EF&CC Minister Conference-ah EF&CC Minister-in Mizoram dinhmun tlangpuite tarlangin mamawhte thlen

Aizawl | Sept 24, 2022: September ni 23-24, 2022 chhunga National Conference of Ministers of Environment, Forest & Climate Change, Ekta Nagar, Kevadia, Gujarat-a neihah Mizoram EF&CC Minister, Pu T.J. Lalnuntluanga chuan vawiin khan Mizoram dinhmun tlangpuite tarlangin mamawhte a thlen.


Mizoram Sawrkar EF&CC Minister Pu T.J. Lalnuntluanga chuan thuneitu sang zawkte chu Mizorama ecology leh economy than dan ngaihtuah chunga uluk taka enpui turte, green clearance buaipui chhung tirei lo tur leh tifel hma turin a ngen a. Bawlhhlawh sawngbawl kawngah Sawrkar laipui nena thawhho a tul thu sawiin, plastic chhiate chu State dangte ang bawkin Mizoramah pawh buaipui a nih thute, Department dang buaipui mah nise, a endik leh phalnate chu pollution ang emaw, EFF&CC hminga pek angaih thin avangin plastic chhia sawngbawlnate endikna kawngah hmanrua leh thawktu tih tam angaih thu a tarlang a, Sawrkar laipui nena thawhho a tul thu a sawi bawk. 


Pu T.J. Lalnuntluanga chuan Ramsar site atana Pala Wetland puan a ni chu lawmawm a tih thu sawiin, Tam Dil Wetland chu Ramsar site atana  puang leh turin a dil a. Wildlife chungchangah Wildlife Sanctuary chauh ni lova duty tur mamawh a nih thute a thlen a. Ramri depa awm kan nih avangin nungcha tawlhruk leh dan lova sumdawnna a tam a, sahuanin dan neuh neuh a neih avangin nungcha tawlhruk mante dahluh mai a remchang lo a, Rescue Centre tur atan Sawrkar laipui puihna mamawh a nih thu a thlen bawk a. Hemi bakah hian Agroforestry kaltlangin Mizorama kuthnathawktute hmasawn nan leh economy tihsan nana hma lak sak turin a ngen bawk a ni.


He conference hi Union EF&CC Minister Pu Bhupender Yadav chuan kaihruaiin Minister of State Pu Ashwini Kumar Choubey chuan a telpui bawk a, PM Narendra Modi pawhin Video Conference kaltlangin a telpui bawk a ni. 

He hunah hian sik leh sa inthlak danglam Climate Change chungchangte, Forest Clearance chungchangte, Wildlife Management chungchangte leh Plastic Waste Management chungchangte sawiho niin, EF&CC Minister Pu T.J. Lalnuntluanga thu thlente hi APO ah telha  a theih anga hmalak a nih tur thu he hunah hian tarlan a ni. 

Ni 2 awh National Conference of Ministers of Environment, Forests & Climate Change, Ekta Nagar, Kevadia, Gujarat-a neihah hian Mizoram Sawrkâr aiawhin Forest Minister Pu T.J. Lalnuntluanga leh Pu R.K. Singh, PCCF leh Pu Rosiama Vanchhawng (IFS Rtd.), Chairman, Mizoram Pollution Control Board-te an tel a ni.




(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.) 

Post a Comment

He post chungchanga i ngaihdan lo sawi ve rawh:

Previous Post Next Post