Ticker

10/recent/ticker-posts

Health minister-in Kolasib-ah khum 100 awmna damdawi in lungphum a phum

Aizawl | Sept 23, 2022: Health minister Dr. Lalthangliana chuan vawiin khan North East Special Infrastructure Development Scheme hmang a khum 100 awmna Kolasib District Hospital thar sakna tur lungphum a phum a. Pu K.Lalrinliana, Minister of State, Food, Civil Supplies & Consumer Affairs Department, Kolasib Assembly Constituency bialtu MLA ni bawk chuan tawiawmin Pi Esther Lal Ruatkimi, IRS, Principal Secretary, Dr. T.Lalhmangaihi, Principal Director leh Health & Family Welfare Department-a thawktute an tel bawk a ni.


Minister Dr. R.Lalthangliana chuan Kolasib district chu State luhkapui a nih angin District Hospital pantu pawh an thahnem thu a sawi a. Mipui hriselna enkawl kawnga hmasawnna hnathawh hrang hrangte tarlangin Kolasib district chhunga Health Centre, Health & Wellness Centre-a hlankai ngai zawng zawngte chu a tak a kalpui vek a nih tawh thu a sawi. Hrileng vanglai a rampawn atanga tangkhang rawn haw buaipui kawngahte, ramri a hri vei endik hna kalpui kawngahte leh dam lo enkawl kawngah Kolasib district-a sawrkar hnathawkte leh mipui thawhhona fakawm a tih thu Health Minister chuan sawiin khum 100 awmna Hospital thar sakna tur ah pawh thawhhona boruak tha tak kar a kalpui zel turin a chah.


Health & Family Welfare Department-a thawktute chu mipui hriselna enkawltu leh dam lote damna thui tak an kuta a innghah tlat avangin hna pawimawh berte zing ami a nih thu a sawi a. Eizawnna danga thawktute aiin inpekna thinlungpu chunga hnathawh a pawimawh thu leh dam lo enkawlna kawngah pawh hmel hmuh nuam leh tawngkam tha ui lo turin a chah bawk a ni.


Minister Pu K.Lalrinliana chuan 100 Bedded Hospital thar sakna tur a Health Minister hmalakpuina chungah lawmthu sawiin kum 1896 khan khum 4 awmin bul tan a nih dan te, 1978 ah khum 30 awmin kum 1998 khan khum 60 awm theihnaah hlankai a nih leh dan te a tarlang a. Aizawl, Lunglei leh Siaha dawtah Kolasib district-in khum 100 awmna District Hospital an nei tur chu lawmawm a tih thu sawiin Health Clinic thar thahnem tak sakna turin hmalak mek a nih thu a sawi bawk a ni.


Pi Esther Lal Ruatkimi, Principal Secretary chuan kalkhawmte lawmna thu a sawi a, Pu John LT Sanga, Deputy Commissioner, Kolasibin thusawina hun hmangin Dr T.Lalhmangaihi, Principal Director-in lawmthu sawina hun a hmang bawk a ni.

Khum 100 awm theihna Hospital hi NESIDS hnuai a Cheng nuai 1859.87 hmang a sak tur a ni a, hnathawh hun chhung tur hi thla 24 a ni. Motor hunna tur Basement, Ground Floor bakah chhawng thum a awm dawn a, mi 13 chuan theihna Lift dah a ni dawn bawk a ni. Hospital sak hna hi M/S VRC Constructions (I) Pvt Ltd, New Delhi-ten an thawk dawn a ni.


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)
Post i hmuh dan

Post a Comment

0 Comments