawn tlai hretin, September 24 (inrinni) leh September 26 (thawhṭanni)-ah khelh a ni ang.

Khawvel puma professional boxing ziah luhna boxrec-ah inhnek turte ni thum chhung tal tar chhuah hman a ngai. Hei vang hian semifinal khelh hun hi chawlh a tam zawk theih nan sawn hlat a ni a, September 19 (thawhṭanni), 20 (thawhlehni) leh 21 (nilaini)-ah ruahman sa angin quarterfinal khelh a ni dawn a, September 30 (zirtawpni)-ah final a ni ang.

Pro Fight weight panga aṭangin fly leh bantam-ah second round khelh mek a ni a, feather-ah third round an zo hnai tawh a, light leh welter-ah round of 16 khelh mek a ni ve thung.

September 13, thawhlehni zanah chhunzawm a ni dawn a, a hmuna en tur tan ticket Rs 50-a lei a ngai tawh dawn. A tir zan 10 chhungin man chawi lovin a hmunah a duh apiang tan en theih a ni.

Hetih lai hian India super lightweight number one Vanlalawmpuia chuan zirtawpni zan khan awlsam takin Ṭhuamrodinga (Ramthar) a hneh a, quarterfinal a lut. Khuangthing boxer hi Australia-ah a fehchhuak zui nghal a, September 15 khian Nissan Arena, Nathan-ah Ty Telford nen an inhnek ang.

Kum 25 mi Awpa'n professional huangah vawi nga khel tawhin tlawm nei lovin ṭum li a chak a, zin kawng a zawh mekah chona hautak ber tur a ni tih a sawi.

Amah aia inchi hnih a sang, Australian kum 24 mi Telford hi feet nga leh inchi 10-a sang niin vawi sarih a chak tawh a, tum khat inhnehtawkin vawi khat a tlawm tawh a ni.

Telford nen Australia-a an inhnek zawh hnuah Awpa'n Pro Fight quarterfinal a khelh chhunzawm leh nghal dawn a, LT Mawia (New Champhai) nen September 20-ah semifinal luh inchuhin an inhnek dawn a ni.

- LPS