Aizawl | August 15, 2022: India-in zalenna a chan champha phak vawi 75-na läwm turin ram a inbuatsaih a, Mizorama zalenna ni kan lawmna boruak lian ber chu football a ni kan ti lo thei lo.
Mizo thalai 9,000 chuangin he zalenna ni hi an läwm a, an läwm dan erawh ball petin a ni an läwm ni.
Thingtlanga Zone Football Association aṭangin District Football Association-ah, chutah Mizoram Football Association thlengin Independence Day Football Tournament khelin kan phu suau suau a ni ber e.
Player 9,000 zetin hmasawn tumin football an pet a, team 400 chuang an inlan a, a boruak hi a te thei lo.
Mizoram Football Association chuan Aizawlah Mizoram Premier League club pariat tán Independence Day Football Tournament a buatsaih mêk a, hei hi MFA-in tun thlenga football inelna a kalpui meka upa ber niin, 1982 khan an lo khel ṭan tawh. MFA hnuaiah hian Veteran leh Women's Tournament khelh tel a ni bawk.
 |
| I Day puala tournament buatsaih dan |
District FA lamin an kalpui dan a inang lo a, khelmual leh hun neih dan azirin inkhel a tamin a tlem a, ṭhenkhat chuan naupang inelna thlengin an buatsaih.
Kolasib District lamah Under 14 an inkhel a, Aizawlah a veteran an inkhel bawk a, kum 60 ralkaite leh kum 13 lek lekin I Day Football hi an khelin an pet goal a ni.
Khelmual nuam leh thar ṭha hring dup mai nei an awm a, khelmual diak kawi leh ball han zawn deuh laih laih a ṭulnaa khelte pawh an awm a, an zavai hian thil pahnihin a phuar khawm - football leh zalenna ni lawmna a ni.
State dangah chuan an thiam danin he zalenna ni hi an lo läwm a ni thei a, keini pawhin kan thiam danin kan läwm a, chu chu football hmangin a ni.
District 11-ah he inelna hi kalpui vek a ni a, August 15 hian football final match 30 dâwn khelh a ni dâwn - a ropui lo thei lo!
Independence Day hi state dangin eng engin nge an läwm dâwn kan hre lo a, eng ang takin nge nuam an tiha an hlim dâwn pawh kan hre lo. Hei erawh kan hria - Mizoramah chuan zalen takin zalenna niah football kan pet dâwn.
- Issued by Information and Publicity Committee, Mizoram Football Association
Post a Comment
He post chungchanga i ngaihdan lo sawi ve rawh: