Ticker

10/recent/ticker-posts

Minister TJ Lalnuntluanga’n 'Ayush Aapke Dwar' a khar

Aizawl | August 17, 2022: State Medicinal Plants Board (SMPB) Mizoram, Directorate of Ayush leh College of Veterinary Sciences & Animal Husbandry, Selesih tangkawp buatsaihin vawiin khan Azadi ka Amrit Mahotsav hnuaia hmalakna peng pakhat, mi tinin ramhmul damdawi awlsam taka an neih theih nana an kawtkaia chhawpchhuah sak “Ayush Aapke Dwar” kharna inkhawm chu Selesiha Veterinary Sciences & Animal Husbandry College-ah neih a ni a. He hunah hian Environment Forests and Climate Change changtu Minister Pu TJ Lalnuntluanga chu khuallian a ni.




Pu TJ Lalnuntluanga chuan Mizoram chhunga ramngaw ah te ramhmul damdawi chi hrang hrang a tam hle a, EF&CC Department chuan ramngaw tichereu si lo a heng ramhmul damdawi te leh ramngaw atanga mihring mamawh mipuiin tangkai taka an hman theihna turin hma a la thin, a ti a. Pi leh pu atangin vawiin thlengin Mizo te chuan ramhmul damdawi chi hrang hrang tangkai takin kan lo hmang tawh thin a, heng damdawi kan neih te hi kan hlut thiam a, a chereu loh nana venhim hi kan mawhphurhna a ni, a ti. Damdawi dangte angin mihring taksaah nghawng tha lo a neih ve loh avangin ramhmul damdawi hi khawvelin a uar telh telh a, hun lo kal zelah hei aia nasain kan la uar chho dawn tih a hriatthiam theih a, ramhmul damdawi kan hman mek leh kan la hmelhriat loh te thlenga tam tak awm khawmna kan ram ngaw te hi a hlutzia hria a, tangkaia taka hmang chunga humhalh kawngah uar leh zuala tan la turin EF&CC Minister chuan kalkhawm te a chah a ni.


India ram zalenna champhaphak vawi 75-na denchhena hmalakna peng pakhat Ayush Aapke Dwar hi kum kalta September thla atang khan neih tan a ni a. India ram pumah ram hectare 75000 tuamchhuakin ramhmul damdawi tiak nuai 75 semchhuah a ni a. Mizoramah pawh Health Minister Dr R Lalthangliana hovin kum kalta September thla khan a hawnna hun neih a ni. COVID hripui len lai a nih avangin in tinah sem a rem lo a, chuvangin State Medicinal Plant Board office atangin a duh apiangte tan sem chhuah a ni a. Thenzawl Ayush Hospital atangin sem chhuah a ni bawk. Medicinal plant chi hrang hrang 15 chu beneficiary 600 hnenah sem chhuah a ni a. Sappling sem chhuah zat hi 27,154 a ni a, vawiin thleng hian hectare 5 a zauah phun a ni.

Vawiin programme ah hian Anganwadi hrang hrang ten an Nutritional Garden-a an phun tur sapplings chu khuallian hian a sem a. Pu TJ Lalnuntluanga, Pi Lallianpuii, Dr Lalnuntluangi Hmar leh Dr S Mara Thansiami te chuan College of Veterinary Sciences & Animal Husbandry Administrative Block compound-ah ramhmul dam dawi tiak an phun a ni.

Kharna inkhawm hi Dr S.Mara Thansiami, Deputy Director, Directorate of Ayush chuan a kaihruai a. College of Veterinary Sciences & Animal Husbandry Dean Dr Lalnuntluangi Hmar leh Women and Child Development Director Pi Lallianpuii ten thu an sawi a. SMPB Consultant Dr Lalchhanhimi’n Ayush Aapke Dwar hnuaia hma an lak dan a report bawk a ni.


- DIPR
Post i hmuh dan

Post a Comment

0 Comments