Ticker

10/recent/ticker-posts

Vairengte leh Sairang inkar kawngpui laih tura ram neitute'n zangnadawmna pek thuai phut

Aizawl | August 17, 2022: Vairengte leh Sairang inkar kawngpui lirthei pali inpelh theih tura laih zau tum meka kawngpuiin a paltlang tur, ram laih chhiat tur ram neitute chuan zangnadawmna pek thuai an phut.


Vawiin khan kawngpui laih zauh tura ram neitu inzawmkhawm pawl (Land Owners Association) hruaitute chuan Kolasib District MJA Press Club ah chanchinbumite an kawm a, he hunah hian NHIDCL in thla kalta July ni 13 a ram neitute hnena zangnadawmna (Compensation) pek tur Competent Authority for Land Acquisition (CALA), Kolasib District kuta pawisa an dah tawh tun thlenga sem ala nih loh avanga an lungawiloh thu leh pek thuai an phut thu an sawi.



NH-6 & 306 Land Owners Assn hruaitute sawidanin, an harsatna hi Mizoram sorkar hotute hnenah an thlen tawh a. Hemi hnu July ni 13 khan kawngpui laih zau hna thawktu tur NHIDCL chuan Kolasib District CALA (Kolasib Addl DC ni bawk) hnenah cheque in kawngpui laih zauin a tihchhiat tura ram neitute zangnadawmna tur a dah tawh thu an sawi a. Hetiang a ni chunga Forest department-in kawngpui atanga meter 800 huam chhung an ram ni a an hauh avanga Compensation an lak tur, an chanpual tur hren sak an ni chu an lungawiloh thu an sawi a ni.


Ram neitu pawl hruaitute chuan harsatna an tawh mek chu sorkar in chinfel sak thuai se an duh thu an sawi a. NHIDCL in Kolasib District CALA hnena compensation tur pawisa a dah tawh chu tun thla ni 4 khan Revenue Deptt chuan sem phalna an rawn pe tawh niin an sawi a, hetiang a ni chunga an hmalaknain awmzia a neilo a nih chuan na zawka hmalak an hreh dawn loh thu an sawi a.  Four-Lane kawngpui laih tur, 3 - 6 Package huam chhung Vairengte leh Sairang inkarah hian ram neitu mi 1,735 an awm a, heng zingah hian Revenue pass nei mi 626 leh VC pass nei mi 1109 an awm a ni.

Press Conference an neih zawh hian an member kalkhawmte chu Kolasib District MJA Press Club kawtah pungkhawmin Resolution an pass a, an au-rual hnu ah Press Club atanga Diakkawn, DFO office peng thlengin kawng an zawh a, an Resolution chu Kolasib DFO Pi Margareth Lalramchhani hnenah ziak in an thehlut a ni.
- AIR News Aizawl
Post i hmuh dan

Post a Comment

0 Comments