MZP buatsaihin Thu leh Hla kutpui 2022 hmang; ziaktu larte biangbiakna nei

Aizawl | August 23, 2022: Vawiin ni 23 August, 2022 (Thawhlehni) chawhma dar 11 khan MZP General Headquarters buatsaih 'Thu leh Hla kutpui 2022' ni hnih awh tur chu, a khuhhawnna hun Vanapa Hall-ah hman a ni a. He hun hi Dr. K. Beichhua Social Welfare Minister-in a hmanpui a, hun hnihna (chawhnu) hi Pu Lalchhandama Ralte School Education Minister-in a hmanpui.

Thu leh Hla kutpui hawnna hunah Dr. K. Beichhua chuan thu sawiin, Thu leh hla kutpui MZP-in a buatsaih chu lawmawm a tih thu a sawi a. "Ziak leh chhiar avangin kum 2000 kal taa Isua chanchin chiang takin kan lo hriat phah a, chhandamna kan lo chan phah a ni a. Chuvangin ziak leh chhiar hi a pawimawh takzet a ni" a ti a. 

Dr. K. Beichhua chuan, "Mi sawisel chiam chiam aiin, in fakna leh chawimawina hian mi a fuih phurin, mi a ti chak thin. Chuvangin, thu leh hla kutpuia MZP-in ziak mite tana hun a buatsaih leh, MAL book of the year dawng tawhte a chawimawina hian ziak mite a fuih nasa hle ang," a ti bawk. 

Chawhnu lam, hun hnihna hmanpuitu, Pu Lalchhandama Ralte School Education Minister chuan, "Zofate hi kan duh reng vang ni lovin, ram hrang hrangah thendarh in kan awm a. Ramriin min daidang mahse, thu leh hlain min phuarkhawm a ni. Ziak mite chu thi mahse, an thu leh hlate hian kum tam tak hnuah pawh mi thinlungah thu a sawi thin a ni" a ti a. Zirlaite leh thangthar hian lehkhabu chhiar i uar thar ang u, finna kailawn pawimawh tak a ni tiin zirlaite a fuih. 

Chawhma hunah hian ziaktu hrang hrang heng; Revd Chuaṭhuama, Pu C Chhuanvawra, Pu Lalhriata leh Pu Zirsangkima te kawmna hun hman a ni a. 

Chawhnu lamah hian ziaktu lar; Pu R Lalrawna, Pu B Lalhriattira leh Pu Lalrammawia Ngente-te kawmna hun hman a ni.

He hunah hian College hrang hrang leh sikul hrang hrang zirlaite an tel a. Zirlaite'n ziaktute zawhna an zawt a, a hlawkthlak an ti tlang hle. 

Heng bakah hian lehkhabu zuar leh ziaktu hrang hrang te'n mipui lei theih turin an lehkhabu ṭha tak tak an chhawp chhuak a. Naktukah pawh Thu leh Hla kutpui hi chhunzawm a ni ang a. MAL book of the year dawng tawhte chawimawina leh ziaktute kawmna hun hman leh a ni ang.