Aizawl | August 12, 2022: Mizoram sawrkar chuan Lunglei Municipal Council (LMC) Chief Executive Officer (CEO) atan Benjamin Lalzama leh Secretary atan R Vanrengpuia a ruat a. Kuminah LMC inthlan hmasa ber buatsaih tum.
Mizoram sawrkar chuan vawiin khan hriattirna tichhuakin, LMC CEO hmasa ber turin Disaster Management & Rehabilitation department (DM&R) Director nilai, Benjamin Lalzama a ruat a, Secretary turin Aizawl Addl. DC nilai R Vanrengpuia a ruat bawk. An rual hian MCS officer pakua te transfer & posting a tichhuak tel.
Lunglei Additional DC ni lai Lalnunmawii chu Siaha Addl DC atana sawn niin, Siaha Addl. DC ni lai Donny Lalruatsanga chu Lunglei Addl. DC ni tura sawn a ni bawk.
State Election Commissioner Laima Chozah chuan, "Rokhawlhna a awm loh chuan kuminah LMC inthlan buatsaih a ni ang," a ti a. "Hmeichhe ward tur hi pawh a ni ang," a ti bawk.
LMC hmasa ber din tura inthlanna chu kumin chawhnu lama buatsaih tum a ni a, LMC inthlanna atan hian inbuatsaihna a kal chho mek zel a. Bial (ward) 11 awm tura tih a ni a, a bial ramrite pawh rin fel vek a ni tawh a, electoral roll buaipui mek a ni.
Ward 11 aṭanga Ward 4 chu hmeichhiate chauh chuh theih tur a nih dawn avangin khawi bialte nge hmeichhe bial tur tih thumvawr a la ni ang. LMC dinna tur hian sawrkar kum kal mek 2022-23 budget ah Rs. Nuai 80 dah a ni.
November 21, 2021-a chief minister Zoramthanga hoa Council of Minister thukhawm chuan LMC din an remti tawh a ni.
Post a Comment
He post chungchanga i ngaihdan lo sawi ve rawh: