SUM ENKAWL DAN ṬHA CHU PATHIANA INNGHAHNA AṬANGIN A INṬAN

 Sum enkawl dan

— Rick Warren 

— 19 July, 2022



“Tin, ka Pathian chuan Krista Isuaa a ropuina ngahzia ang zelin, in tlakchhamna tinreng pawh a phuhruksak ang che u” Philippi 4:19

I sum leh pai tiamin kawng tinrenga Pathian malsawmna dawn i duh chuan, malsawm tlakin awm ang che. Pathianin mal a sawm che a nih chuan rintlakin awm bawk ang che. Ni engemawti chhung chu i sum enkawl dan chungchanga i hriatthiam ngai kawng sarih kan zirho dawn a ni.

A hmasa berah chuan eng hna pawh thawk la Pathian chu kan mamawh min petu a ni tih hria ang che. Amah hi a ni kan mamawh engkim min petu chu – chu chu i thawhpuite kaltlang pawhin a rawn ti thei a ni.

Mi tu emaw chu sum hnar lo kalnaah i ngai a nih chuan i mangan chang a awm ang, a chhan chu chumi hmang chuan sum hnar a lo kal loh chang a awm thei dawn si; i hna emaw pawisa emaw i thil neih emaw i chan thei a ni. 

Mahse Pathian nen chuan tlakchham reng reng i nei lo vang. Engkim hi ama ta a ni si a! Rom 11:36 chuan, “Amah aṭang leh, amah avang leh amah atan thil zawng zawng hi a lo awm a ni si a; a hnenah chuan chatuanin ropuina chu awm rawh se” tiin.

Tui chhuahna dawt pakhat pawh hi lo tawp ta se, Pathianin awlsam takin a dang a ti haw leh thei a ni. Hna pakhat i lo chan a nih pawhin, hna dang a pe thei che a ni. Pathianin kawng pakhat a khar a nih pawhin kawng dang a hawng leh thei a ni. Kawngka zawng zawng a inkhar a nih pawhin, tukverh a la hawng thei a ni.

Pathian i thlana, a rintlakzia i hriatthiam hnuah chuan, mihringah emaw sumah emaw i innghat tawh lo vang. 

Philippi 4:19  ah chuan, “Tin, ka Pathian chuan Krista Isuaa a ropuina ngahzia ang zelin, in tlakchhamna tinreng pawh a phuhruksak ang che u” a ti a ni. Pathianin kan mamawh chu kan neih theih dan tur pawh kan ai pawhin a hre zawk a. Kan mamawh apiang chu min pe turin a intiam bawk a  ni. 

Sum enkawl dan chu he zawhna aṭang hian a inṭana: Tun hnenah nge emaw khawiah nge i rinna i nghah?

Pathianah i rinna i nghat a nih chuan, zing tin i thawhin hei hi sawi ang che, “Lalpa, engkim hi i ta a ni a. Nangmah aṭanga lo chhuak vek a ni. Nangmah lo kan mamawh min petu tumah an awm lo – ka mamawh apiangte ka neih theih nan nang rin che ka duh a ni”

Pathian a i innghah chuan i lungngaihna pawh a kiang anga, Pathian i rin avanga i mamawh a pek tur che pawh hmuhtir che a malsawm che a duh a ni.

Ngaihtuah zui atan

* Engvangin nge Pathianin i sum enkawlah i rinawm a ni tih lantir tura a duh che?

* Engtin nge Pathianin sum leh pai chungchanga amaha rinna i nghah avangin mal a sawm che?

* Pathianin i mamawh a pek theihna tur chein a taka i zawm theih ngei turin engtin nge sum leh pai i enkawl ang?

*[Lettu: Sangpuia]*

No comments

He post chungchanga i ngaihdan lo sawi ve rawh:

Powered by Blogger.