(Queen Elizabeth ll thlahna )
🖊️Remmuana Chawngthu📒
Kumpinu zet chu:
Ni tla seng lova roreltu an tih ṭhin, an lalna ram chhungah ni a tla hman lo, ram khatah ni a tlakin, ram thenkhatah ni a lo lang leh hman ṭhin a ni awm e. Mahse, kumhlun lo tur kan nih tichiangtu pakhat chu hei pawh hi a lo ni. Kum 70 zet British ram ropui taka lalnu dinhmun luahtu Queen Elizabeth ll lei taksa chu Sept 19, '2022 hian vui liam a ni ve dawn ta reng mai.
Kum 1926 a piangin, 1952 aṭangin lalthutthleng luahin, kum 70 zet he dinhmun a luah hnuah thihna kut vawtin a man ve miau a, tun dinhmun a thleng ve ta a nih hi.
A pian kum aṭanga a lalthutthleng luah inkar bawr chho vel hi, kan rama Zosap Missionary engngemaw zatte an la awm lai a ni awm e. An lalna ram chhunga Pathian mi tirh ten kan ramah hna ropui lo thawkin, hmasawnna kawng tinreng kan zawhna bul min ṭansak hi a hlu viau a ni.
Thlahna pangpar:
Social mediaah kan hmu a, Mizo hmeichhe zaithiam tak mai, Daduhi'n lalnu thlahna pangpar dahin, a thuziakah Mizoram,India rama cheng tan channa nasa tak a ni tih chiang takin a tarlang tel a (Condolences from all of us in Mizoram,India). Ka rilru-ah thil tam tak lo lang nghal a awm a. British partition hunlaia lalnu ropui ber tih theih tur thlahna pangpar nalh tak tak kara Mizoram hming a lang ve hi a lawmawm ve angreng.
Pathian ṭihmi:
Thuhriltu ropui tak mai, Billy Graham khan heti hian a sawi a, _"Buckingham Palace, Winsor castle- England, Balmoral castle- Scotland te ka tlawh tawh a. Heng a chennaah te hian Pathian biakna (Chapel) a nei vek a, Lalnu hian Pathianni apiangin Pathian pawlna a nei ziah ṭhin a, ni tin a ṭawngṭai ṭhin. A tet lai atangin Kristian nun mumal tak, Archbishop of Canterbury aṭangin a dawng ṭhin. Rinnaa nghet taka ding-mi a ni tih amah kawmtute chuan an hre thei a ni.."_ tiin.
A thih thu khan darkar pawh a ral hmain, khawvel ram pumpui a fan chhuak a, ram hruaitu zawng zawng deuhthawin uina thu an sawi a. Chu bakah, Bible Society leh rawngbawltu lar tak tak ten sunna thu an ziak bawk, chung zingah chuan Franklin Graham pawh a tel.
Keini Mizote chuan:
India lunghlu Kohinoor leh India hausakna tam tak a neih thute chu theihnghilh chuang loin, chu ai mah chuan; an lalna ram chhunga Pathian mi tirh (Kan Zosap Missionary ṭhenkhatte) te avanga Pathian zara tun dinhmun kan thlen thute hi hre reng leh zual ta ila a ṭha awm e.
Westminster Abbey, (Lal chhungkaw lawina kohhran)-a ropui taka a lei taksa an vui liam rualin, an rama Bristish mihrâng, Pathian tirh ni bawk ten khawvel ram hranga, tunhmaa Chanchin ṭha an puan nasatzia te pawh i hre tel teh ang u..
'GOD SAVE THE QUEEN'
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: