Ticker

10/recent/ticker-posts

Dy CM-in Sailam Water Supply Scheme a hawng

Aizawl | Sept 23, 2022: Mizoram Deputy Chief Minister Pu Tawnluia chuan vawiin khan Sailam Water Supply Scheme a hawng. Hawnna inkhawm hi Sailam Hall ah neih a ni a. Vice Chairman Horticulture Development Board Prof. F.Lalnunmawia, Aizawl South III bialtu MLA chu khualzahawm a ni.


Khuallian Deputy Chief Minister Pu Tawnluia chuan Sailam khua hi thingtlang khaw zinga chhum lo chat lo, darkar 24 chhunga tui hnianghnar taka dawng thei khua an ni a, sawrkar laipui pawhin a chhuang a, khaw entawntlakah a puang a ni, a ti. Hnianghnara tui an dawn theihna atana Sawrkara thawktute, khawtlang mipui din WATSAN Committee te an pawimawh em em a, an thahnemngaihna avangin vawiin program hi a kan hmang thei a ni, Deputy Chief Minister chuan a ti a. He khuaah hian mi tinin ni khatah litre 62 zel tui an dawng thei a, kham khawp mai ni loin hman sen loh an dawng a ni, a ti. PHE changtu Deputy Chief Minister chuan Sanitation lamah tan la turin kalkhawm te a fuih a. Chet thianghlim, khaw dai tihfai, faina leh thianghlimna kawngah tan la leh zual tura chahin Mizorama khaw fai leh thianghlim ber nih tum turin a fuih a. PHE hian tui in tur thianghlim sem hna bakah faina leh thianghlimna a keng tel a ni, a ti. Thingtlang khaw in tina tui thianghlim pek chhuahna tur Sawrkar Laipui hmalakna JJM scheme hi India ram pumah kum 2024 ah zawh tura tih a nih laiin Mizoram chuan hma a lak chak em avangin 2023 kum tawpah an zawh theih an inbeisei thu a sawi bawk.

Bialtu MLA, khual zahawm ni bawk Prof F Lalnunmawia chuan Sailam Water Supply Scheme hawn a ni ta chu lawmawm a tih thu sawiin, department lama thawktu leh khawtlang mipuite thawhrimna leh inlungrualna vang a ni, a ti a. Pi leh pute suangtuah phak loh, khaw mawng atangin tui lak chhoh niin khaw mipui ten tui thianghlim, hnianghnar taka mahni inchhunga an dawng thei chu a ropui tak zet a ni, a ti. Sawrkar laipui scheme JJM in a tum chu a enkawl zui hna hi sawrkar kuta dah loin khaw mipui te kuta hlan chhawn a ni a, he scheme tihlawhtling hmasa thei khuaa Sailam an tang chu a chhuanawm a, Mizoram khaw dang te leh India ram chhunga khaw dang te tan pawha entawn tlak an ni, Prof F.Lalnunmawia chuan a ti.

Sailam khaw chawmtu tur Sailam Water Supply Scheme hi scheme pahnih hmanga thawh a ni a. Lengleh lui atanga khaw chhunga tui pump luhna hi NABARD sum hmanga thawh a ni a, nizung chakna Solar Pump hmanga lak a ni. He Solar Water Pump hi Lorentz company siam a ni a, solar module 51 a nei a, ni khatah litre 60,000 a pump thei a ni. NABARD sum hmanga hmalaknaah hian tui connection pek chhuah a ni lo a, public point 50 atanga tui pek chhuah thin niin August ni 27, 2019 khan thawh zawh a ni.

Chhungkaw tin hnena tui connection pek chhuah hi Jal Jeevan Mission hmanga thawh a ni thung a. Sum ruahman zat hi cheng nuai 18.727 niin chhungkaw 167 hnenah anmahni chenna inah tui connection pek chhuah a ni. Tui hi nitin darkar 24 chhung, chhun zan zawma herh haw theih renga pekchhuah a ni a. JJM hmalakna enzui tura Sawrkar Laipui atanga lo kal ten Sailam hi JJM hmanga tui pekchhuah kawnga khaw en tawn tlak, model village ah an ngai a ni. PHE hian Sailam Village Water and Sanitation Committee (VWSC) kutah October ni 10, 2020 khan a hlan a, vawiin thlengin tui hi englai pawha herhhaw theihin an la dawng reng a ni.

Sailam Water Supply Scheme hawnna programme hi Er.Lalmuanzova, Secretary, Public Health Engineering Department chuan a kaihruai a. PHED Sr.EE Pu H.Lallianmawia’n technical report a pe a. PHED SE Er.Lalrammawia’n lawmthu sawiin hun hnung a khar a ni.



(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments