Aizawl | Sept 5, 2022: MZP chuan September ni 5, 2022 Teacher's Day lo thlengah hian thinlung takin zirtirtu zawng zawngte duhsakna a hlan thar leh a, an hma hun lokal zel turah Mizoram leh zirlaite tan thehnemngai taka an thiamna leh theihna hlan zel tura a duhin, Chumi tur atan malsawmna an dawn zel a duhsak takzet thu thuchhuah siamin an tarlang.
He hun lo thlengah hian zirlai zawng zawngte chu Zirtirtute hlut zia leh anmahni avanga lei rem rap thei kan nih zia hrethar leh turin MZP chuan a duh a. Zirtirtute chu ram roreltu, ram leh hnam tana mi ropui tak tak chher chhuaktu an ni a, khawvel mi ropuite phena ding zirtirtute chu hlamchhiah thianglo an nih zia te, ram mipuite pawhin zah taka chawimawi an phu zia hrethar leh turin MZP chuan a duh tak zet a. Zirtirtute Ni-ah hian kan tana an lo thawh tawhnate, kawng min lo sial saknate hre rengin MZP chuan chawimawina nopui a hlan nawn leh a ni.
MZP General Headquarters chuan, he ni pual hian Aizawl khawpui hmun hrang hrangah Zirtirtute Ni pual hian duhsakna thuziak a tar chhuak a. MZP President Pu Lalnunmawia Pautu chu St. Anthony Higher Secondary School buatsaih Teacher's Day hmanna Vanapa Hall-ah telin, thu a sawi a. "Zirtirtute hi Zirtirtute Ni-ah chauh zahna leh chawimawina kan lantir tur a ni lova, nitin an hnathawhna kawng hrang hrangah kan tawiawmin zahna kan lantir tur a ni. Kan hnam lungphum phumtu, kan hnam khawnvar an ni" a ti.
Pu Andrew F Lalramnghaka MZP Vice President pawhin MZP Sub Headquarters Ratu buatsaih Teacher's Day a hmanpui bawk.
Post a Comment
He post chungchanga i ngaihdan lo sawi ve rawh: