SPORTS MINISTER HOVIN DISTRICT SPORTS COMMITTEE CHUNGCHANG ONLINE MEETING NEI

Aizawl, the 19th  July 2022: Nimin khan Sports & Youth Services changtu Minister Pu Robert Romawia Royte hovin District Sports Committee chungchang sawihona Online meeting, Google Meet hmanga neih a ni.

Meeting kaihruaitu Pu Robert Romawia Royte chuan District tinah District Sports & Youth Office siam tuma hmalak mek a nih thu te tarlang hmasain Mizoram Sorkar-in thalaite hmakhua ngai taka ke a penna hi a hlawhtlin chhoh zel beiseina nen hmathlir duhawm tak a awm thu a sawi a. Mizoram Sports Policy 2019 tha tak duan chhuah a nih dan te leh infiam mite hamṭhatna tura sawrkarin chak takin hma a lak mek dante a sawilang.


Meeting ah hian Centrally Sponsored Scheme hrang hrang, PMJVK te, Khelo India Scheme te leh a dangte hmanga Mizorama Sports infrastructure-in hma a sawn dan te leh District tam zawkin PMJVK scheme kaltlanga hmunhma ṭha an neih theih dan tur te sawi lan a ni a. Heng bakah hian infiam mite tana hamṭhatna, Incentive Cash Award leh The Mizoram Sports Award chungchang te pawh sawiho a ni.

He meeting-ah Pu John Tanpuia, Secretary, MSSC chuan hnen atangin District Sports Committee inrelbawl dan tur Power-point presentation ngaihthlak a ni a. District hrang hranga District Sports Committee kalpui a nih mek dan leh tuna regulation thar, The Mizoram Sports Council (Formation and Functioning of District Sports Committee) Regulation 2022 nen a danglamna te inhrilhfiah a ni a, zawhna leh chhanna hun hman a ni a. DC hrang hrangte atangin rawtna, zawhna leh chhannate neih a ni bawk.

The Mizoram Sports Council (Formation and Functioning of District Sports Committee) Regulation 2022 ang hian District zawng zawngah District Sports Committee Deputy Commissioner te Chairman-na hnuaiah kalpui a ni tawh dawn a. Tuna DSC lo din tawh leh awm mek te pawh thiah a, dan thar anga inruat/inthlan thar a tul dawn avangin Sawrkar lam pawhin hemi chungchangah hian thuchhuah mumal tak a siam tur thu te ngaihthlak a ni.

Meeting-ah hian Pu T.C. Pachhunga, Vice Chairman, Sports & Youth Services, ICT & Tourism Development Board te, Dr. Lalrozama, IAS, Secretary, Sports &, Youth Services te, Pu P.C. Rindika, Joint Secretary, SYS te, Pu Joseph H. Lalramsanga, Director SYS leh Mizoram State Sports Council atangin Pu John Tanpuia, Secretary te bakah Secretariat leh Directorate officer te an tel a.  District tin atangin Deputy Commissioner te leh an aiawhte kim taka tel bawkin District Sports & Youth Officers ṭhenkhat an tel bawk a ni.
 
 
- DIPR

No comments

He post chungchanga i ngaihdan lo sawi ve rawh:

Powered by Blogger.