MZP-in pension rawih nawnna order hal dawn

Aizawl | July 29, 2022: MZP chuan pension rawih nawn an duh loh zia lantir nan hmalakna hmasa atan  August ni 1, 2022 (Thawhtanni) chhun dar 12:00 hian pension rawih nawnna order an hal dawn.

An hmalakna hian awmzia a nei lo a nih chuan a tul angin rel zui leh nghal an tum.

Pension rawih nawnna Order hi Vanapa Hall kawtah hal an tum nia thu dawn a ni.

MZP General Headquarters in Cooperation Department hnuaia pension rawih nawn tha a tih loh chungchangah Mizoram State Cooperative Service Association (MSCSA) hruaituten MZP hruaitute hnenah pension rawih nawn chungchang ngaihtuah nawn leh tura an ngenna angin vawiin tlai dar 3:00 khan MZP General Headquarters, OB & Advisers Meeting an nei.

Meeting chuan tunhnaia Mizoram sorkarin Cooperation Department hnuaia hnathawk Addl. Registrar Cooperative Societies pension tawh rawih nawn leh a tum chungchangah mimal induhsakna leh mi bik nihna awm lo a nih avangin pension rawih nawn chungchanga Executive Meeting hmasain a lo rel tawh angin dodal tlang ni se, tiin a rel.

Pension tawh rawih nawn tumna order hi cancel turin Mizoram sorkar an ngen nghal a, a hnuk kir lo a nih chuan, hmalakna hmasa atan  August ni 1, 2022 (Thawhtanni) chhun dar 12:00-ah pension rawih nawnna order hi hal ni se an ti a.  An hmalakna hian awmzia a nei lo a nih chuan a tul angin rel zui leh nghal an tum.

MZP chuan Ni 25 May, 2022 khan Chief Minister hnenah pension tawh ruai nawn lo tura ngenna ziakin an lo thlen tawh a. Hemi rual hian Cooperation Department changtu minister hnenah thlen nghal a ni a. July ni 25, 2022 (Thawhtanni) khan Cooperation Department changtu Minister hi MZP hruaituten a office-ah lengin pension tawh ruai nawn lo hram turin an ngen nawn leh tawh a n.