Serchhip biala MNF Candidate atan J Sawma; Serchhip Damdawi in lian sak bul ṭanna tur Cheng Vaibelchhe 13 pek chhuah nghal a ni dawn - CM Zoramthanga

Aizawl | July 25, 2022: Vawiin July 25,2022 Thawhtanni hian Chief Minister Pu Zoramthanga chuan Serchhip a tlawh a.  Serchhip Damdawi In lian sakna tur hmun P&E ram, Bukpui a mi chu a tlawh nghal. Chief Minister Pu Zoramthanga chuan bul ṭanna tur atana Health Department-in sum an dil cheng vaibelchhe 13 chu  pek chhuah a nih tur thu sawiin, hei hi Damdawi in thar sakna tur panna kawng leh thawktute chenna sakna tur a ni.


Power Grid Corporation of India Limited chuan CSR aṭangin Damdawi In sakna tur hi cheng vaibelchhe 21 an rawn tum dawn a, hei hi February thla khan an rawn tichiang tawh a ni.

Hemi hnu hian Serchhip Auditorium-ah MNF Serchhip East Block huaihawt Public Meeting-ah hun a hmanpui nghal a. Chief Minister Pu Zoramthanga chuan "Pasalṭha Thangchhuah R.Thangzauva" chanchin KL Remruatfela ziak chu a tlangzarh nghal.

MNF President Pu Zoramthanga chuan  Serchhip Assembly Constituency-a MNF Party aṭanga ding turin Pu J. Malsawmzuala Vanchhawng MNF Gen.Hqrs.Adviser chu MNF Gen.Headquarters-in lungrual takin an pawm a, an thlang tih sawiin mipui hriatah a puang nghal a ni. 

Chief Minister chuan, Serchhip Damdawi In lian chu Bukpui P&E Department ramah sak mai nise tih hi Health Directorate leh Serchhip mipui tam takin in duh tih kan hria a. Chutih rualin cheng vaibelchhe 21 hian Main building chauh a daih awm sia tiin Serchhip mipuite in buai tih kan hre bawk, a ti.

"Serchhip khawpuiin an mamawh chuan tiin Health Minister hoin hma kan la nghal a, a bul ṭan nan SASCI  sum aṭangin Serchhip mipui kan rawn duhsak che u a ni. In duh ang ngeiin Damdawi in ṭha, ṭhang lian zel tur leh entawntlaka chhuah turin MNF sorkar chuan  cheng vaibelchhe 13 in bul kan rawn ṭan sak ta che u a ni e" a ti. 

Pu Zoramtanga chuan Serchhip mipui mamawhna hriain, Bazarpui zauhna tur leh Lirthei park-na turin a sira PWD SDO Quarters hmun zawl leh PWD kudam zawng zawng sawn pheina tur PWD EE Complex-ah a en nghal thu leh ruahmanna siam a nih thu a tarlang a. PWD Complex, New Serchhip-ah  SDO Quarters leh thawktu dang Quarters tur sak thar a ni dawn a. Estimate siam turin Department lamte pawh hrilh nghal a nih thu a sawi bawk.

MNF President chuan ZPM kal dan chu kum 2018 inthlan hmaa an insawi dan leh inthlan hnua an awm dan a inang lo tih sawiin, Kalphung thar daih rei lo ber an ni. Inthlan a zova, party dang angin kalphung an rawn nei leh ta tho a, unit an din a, kohhran pawh unit-ah an chhiar leh thei tawh si lo a ti a. An party hotu ṭhenkhatin 'Nakkum Nomination Committee hun hi kan thleng pha angem aw!' tiin hlauhthawnna an nei tawh a ni, a ti bawk.

Tun ang boruaka an kal zel chuan ZPM hian seat 10 an lâk phak a rin loh thu sawiin, an seat neih mek pawh an hum ange'm tih ngaihtuah tham a ni, a ti bawk.

Pathian leh mipui zarah nakkumah MNF hian seat 30 lak tlin ngei an tum thu sawiin, Pu Zorama chuan ama tan bial dang en a ṭul lo a, East I-ah nghet takin a awm mek tih a sawi bawk. 

Pu Zorama chuan Congress chu Delhi chakna eng hmang an ni a.  Khulamah a burpui a tlu a, helamah a phita a rawp ral zel mai a ni. An lenna ber ṭhin Hmarchhakah an phita a rawp ral zel a ni tih hretu te vek kan nih hi a ti. 

Pathian leh kan ram tan tia nghet taka vuantute hi Indona karah pawh manganna karah pawh kan tling lo chungin kan felnaah ruat a ni a. Tun hun hi MNF party chuan Diamond Jubilee lawm theiin kan thleng a ni a ti bawk. 

Pu J. Malsawmzuala Vanchhawng pawhin thu sawiin, MNF party hi tobul nghet tak nei a ni. Kan hnam Pasalṭhaten an din a ni a. Mizo hnam a awm chhung chuan MNF party hi a ding reng dawn. Nakum 2023-ah MNF party hian Tualṭo party zingah elpui tham a nei dawn lo. Mizoramah Tualṭo party pahnih lian a awm thei lo. Tin, National Party pawh Mizoramah a lian pahnih a awm rual thei lo a ti bawk.

J. Sawma chuan thudik tluantling lo hmanga mipui thluak suk tum an tam a. Chung mite chuan awih awm takin thusawi an thiam a. MNF sorkar chhung leh Covid in kum 2 min chenchilh chhunga MNF hmalakna hi a ṭha em em a ni tih ka sawi duh a. UNO-in Sustainable Development Goals a siamah hian Mizoramin kan tiṭha lawrlak a. Tehfung 17 zingah Mizoram sorkar hmalaknate hi a ṭha em em a ni. Mizoramin Point a hmuh belhkhawm 68 a ni a, India ram pumin point a hmuh zat hi 66 a ni. Heng zawng zawng hi MNF-ten an zirchianna a ni lova, tehna rintlak tak siamtute hian MNF sorkar hmalakna hi an hmu chiang hle a ni tih a tilang a. Hei vang hian MNF sorkar hi hmasawnna kawngah a che ṭha em em a ni tih a tichiang a ni, a ti bawk.

"Bial chhung mi ka nihna zawnah theih tawp chhuah ka inhuam a, in fuihna leh zilhna te, in thurawnte pawh ka dawng thei reng a ni," Pu J.Sawma chuan a ti bawk.

Vawiin public meeting hi Pu C. Vanlalsiamthara President, Serchhip MNF East Block chuan a kaihruai a. Rev. Rolungmuana Zadeng chuan hunserh a hmang bawk. Pu Zoramthanga hi Pu Vanlalzawma, MNF Vice President, Er. Lalrinawma, Dy. Speaker, Pu C. Lalramzauva, Adviser, MNF Gen. Hqrs. & Adviser to CM, Pu LT Kima Fanai, General Secretary, Pu H. Vanlalrawna, Gen. Secy. MNF Gen.Hqrs. leh hruaitu ṭhahnem takin an ṭawiawm a ni.








....

No comments

He post chungchanga i ngaihdan lo sawi ve rawh:

Powered by Blogger.