Ticker

10/recent/ticker-posts

PATHIAN ṬHIAN NI TURIN, A NGAIHSAN ZAWNG TE NGAISANG VE RAWH

 Inlaichinna Ṭha

PATHIAN ṬHIAN NI TURIN, A NGAIHSAN ZAWNG TE NGAISANG VE RAWH

— Rick Warren 

— 9 Aug, 2022



“Ṭhenkhatten thil pawimawh ber rinna kawng chu an kal kawisan ta a. Pathian an hre ta lo” 1 Timothea 6:21 (TLB)

Pathian nena in inṭhianna bul chu tu ṭhian nge i nih duh tih aṭangin a inṭan a ni.

Mi zawng zawng hi i ṭhian ni turin hun i nei lo. I ṭhian ṭha ber ni turin tu nge i duh tih kha i thlan phawt a ngai a ni.

Bible-in 1 Timothea 6:21 ah, "Ṭhenkhatten thil pawimawh ber rinna kawng chu an kal kawisan ta a. Pathian an hre ta lo” a ti.

Baseball khelh dan zawng zawng an thiam a. Stock market-a an ṭawngkam te an hre hlei hlui. Top 10 hla te pawh an hre bel narawh e. Soap opera lamah tunge lut leh chhuak tih pawh an hre deuh vek a. Mahse  Pathian an hre lo a ni. Hringnuna thil pawimawh ber chu an hmaih ta!

Pathian ṭhian i nih loh chuan, ngaih pawimawh zawk thil dang i nei tihna a ni. Jakoba 4:4 chuan, “Khawvel ṭhian nihna hi Pathian hmelma nihna a ni tih in hre lo vem ni? Chutichuan tupawh khawvel ṭhian nih duh apiang chuan Pathian hmelmaah a insiam thin a ni” a ti (NCV).

Jakoban “khawvel hmangaihna,” chu he khawvel thil ngaihsanna hi a ti a. Pathianin mi dang hmangaih turin min duh a, chumi awmzia chu he khawvela an ngaihsan thil te hi ngaisang rawh u min tihna a ni lo.

Hringnunah hian thil danga inham tan hi awl tak a ni. He khawvel thilte i ngaihsan zawk chuan, mi dang hmangaih chu a lang thei kher lo vang. Chung ai chuan, he khawvel thil lama inchhek chu i duh zawk a. Nawm chen i duh a. Lar i khel bawk a. Hmingthan i duh a. Phurna sang tak, nihna neih leh thil neihtam te i duh a ni.

Mahse Pathian chuan a mite a hmangaih a. Nangpawhin hmangaih ve turin a duh che a ni. Mi dang i hmangaihna lantirna kawng khat chu an tuina ang va tuipui ve hi a ni. Chumi awmzia chu, i tana pawimawh chu ka tan pawh a pawimawh tawh tihna.(hei hi Bible aṭang pawha pawimawh a ni).

Chu chu Pathian hmangaihna i lantir dan pawh a ni. Pathian ṭhian i nih dawn chuan, a ngaihsak zawng te ngaihsak la, a ngaihsak loh zawng te chu bansan ve ang che. Pathian chuan i anpui a ngaihsak lo va. I nihna te pawh a tuizawng a ni hek lo. I nungchang erawh chu a ngaihsak hle mai— i lan dan ni lovin tunge i nih tih zawkah khan a ni.  

Pathian ṭhian ni turin a takin hna i thawk ngam em? A ngaihsan zawng te chu ngaisang ve ang che.

Ngaihtuah zui atan

* Pathian ṭhian i nihna engin nge dal che? Chung daltu che chu ti kiang turin engtin nge i inthlak danglam ang?

* Pathian hriatna aia thil ngaih pawimawh zawk i neih kha eng nge? Eng vangin nge chu chu i ngaihsan zawk?

* I ṭhian ṭha ber nena in inṭhian dan han sawi teh. Engtin nge Pathian nena in inṭhian dan nen i khaikhin ang?

* Pathian ngaihsan zawng i hriat eng te nge? Chungte chu i tan eng anga pawimawh nge an nih?

*I nunah Isua i thlang tawh em?*

Bible chuan Fapa Isua kaltlanga Pathian rinna chauhin vanram a luh theih a ti a. Nangma hlawhchhuah theih a ni lo tihna a nih chu. “Rinna avanga khawngaihnaa chhandam inni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e.” Ephesi :8-9. 

I sualna te i puang duh a niha, i nunah Isua i thlang duh a nih chuan, heti hian ṭawngṭai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtik niah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i ṭawngṭai a nih chuan, Rick@PastorRick.com ah hian email min lo thawn la. Isua nena zinkawng i zawhṭanna atana pawimawh te a thlawnin ka lo thawn ang che.

*[Lettu: Sangpuia]*

Post i hmuh dan

Post a Comment

0 Comments