Ticker

10/recent/ticker-posts

Zirlai hrem vangin zirtirtu pahnih Police kutah awm!; Tiamchin awm lovin sikul exam titawp!

Aizawl | July 20, 2022: Tun thla tir ni 5 khan Springdale Academy, Zotlang Champhai-a zirlai vuak vangin zirlai nu leh pate'n Police stationah FIR an thehlut a, chu thu bawhzui chuan Zirtirtu pahnih - Headmaster leh Assistant headmaster te Police in an la a, hemi vang hian vawiin aṭang khan zirlai exam lai tiamchin awm lova tihtawp a ni.

Sikul zirtirtu te'n Zirlai an hrem hi pasarih an ni a, FIR theh lut tu hi zirlai pakhat nu a ni.

Thuchhuah chuan, "Headmaster leh Asst. Headmaster te chu Police ten la in Jail-ah dah an ni" tiin a tarlang a, hemi avang hian, tiamchin awm lova exam tihtawp a nih thu a tarlang bawk.


Sikul zirtirtu lam aṭanga thuchhuahin a tarlan danin, "Ni 5.7. 2022 khan kan zirlai naupang sikula thil ken phal loh an ken avangin warning pek hnuah pawh naupang thenkhatin thu an la awih loh avangin an la keng lui zel a, man an ni a, naupang eng emaw zat chu vuak an ni a. Hei vang hian kan parents zing a mi thenkhat te an lungawi lo va, teacher ten ngaihdam kan dil hnuah pawh min ngaidam thei lova FIR an thehlut," a ti a.

Thuchhuahin a tarlan zel dan chuan, Nimin khan an Headmaster leh Asst. Headmaster (Sir Mazova) te chu Police ten la in Jail-ah dah an ni a. Anni hian an exam question te an check hmasak thin vek avangin an tello hi chuan Exam hi an chhunzawm thei dawn lo," tiin, vawiin aṭang khan exam tihtawp a nih tur thu a tarlang.


EXPLOREMIZORAM.COM in Springdale Academy zirtirtu hnen aṭanga thu dawn danin, Zirtirtu an man hi nimin khan a ni a. Vawiin khan bail in an chhuak.

"Thu kan lo inhmuh fuh loh vangin he thil hi thleng a ni a, pawi kan ti lutuk." tiin Springdale Academy zirtirtu chuan he thil thleng pawi an tih thu a sawi a.

Zirlaite hmakhaw ngaiin, exam chu tawpsan rei chi a nih loh thu sawiin, "Zirtawpni hian kan chhunzawm ang!" a ti bawk.


Thuchhuah chu:

TIAMCHIN AWM LOVIN EXAM CHAWLH A NI DAWN

Ni 5.7. 2022 khan kan zirlai naupang sikula thil ken phal loh an ken avangin warning pek hnuah pawh naupang thenkhatin thu an la awih loh avangin an la keng lui zel a, man an ni a, naupang eng emaw zat chu vuak an ni a. Hei vang hian kan parents zing a mi thenkhat te an lungawi lo va, teacher ten ngaihdam kan dil hnuah pawh min ngaidam thei lova FIR an thehlut a.

Vawiin khan kan Headmaster leh kan Asst. Headmaster (Sir Mazova) te chu Police ten rawn la in Jail-ah dah an ni a.
Anni hian kan exam question te an check hmasak thin vek avangin an tello hi chuan Exam hi kan chhunzawm thei dawn lova. Ni 20.7.2022 (Nilai) atang hian tiam chin awm lovin exam hi kan tihtawp rih mai a ngai dawn a, nu leh pate leh zirlai naupangte min hriatthiamna kan ngen tak meuh meuh a ni.
Kan boruak tawn dan a zirin chanchin chu kan la inhriattir leh dawn nia.

Sir Rama
Teacher Springdale Academy



He thil.thleng chungchanga The Mizos in a post hi ngaihtuahna tizau-ah kan dah e.
A pawi ber chu zirlai zawng zawng ina exam - tiamchin awm loa an chawl tur hi a ni. Champhai zotlang Springdale school hi school tha leh zirlai tha neih lama hmasawn ber pawl an ni a, admission chan a harsat thu te, an school discipline leh teaching skill pawh a that tawk thusawi a awm fo.

ZIRLAITE THIAM LOH NGE ZIRTIRTUTE??
he lehkha chhuah ina a tarlan danah hi chuan zirlai ten school dan leh displine an ngaih pawimawh loh zia kan hmu a, vawi tamtak school chhunga lakluh phalloh (cosmetic, sikkhar etc) la lutin warning pek an ni fo a, chu chu zawm duhlo in zirlai tamtak hrem leh vuak an ni. A dawt leha pawi tur chu-heng zirlai, anmahni luhna school dan pawisa lo a an nu leh paten an zirtirtute an FIR sak meka te hian school dangah seat, admission ti turin an tuitla tawh ang em?? Tih hi a ni.

Social media lama comments thenkhat ah chuan, heng zirlai nu leh pate hi mi thiltithei leh mihausa an nih thu kan hmu zut a, an ni ngei bawk ang. A chhan chu, mirethei kawmkar a khawsa nu leh pate hian hetianga rang a action laa FIR ngam tur hian huaisenna an nei dawn lo phawt.

Ka ngaihdan ah chuan, kan school Kal ve thin laia zirtirtute thu kan awih zia leh kan zahder fo na kha sawi ka duh. Sam met tura min tihin kan met nghal a, tin hlep tura min tihin kan hlep nghal a, homework tilo hrem tur an tihin kan tilo ngam ngailo. School kan tlai ngailo a, tuithak, chithak leh eng emaw bawl ken loh tur thu an sawiin kan keng zui ngam ngailo.

Heng zirlai naupang te hi Springdale school ah an luh nawn tawh kher ka ringlo a, a chhan chu, zirtirtute leh zirlai parents te in ngaidam tawn tura an inbiak hnu hian an in ngaidam thei tawhlo. School danga luh leh nan hian kum a laklawh a, heti taka zoram pum dengchhuak chanchin a school naupangte ho hian school dangah seat an hmu leh kher ang em? Lo hmu ta sela chu school dan leh displine chu an zawm thei kher ang em??
Post i hmuh dan

Post a Comment

1 Comments

  1. Springdale a lut tawh thin ka nia kum enge maw zat kal ta khan, tun thleng hian zirtirtu ten min lo vuak nasat zia kha a tul na ka hre lo. Thu an awi lo chuan naupang hrem dan dang tam tak a awm. Sam an meh duh lo chuan an nu leh pa te hrilh mai a an meh hma loh an rawn kal thei hrih lo ang, tih lam zawng ten. lo in vuak vak vak kha a mawl thlak lutuk a bik in patling pakhat in hmeichhe naupang lo vuak vak vak te chu thil mawl leh zahthlak a ni tawh tun ang lai a.

    ReplyDelete

He post chungchanga i ngaihdan lo sawi ve rawh: