"Myanmar ram buaina ching fel turin India sawrkar tanpuina a pawimawh ber thu," CM-in President sawipui

Aizawl | Sept 24, 2022: Mizoram mamawh hrang hrang thlena New Delhi-a zin Chief Minister Pu Zoramthanga chuan vawiin chawhnu khan Aizawl lo thlengin, CM Conference Hall-ah thuthar thehdarhtute kawmna hun a hmang nghal.


Chief Minister in Delhi a zin report tlangpui a pe a. Sept 13 atanga Sept 24 inkarah Mizoram Chief Minister Pu Zoramthanga chu Delhi ah zinin President, Prime Minister, Home Minister, Defence Minister, Finance Minister,  Education Minister, Health Minister, Social Empowerment Minister, MoRTH Minister, NSA, Director of Intelligence Bureau, Principal Secy to Prime Minister, Adviser to Prime Minister, Home Secretary, Foreign Secretary, ADB Country Director, Taiwan Ambassador, India Brazil Chamber of Commerce leh Defence Analysis Group te bakah Assam Chief Minister nen inkawmna tha tak an nei bawk.


Prime Minister leh mi pawimawh dangte a hmuhnaah hian Myanmar ram buaina ching fel turin India Sawrkar tanpuina a pawimawh ber thu leh tunah chuan kawng awmchhun pakhat nia hriat a nih thu a sawipui a. India sawrkarin pa chan changa a bul tanpui turin a ngen a. India President Pi Droupadi Murmu pawhin a ngaihpawimawhzia lo sawiin Prime Minister pawh sawipui ngei a tum thu a lo hrilh a. Hei bakah hian kawng chi dang te pawhin Chief Minister hian hma a la zui zel bawk a ni.

Home Minister Pu Amit Shah chu Mizorama lo zin turin a sawm a. Home Ministry-in Assam Rifles Headquarter thar tur, Zokhawsanga a sak zawh chu amah Home Minister ngeiin rawn hawng tura a sawmna chu pawm sakin, November 2022 ah lo zina rawn hawn ngei a tum thu Chief Minister hi a lo hrilh a. A tahrik ni tak erawh chu a remchan hun enin, Mizoram Sawrkar a la rawn hriattir leh tur thu a lo hrilh.

Health Minister Pu Mansukh Mandaviya nen an inkawmnaah sawrkar laipuiin ZMC enkawl a, State tam taka an tih dan anga hma la tura rawtna (proposal) Mizoram Health Department-in an thlen chungchang thu chu hrilhin, Health Minister chuan a hlawhtlin theih ngei nan theihtawpa hmalak a tum thu a lo hrilh a. Hemi bakah hian Zemabawka Cancer Hospital-a hman tur khawl lei nan Mizoram Health Department-in an dil Vaibelchhe 10 chu lo pek a tum thu a sawi bawk.

Finance Minister Pi Nirmala Sitharaman a hmuhnaah Pi Nirmala-i chuan Mizoram tan a bika theihtawp a lo chhuah thu Chief Minister chu lo hrilh in, a tul anga tanpui zel a tum thu a lo sawi bawk a. India sawrkar hian an sum dinhmun a zirin nakum 2023-2024 ah pawh hian Special Assistance (SASCI) siam an tum leh ngei rin a nih thu a lo hrilh bawk.

Minister of Education and Minister of Skill Development and Entrepreneurship hmuhnaah Chief Minister chuan Lungleia MZU Southern Campus din tum chu Mizoram Sawrkarin sum leh pai tum lova, India Sawrkarin a rawn tum theih nan HRD Minister hi a sawipui a. Ani pawhin awm a tih thu leh a hlawhtlin nan theihtawpa hma lo lak a tum thu a sawi bawk.

Asian Development hotu Country Director nen an inhmuhnaah Mizoramin Healthcare atan Vaibelchhe 1000 an dil, India Sawrkarin phalna a pek tawh process mek chu a chak thei ang bera hma lo lakpui an tum thu Chief Minister hi a lo hrilh a ni. 

MNF Returnee te in sakna tur tanpuina dil thu pawh Prime Minister leh Minister pawimawh dang te Chief Minister hian a sawipui a. Lehkha lo thehluh tawh process mek te chu an theih ang tawk a lo umzui an tum thu an lo hrilh bawk.

Assam Chief Minister Pu Himanta nen an inkawmnaah ramri buai chinfelna tura official te leh minister team ve ve ten hma an lo lakna chu lawmawm an tih thu an sawi a. Inremna siam ngei tura inbiakna hi neih zui zel ni se la, a tul angin Chief Minister te pawh inhmu zel se an ti a. Kuhva chungchang thuah, dan lo anga India hmarchhaka kuhva ro lo lut te chu theihtawpa dan ni se la; chutihlaiin mipui te thar chhuah kuhva hralh leh phurh velna chu tibuai lovin Sawrkar ve ve ten chak takin hma la zui se an ti bawk.

Heng zawng zawng bakah hian mi pawimawh dang a hmuh te nen hian thil pawimawh tam tak Mizoram tana hmalakna tur tam tak a sawipui bawk a ni.

Vawiin Press Conference-ah hian Chief Minister chu Deputy Chief Minister Pu Tawnluia, Information & Public Relations Minister Pu Lalruatkima leh Adviser to CM Pu C. Lalramzauva te'n an tawiawm a ni.





(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

He post chungchanga i ngaihdan lo sawi ve rawh:

Previous Post Next Post