July tir khan Tata Yodha 4x4 LPS Professional Fight buatsaih turin thutlukna siam a ni a; boxer-te ṭha taka an inpuahchah theih nan a hma thei ang bera puanzar ni se tih a ni.
Mahse, Mizorama amatuer boxing thuneitu Mizoram Boxing Association (MIZBA) rawn phawt a ṭha tiin puanzar mai a ni lo va; hotu pawimawhte biakrawn an ni a, ṭawngkaa indawrna aṭangin inhriatthiamna thui tak a awm a, lehkhaa indawr a ni lo thung.
Inrem theih a ni dawn em tia MIZBA hruaitute nena ṭawngkaa indawr a nih chhung hian hun eng emaw chen a kal a; amatuer leh professional inkar thil a nih avangin mumal taka inrem a remchang chiah lo deuh a, MIZBA lam demna tur a awm lo va, kar hnihin puanzar hun a tlai phah.
A hnu lawkah kumina Boxing Federation of India (BFI) thuchhuah behchhanin MIZBA pawmpui loh inelnaa tel boxer leh referee and judge reng reng an hnuaiah an tel thei tawh lo ang tiin Mizoram boxing huang chhungah MIZBA-in lehkha a tichhuak.
2009 aṭanga 2019 thleng MIZBA leh LPS-in Pro Fight vawi riat a buatsaih tawh a; thil kal dan aṭangin inkalh anga lang thei a awm a, LPS Pro Fight organising committee chuan boxer-te tan harsatna awm thei a nih avangin thawh dun leh theih ṭha a ti a, MIZBA a dawr leh.
Professional tidanglama technical lamah pawl pahnihin ṭha an tihtlan dan anga buatsaih theih a ni em tiin a ngen a. MIZBA President biak a ni a, Kolkata-a a zin avangin Senior Vice President kutah mawhphurhna a hlan a, ani hi lo dawr mai turin a hriattir a ni.
August 2 khan LPS Pro Fight organising committee-in lehkha a theh lut a, Senior Vice President hovin executive committee-in an ngaihtuah a, thawh dun ṭha tiin pawl pahnih indawrna tura MIZBA aiawh tur pawh an inrual fel a, an thutlukna hi ṭawngkaa inhrilh niin lehkha inpek a ni lo.
Mahse, President-in a hova ngaihtuah ṭhat ṭul a tih avangin Senior Vice President kuta mawhphurhna a hlan chu a la kir leh a; a zin haw hnuah ngaihtuah nawn lehin MIZBA-in hmachhawp an ngah deuh avangin thawh ho ni lo mai se tiin thutlukna an siam ṭha leh a, ṭawngkaa inhrilh niin lehkha inpek a ni lo.
Thawh ho a rem chiah loh pawhin boxer-ten harsatna an tawh loh nan, technical thilte MIZBA duh anga kalpuiin a hriatpuina ang talin tih dan a awm em ? tiin President lehchilha ngen leh a ni a, ani pawhin thil ṭha tak a nih thu a sawi.
Hemi tuk zan hian November-a buatsaih tur Mizoram Fight Night bak MIZBA-in tun dinhmunah pawm a nei lo va, inelna danga boxer leh referee leh judge-te chu an hnuaia inelnaah an tel thei tawh lo ang tiin President-in thuchhuah a siam zui ta a ni.
April-a BFI thuchhuah hriatthiam dan a inan loh avangin professional leh amatuer inkarah harsatna a thleng a ni ber a. LPS Pro Fight buatsaih tura thui tak kal tawh chu MIZBA nen thawh dun a rem loh avangin an thuneihna amatuer huangah eng mah kalpui chi a ni lo niin Pro Fight organising committee chuan a hria a, a tira ruahmanna angin MIZBA thuneihna pawn professional-a kal tlangpui turin thlutlukna a siam thar leh a ni.
Khawvel puma amatuer boxing thuneitu AIBA chuan amatuer boxing inelna pui bera ngaih Olympics-ah 2016 Rio atangin professional tel a phal a. Nikum Tokyo Olympics-ah phei chuan professional boxer 43 (mipa 36 leh hmeichhia 7) an tel. AIBA ngei hian professional boxing championship pawh a buatsaih tawh a, amatuer hlutna tisang turin professional nena kal kawp lam a awn zel niin a lang.
August 2019 khan India rama amatuer boxing thuneitu BFI pawhin professional boxer leh coach te amatuer-a tel phalsak an nih theih dan leh amatuer boxer-ten professional an khelh kawp rem a tih thu a chhuah a, an hriatpui leh pawmpui erawh a ngai thung.
Kumin April-a BFI thuchhuah hi professional-a telte amatuer-a an tel khapna ni lovin, India ramah BFI ni lo pawl dang amatuer inelna huaihawt ve ṭhin an awm a, chungte chu BFI-in a pawm loh thu tar lanna niin LPS Pro Fight organising committee chuan a hria a, MIZBA lamin professional-a telte khuahkhirhna angin thil a kalpui ve thung.
MIZBA President-in Mizoram Fight Night bak tun dinhmunah pawm an nei lo tih thuchhuah a siam hnuah, Pro Fight-a tel tumin boxer 140 velin form an theh lut a, August 26 khan tel tumte inbukin boxer 211 ziah luh an ni.
August 31 zanah khelh ṭan a ni dawn a, ni hnih chiah a awm tawh tihin boxer-te tihchiai tum anga ngaih theih turin MIZBA-in boxer, referee leh judge, official te hriattirna a tichhuak thar leh a, a hma ang thovin Mizoram Fight Night chiah an pawmpuia buatsaih tur a nih thu an tar lang leh. District Boxing Association-ten Pro Fight-a tel boxer-te hrem zui an nih tur thu thuchhuah an siam bawk.
Hetiang tak maia thil a kal hi LPS Pro Fight organising committee chuan pawi a ti hle a, a tira MIZBA nen an inbiakna leh a hnu zela an indawrna aṭang pawhin hetiang thil hi a thlen a beisei lo tak zet a, kal tlangpui tho erawh a ni dawn a ni.
Pro Fight-a telte hian thil dang ni lovin boxing bak khelh tur an nei lo va, boxing glove tho an bun dawn a, ring chhungah dan anga inhnek tur tho an ni bawk. Suangtuahna leh beisei, duhthusam nei chunga khel turte an ni a, boxing avanga phurna leh thathona nei vek an nih a rinawm.
(He website kal zel theih nan hian fakna lo langte hi i lo hmet ve thin dawn nia.)
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: