SUM LEH PAIA RINAWMTE PATHIANIN LAWMMAN A PE

 Sum enkawl dan

— Rick Warren 

— July 5, 2022

“A pu chuan a hnenah, ‘Bawi ṭha leh rinawm, i tiṭha e; tlemte chungah i rinawm a, tam tak chungah ka awmtir ang che; i pu lawmnaah lut rawh,’ a ti a" Matthaia 25:21.

Pawisa hi rinawmna tehna a ni a. Thil dang zawng aiin Pathianin pawisa hmangin i rinna a fiah ṭhin. Engvang nge? Mi tam tak chu pawisa avanga an buai ṭhin vang a ni.

Pathianin sum enkawl thiammi lawmman a pek dan kha han ngaihtuah teh: “A pu chuan a hnenah, ‘Bawi ṭha leh rinawm, i tiṭha e; tlemte chungah i rinawm a, tam tak chungah ka awmtir ang che; i pu lawmnaah lut rawh,’ a ti a.” (Matthaia 25:21).

Zângnadawmna pek dan chu hei hi a ni: Sum enkawl dan i thiam chuan Pathianin lawmman a pe ang che. Matthaia 25 ah hian kawng thum a sawi — dahnghehna, kaisanna, leh lawmpuina.

Pathianin dahnghet chungin heti hian a ti a, “I ti ṭha e! I rintlak dawn em tih ka sum pek che aṭangin ka fiah che a,  fiahna i paltlang ta. Bawi ṭha leh rinawm, i ti ṭha e. 

A dawt lehah chuan kaisanna a ni. Tlemte chunga rinawmna i lantir avangin, Pathianin mawhphurhna sang zawk a pe ang che.

I mawhphurhna i hlenchhuah avangin, Pathianin a lawmpui che a, chuvang chuan Pathian lawmna i chang ve dawn a ni!

Isuan, “Tuman hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat ṭanin pakhat an hmusit ang. Pathian leh sum rawng in bawl kawp thei lo ve” a ti (Matthaia 6:24).

Pathian leh sum rawng in bawl kawp tur a ni lo a ti lo va. In bawl kawp thei lo a ti zawk a, thil tihkawp theih loh a ni. Tuman hotu pahnih rawng an bawl kawp thei lo. Chuvang chuan eng zawk hi nge i nuna pakhatna ni zawk dawn i thlan a ngai ta: Pathian nge sum?

Sum hi bawi hlauhawm leh hotu rapawm tak a ni. A thuhnuaiah i kun tawh chuan, rilru hah reng rengin i awm ang. Mangang tak leh chep takin i awm ang.

Amaherawhchu i sum chu i thuhnuaiah i dah a nih chuan - i rawng a bawlsak zawk ang che. I sum tan ni lova, i sum zawkin hna a thawhsak hunah che chuan, thlamuang takin i awm thei ang.

Ngaihtuah zui atan

Pathianin i sum audit ta che sela, eng grade nge a pek ang che, engvangin nge?

Engtik lai khan nge i sum thuhnuaiah i kun? Engtik lai khan nge i sum i thuhnuaiah i dah? Pathian nena in inkar chung hun laia a danglamna han sawi teh?

Sumin a thuhnuai lohna tur che leh sumin i tan hna a thawh zawk theihna turin engtin nge fing takin sum i enkawl ang le?

[Lettu: Sangpuia]