MZP-in hnam dang Nupui/Pasal nei lo tura inzirtirna ni hmang

Aizawl | September 2, 2022:  Mizo Zirlai Pawl (MZP) General Headquarters chuan Vawiin 2nd September 2022 khan kum tin a lo tih thin dan angin, “Mizo zirlaite tan hnam dang Nupui/Pasal nei lo tura inzirtirna Ni” chu Aizawl khawpui chhunga school hrang hrangah insem darhin Mizo zirlaite tan hnamdang nupui/pasal nei lo tura inzirtirna hun an hmang.

MZP President Lalnunmawia Pautu chuan, "Vawiin hian hnam dang nupui pasal nei lo tura kan inzirtir rual hian Mizoram chhunga hnam dang awmte inhuatna leh inhmuhsitna lam hawi zawnga inzirtirna lam pakhat mah MZP chuan a kalpui lova, a duh lo bawk." a ti a.

"Mahni hnam ziarang ṭheuh vawng him tur chuan mahni hnampui ṭheuh nupui pasalah nei ṭheuh turin leh inneih pawlh lo turin inzirtirna kan kalpui a ni." a ti.

MZP President chuan, "A bikin Mizote hi hnam tlem kan ni a, kan hnam a lo vula hnam ropui kan nih ve theihna turin kan Zohnahthlakpui ngei nupui pasala nei turin Mizo Zirlaite kan inngen a ni." a ti.

Hnamdang nupui/pasal nei lo tura inzirtirna hun hi MZP chuan kum 2015 atang khan kum tin 2nd September-ah a hmang thin a. Aizawl khawpui chhung school hrang hrangah hun hman a ni a, he hun hi zirlaite leh zirtirtu ten an hlut hle a ni.

Hnamdang nupui/pasal neilo tura zirlaite zirtirna Ni ah hian MZP hruaitute chuan School hrang hrang an tlawh kual a. Mizo zirlaite chu hnam dang nupui pasal neihin hnamah nghawng tha lo a neih theih dan leh chimral mai hlauhawm Mizo hnam tana a pawi theih zia hrilhhriat an ni a. Mizo hmeichhia hnam dang pasal nei chu an fate Mizo an nih theih loh dan leh Tribal ni lo pasal an neih phei chuan an fate’n tribalte hamthatna dawn tur ang an dawn ve theih loh thute hrilh hriat an ni.

MZP in a buatsaih hnamdang nupui/pasal nei lo tura inzirtirna ni hi Mizoram hmun hrang hrangah MZP bultumin neih a ni a, Mizo zirlaiten an hlut hle. MZP chuan hnamdang nupui/pasal nei lo tura inzirtirna hun tha tak siamsak tu school hrang hrang thuneitute chungah thinlung takin lawmthu a sawi tak meuh a ni.