Ticker

10/recent/ticker-posts

Durtlang kham-ah Truck tlan liam; a khalhtu boral!

Aizawl | Sept 19, 2022: Vawiin chhun dar 12 vel khan Durtlang kham-ah SML Isuzu Truck a tlan liam a, a khalhtu a boral!

Truck khalhtu hi Pu Lalrintluanga (35) s/o Vanlaltlana Durtlang Kawn veng niin, a hmunah a boral, niin thudawnna chuan a tarlang.



Thudawnnain a tarlan danin, Pu Lalrintluanga hian rawra phurh tumin amahin Durtlang atangin Phunchawng veng a pan a, a kal lam chu Durtlang kham kawng chhuk, tunhma lama waiting shed awmna thlang kawng kual laiah a tlan liam a, motor hi a lum thui hle. A motor lum thlakna laihawl velah Pu Lalrintluanga hi hmuh a ni a, chhanchhuahna hna thawktuten an hmuh hian a lo chatthla fel tawh niin an sawi.


Pu Lalrintluanga ruang hi lakchhuah a nih hnuah Durtlang Leitan YMA hall-ah lakluh niin police lamin inquest te an ti a, a ruang balte silfai niin a thawmhnaw thlak a ni a, Durtlang Leitan branch YMA ten a kuang tur an tum sak thlap bawk. A ruang hi zaninah an chenna in Durtlang Kawn vengah tlaivarpui a ni anga naktuk lamah postmortem tih a nih hnuah thlanmual lamah vui liam a ni ang.



Pu Lalrintluanga hian a nupui Pi Lalengkimi nen fa pahni hmeichhia leh mipa naupang te te an nei a, an inpui Durtlang Kawng vengah a pa te nen an la cheng ho a ni.

Durtlang khamah motor a tlan liam-ah hian vanduaina tawkte buaipuitu ni chuang lo mipui pungkhawm an tam avang leh an lirtheite kawng sir tawn tawna an dah avangin traffic a jam nasa hle.

- With input from MSR




(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments