Ticker

10/recent/ticker-posts

Hnam lam leh pipu zaia inelna hmangin HIV/AIDS dona beihpui kalpui tum

Aizawl, 18th August, 2022: Mizoram State AIDS Control Society (MSACS) leh Central YMA te chuan Mizorama HIV/AIDS darh zel tur ven nan leh fimkhur inzirtirna turin “Zoram Harh Rawh” tih thupui hmangin hnam lam leh pipu zaia inelna hmangin HIV/AIDS dona beihpui kalpui an tum a. Hemi atana State Level Organising Committee chu vawiin khan Central YMA Committee Room, Tuikhuahtlang-ah an thu khawm a. Pu R.Lalngheta President, CYMA in meeting a kaihruai a ni.


Meeting ah hian Dr.Lalthlengliani, MSACS Project Director chuan HIV/AIDS a Mizoram dinhmun tlangpui sawiin India ramah Mizoram chu kum 15-49 inkar mihring za zelah HIV/AIDS vei tamna ber a nih avangin tun anga a darh zel chuan a hnam pum anga min tiral thei tur natna a nih avangin a dona kawngah tha thlah ngam a nih loh zia a sawi a. Pu R.Lalngheta President CYMA chuan HIV/AIDS chu tih takzeta do a pawimawh avangin CYMA pawhin a kalphung pangngai pelin ke a pen a ngai a, sawiselna tam tak karah pawh ram leh hnam tana tha turah chuan CYMA in theihtawp a chhuah zel dawn tih a sawi a. “Zoram Harh Rawh’ tih thupui hmanga beihpuui atan hian November 15-19 chhungin District 9 tuam chhuakin district khawpui zawng zawngah Branch YMA te hnam lam leh pipu zaia inelna, District level competition leh World AIDS Day, December 1 hian District levela pakhatna te tan State level Competition buatsaih turin vawiina meetingaah chuan ruahmanna siam a ni a. Heng competition ah te hian mithiamten HIV/AIDS laka fimkhur inzirtirna thalaite an neihpui thin dawn a ni.

- DIPR
Post i hmuh dan

Post a Comment

0 Comments