Aizawl | August 17, 2022: Tun thla ni 2 tlaia Sihmui lei bula chesual Pu Lalfakzuala Chenkual leh a fapa Malsawmkima, Tlawng luia bo ta te zinga a fapa Malsawmkima ruang chu tukin dar 9:30 khan Buichali lei hnuaiah hmuh a ni.
Thudawn danin Malsawmkima ruang hi August 2 a an chetsualna Lengpui lei atanga km 14 bawr vel Buichali lei hnuai Tlawng luiah hmuh a ni a. A hmutute hian YMA te be pawpin chawhma dar 10 khan Changsil kaiah ruang hi lakchhuah a ni a. Luikamah hian police in a ruang an endik hnuah Sairang PHC-ah post mortemh a ni a. Sairang Dinthar YMA ten ruang thlahna hun hmangin hun an hman zawh hian an chenna veng Chaltlang Lily Veng panpui a ni.
Hetihlai hian Malsawmkima pa Pu Lalfakzuala Chenkual ruang ni a rin chu Lengpui lui chhuahah hmutu an awm nia hriat a ni a. Hei hi a chhehvela YMA branch hrang hrang member te leh police te’n enzuiin ruang hmutu in a hmuhna hmuna a sawi leh a chhehvel bakah a ruang thlen thlakna chin tura an rin zawng zawng an dap hnuah hmuh a ni lova, mi tlawmngaite’n an zawng chhunzawm zel a ni.
Pu Lalfakzuala ruang hmuh tawh niawm a sawi a nih avangin an pafa a vui theih na’n zanin dar 7 a vui tura ruahmanna siam chu a pa zawk ruang hmuh chungchang a chian tak rih loh avangin a fapa Malsawmkima vui hun atan hian dar 6 leh ta a ni.
He thu buatsaih lai thleng hian Lalfakzuala ruang hi hmuh a la ni lo.
Post a Comment
He post chungchanga i ngaihdan lo sawi ve rawh: