Aizawl | August 28, 2022: Vawiin chawhnu dar 2:30 khan Noida 's Sector 93A a building ding țhiang a san zawng pawh 100 metre dawn lai chu Supreme Court thu pekin hian bomb chak tak hmanga bomb chim a ni a, hei hi India ram chhunga In ding bomb chhiat zinga lian leh hau tak ber a nih avangin India ram chanchinbu lian leh Television channel tam tak te chuan an ngaihvenin an ziak nasa hle hlawm a, news channel lian ten an chhuah chuai chuai.
Nikum August 2021 ah tawh khan Supreme Court chuan he Supertech building ding țhiang țhiahna tur thu hi chhan tam tak avangin a lo chhuah tawh a, chung zinga țhiah leh tih chhiat hial ngaihna lian zingah chuan he building sak hian in hlat dan tur a zawm lo (construction violated the minimum distance requirement) tih a ni.
He Supertech twin towers hi Noida khawpuia awm niin 'Emerald Court project' tih a ni bawk. Hetianga Supreme Court thu peka bomb chhiat/chim a nih hian Supertech building satu te'n cheng 1,000 crore vel tal an hloh dawn nia chhut a ni a. Bomb chhiatna senso atan hian Rs 20 crore vel hman tura chhut a ni.
He in chhawng ding țhiang hi (the twin towers) an hming atan Apex and Ceyane te phuah a ni. Noida chhung Sector 93A a awm a ni. Building pakhat zawk san zawng hi 103 metres (339 feet) a nih laiin a hniam zawk hi 97 metre (320 feet) a sang a ni bawk. He building pahnih bomb chak tak hmanga phin chim rup tur hian explosive 3,700 kg hman tur a ni. Explosive hi Palwal (Haryana) ațanga lak a ni, dynamite, emulsions and plastic explosives te inchawhpawlh a ni. 'Controlled implosion techniques' hmanga bomb tur a nih avangin building bomb chhiat thil vel te chu perdarh miah lo tur a nih laiin khu nasa tak (big smoke) erawh a chhuak nasa thung.
He an bomb dan hi 1773 khan Holy Trinity Cathedral, Waterford, Ireland bomb chhiat nan hman lo nintawhin, puak thei thil kg 68.04 hman a ni. India-ah chuan 2020 khan hman niin, Kochi Madurai-a luxury waterfront apartment pali, Vembanad Lake hmaa awm chu 'Coastal Regulation Zone regulations' bawhchhiat vangin tihchhiat nan hman a ni a. Hetiang bomb chhiat dan hi Lei, Tower, lei verh te bomb nan te hman thin a ni.
He in chhehvel, he in atanga teh a metre 500 bial (radius) chu 'exclusion zone' ah puan niin, mihring leh ran tan awm phal a ni lova, in tihchimna tura thawktute bak awm hman a ni lo.
Hemi bakah hian Police, National Disaster Response Force, ambulance pariat leh fire tender pali chhawp a ni.
In tihchhiat chhan tam tak zingah, plan ennawn a ni a, twin towers dah a ni a, chu chuan awm tura duan 'huan' chu hnawlin, in leh in inkara hmun ruak awm tur ang, dana awm chu a bawhchhia a ni.
Mumbai khawpuia awm Edefice Engineering Company & South Africa Company țangkawpin bomb darh hna hi an thawk.
He building hi Noida a ‘Supertech Emerald Court’ housing society in kum 2004 sa tura rawtna a lo thlen tawh niin The Noida Authority chuan chumi sakna tur chuan ram Plot No 4 Sector 93A ah 48,263 sq metres a pe a. Noida Authority in kum 2005 a Emerald Court building sak a phalsak chu chhawng 14 leh ground floor a ni. June 2006 ah he in sakna tur ram zau zawng chu 54,819.51 sq metres ah tihpun a ni a, chhungkaw khat chenna tura ruahman sa pawh zauh hret a ni.
Kum 2012 ah chuan Noida authority chuan ruahmanna awmsa chu siam țhain chhawng 40 ni turin an ti leh a (the twin towers was fixed at 40 floors).
Outlook in a tarlan dan chuan Supertech Limited te twin tower sakah hian chenna in flat 900 chuang a awm a, flat hrang hrang bedroom 3, 4, 5 nei te chu a man pawh Rs. 1 - 3 crore a ni.
Supreme Court thu tlukna chu he in saka chenna in leitu (home buyers) zawng zawngte hnenah Supertech Limited hian an in leina sum chu a pung nen a rul leh vek tur a ni, a ti.
He in ropui tak hi dan tam tak palzuta sak pawh ni se bomb darh kher loin a satu Company hi sum tam tham tak chawitira Sorkar-in in nei lo mi chhumchhia chenna atan emaw thil dangah hmanzui mai awm tih ngaihdan chu Supreme Court chuan dan tam tak palzuta sak leh corruption inhnamhnawihna hi ding tlak a ni lo, tun hnu zelah hetiang hi a thlen tawh lohna turin a ti.
Dr. C. Sawmliana, Senior Principal Scientist, CSIR (Central Institute of Mining and Fuel Research) chuan amah leh a thawhpui te chu he building bomb darh (demolition works) hna thawh tur hi a him dawn em tih endik tura min ruat avangin theih tawp chhuahin kei leh ka team te chuan ngun takin kan endik a, chhiatna dang thlen thei a ni ang em tih leh a nghawng theih tur dang dang te pawh uluk takin kan zir a, chhiatna dang thleng lo tur leh him turah kan ngai" tih thu News9 hnenah a sawi.
Dr. C. Sawmliana hi Mizo pasalțha Zampuimanga tuchhuan thumna ngat a ni a. Zampuimanga fapa Chala a ni a, Chala fapa Zara (Sailozara) hi Sawmtea pu (a nu pa) a ni.
28082022
- Huna Kawlvawm
(Pu Huna Kawlvawm thuziak tlem siamrema dah a ni.)
Post a Comment
He post chungchanga i ngaihdan lo sawi ve rawh: