Ticker

10/recent/ticker-posts

Tourism Minister-in Mizoram Tourism Start-Up Fest & Competition 2022 hawng

Aizawl | August 17, 2022: Tourism Minister Pu Robert Romawia Royte chuan vawiin khan SAD Conference Hall-ah Mizorama a vawikhatna atan Mizoram Tourism Start-Up Fest & Competition 2022 a hawng.


He Kick-Off program-ah hian Pu Robert Romawia Royte chuan Tourism tih changtlunnan leh eizawnnana mi tam zawkin an hman theihnana kawngka pawimawh tak pakhat Mizoram la awm ngailo Start-Up Fest & Competition buatsaih a ni chu lawmawm a ti a. Tourism Department chu department thawktu tam tak awmna nilo mah se, Mizoram Tourism tih hmasawnnan hna nasa takin an thawk a, thawhona tha chuan rah tha a chhuah zel a, Mizoram chu India ramah Responsible Tourism Policy mu mal taka nei hmasa ber state a ni, a ti a. Mizoram chuan bungthar kaiin, Tourism Industry a eizawnna neitu te tan leh mimal sumdawng (enterprise) te tan rahbi nghelnghet leh rintlak tak, inkaihhruaina leh kalphung dan leh hrai kimchang leh awmze nei Policy tha tak, sawrkarin a chhawp chhuak tawh a ni, a ti a. Hei hian eizawnna a hmang tur leh hmang mek te tan kawng mumal tak sial sakin, hun lo la kal zel turah pawh ko ri a tu ang, tiin a sawi a. Vawiin a Competition kick off hi thalai lehkhathiam, leh mi hmangchang hria te kohna-ni se, Mizoram in Tourism Industry a hma a lo sawn zel nan leh tourism hi eizawnna tlak leh sumdawn tawn nana mi tam takin kan hman zel theihnan danglamna lo thlen se, Mizoram-ah Tourism Service Providers an indaih lohzia hre reng chungin he intihsiakna hian mi tam tak chawhphur bawk se tih chu a duhthusam leh a beisei a ni tih sawiin, competition a tel zawng zawngte duhsakna a hlan a ni.


Pu TC Pachhunga, Vice Chairman, Tourism Development Board pawh in he hun hi hmanpui in, Minister rem hre tak Tourism Department-in a nei chu an vannei tih thu a sawi a, he competition hian hmathar lak kawngah sawrkar ti chaktu leh tourism lama tui mite tana inphochhuah theihna tha leh business model tha tak duan chhuah kawnga sulsu tu, bul tan tir tu ni se a duh thu leh tel zawng zawngte duhsakna sang ber a hlan thu a sawi.

He hun hi Pu V. Lalengmawia, Joint Secretary in a kaihruaia, Pi Manisha Saxena, Principal Secretary hnen atangin thusawi tawi ngaihthlak a niin, Pu Saitluanga Director Tourism Department chuan lawmthu sawiin he hun hi a khar a ni.

He Competition a tel duh tan September ni 14, 2022 thleng Business Plan hi Tourism Department-ah thehluh theih a ni a. Business plan hian Mizoram Responsible Tourism Policy 2020 nen a in zulzui tur a ni. He Start-Up Fest & Competition in a tum ber chu thangthar te tana eizawnna ngialnghet ah bultanna an neih theihna tur a ni a, lawmman hi pawisa faiin pakhatna in Rs. 1,50,000/- bakah Trophy leh Certificate a dawng ang a; pahnihna in Rs. 1,00,000/- bakah Trophy leh Certificate; pathumna in Rs. 80,000/- bakah Trophy leh Certificate an dawng ang. Consolation Prize mi pahnih tan Rs. 50,000/- an dawng dawn a ni.

September ni 27, 2022 ‘World Tourism Day’-ah Result hi puan a ni ang a, lawmman pawh sem nghal a ni ang.


- DIPR
Post i hmuh dan

Post a Comment

0 Comments