MINISTER LALRUATKIMA HOVIN 'KAWLPHETHA KUTPUI' HMANG

Aizawl | July 28, 2022:  Sawrkar laipui ruahmanna a India ram chhunga district zawng zawng (773) a hman tur ‘Ujjwal Bharat, Ujjwal Bhavishya, Power @ 2047’, Kawlhetha Kutpui lawmna vawiin khan The Golden Hall, Hrangbana College-ah hman a ni a, I&PR Minister Pu Lalruatkima chuan khuallian niin a hmanpui a, Aizawl district bawrhsap Dr Lalhriatzuali Ralte, IAS pawhin he hun hi a hmanpui.
 
 
 
Khuallian Lalruatkima chuan ‘Ujjwal Bharat, Ujjwal Bhavishya, Power @ 2047’ chu India ramin zalenna a hmuh kum 75-na lawmna kalzel a nih thu sawiin, a tum ber chu India ramin kum 100 hmel a hmuh hun 2047 ah chuan India ram mipui zawng zawngte tan kawlphetha chatlak lo leh khaihlak awm lova pek a ni, a ti a. Kawlphetha hnianghnar taka pek kawngah sawrkar laipuiin nasa takin tan a la tih sawiin, kum 2015 ah khan thingtlang lamin kawlphetha (current/power supply) an neih chhung kha ni khatah darkar 12 leh a chanve bawr vel a ni thin a, tunah chuan darkar 22 leh a chanve bawr vel a ni tawh a ni, a ti.

Zirlai kalkhawmte fuihna thu sawiin Lalruatkima chuan kan mi hmasate, mi ropui tak takte khan kawlphetha tel lovin, khawnvar leh mei engah lehkha zirin dinhmun zahawm tak leh ropui takah an inchher chhuak thei a , tunlaiah chuan in tinah kawlphetha lakluh a ni tawh a, thangtharte chuan an vanneihzia hre an hre lo palh ang tih a hlauh thu sawiin, a tha lam zawnga chhawr tangkai ngei turin a chah a, kawlp-hetha chu min ti thatchhetu nil ova, hlawhtlinna lamtluang min zawh tirtu leh hmasawnna lama kawng min sialsaktu atan hman tum ngei ngei turin a chah a ni.

India ram centenary (kum 100 tlinna) hmathlir ropui tak sawrkar laipuiin a neih chu tihlawhtling turin mi zawng zawngin mawhphurhna an nei tih sawiin, khuallian chuan kawlphetha renchem kawngah kan zavaia tan kan lak a ngai a, Mizoram chhunga sawrkar hriatpuia din khua zawng zawngah kawlphetha a lut tawh ni a a hriat thu leh heng khua zawng zawng, a kilkhawr ber thlenga kawlphetha renchem inzirtir chu a pawimawh hle thu a sawi bawk a ni.

Kawlphetha tel lo chuan hmasawnna a kal tak tak thei tawh lo tih sawiin Pu Ruatkima chuan kawlphetha kan mamawhna hi a sang em em tawh a, a la sang zel dawn tih pawh hi a lang reng a, chutiang dinhmuna ding kan ni tih hriain sawrkar laipui lam pawhin nasa takin hma a la a, keini pawhin kan lo thlawp zel pawh a tha a, heng kan kawlphetha te pawh hi renchem taka kan hman loh chuan a buai tur chu keimahni tho kan ni tih te pawh kan hriat thar a tha a ni, a ti.

Aizawl district bawrhsap Dr Lalhriatzuali Ralte pawhin kawlphetha renchem a pawimawhzia leh hemi atana tih tur leh tih loh turte a sawi a, Mizoram tan leh India ram tana kan tangkaina awlsam taka hlen chhuah theih chu kawlphetha renchem hi a ni tel tih sawiin, mahni theuhah thutiam a tan la turin mipuite a chah a ni.

Tarlan tawh angin Azadi Ka Amrit Mahotsav hi Government of India in, India ramin zalenna a hmuh kum 75-na lawmna leh hriatreng nan a buatsaih programme a ni a. Hei hi Prime Minister Narendra Modi-a hma thlir, Aatmanirbhar Bharat (i.e Intodelh India) hmanga India 2.0 tih puitlin nan a ni a. Azadi ka Amrit Mahotsav lawmna kal zel ah, Ministry of Power leh Ministry of New & Renewable Energy (MNRE) te tangkawp chuan State leh Central Government ten Power (Kawlphetha) lama an thawhhona a an thlenchin tarlanna leh lawmna atan, Ujwal Bharat Ujwal Bhavishya – Power@2047, hi buatsaih a ni.

India sawrkarin kum 8 kalta chhunga kawlphetha tihchangtlun kawnga hmasawnna leh hlawhtlinna a hmuh thenkhatte chu :
1.            Kum 2014 a 2,48,554 MW siamchhuah ni thin kha vawinah chuan 4,00,000 MW a ni tawh a ni. India ram mamawh (demand) 1,85,000 MW in khum a ni.
2.            Tunhma a thenawm ram hnen atanga puk thin khan thenawm ramte kan pe chhuak thei tawh a ni.
3.            Ladakh atanga Kanyakumari leh Kutch atanga Myanmar border thleng (1,63,000 ckm/circuit km) tramsmission line siam tawh a ni a, India ram pum hi frequency khat hnuaiah grid khatin a kal tawh a, chu chu khawvel a integrated grid lian ber a ni nghe nghe a ni.
4.            India ram kil khat atanga kil lehlam thleng kawlphetha 1,12,000 MW, he grid hmang hian a kal tir theih a ni.
5.            COP21 ( 21st Conference of the Parties) a India ramin a lo tiam tawh, Kum 2030 ah chuan India ramin kawlphetha a siamchhuah zawng zawng te atangin 40% chu Renewable Energy atangin a ni tawh ang tih chu November 2021 khan puitlin tawh a ni. Kum 9 laiin thutiam a hlen hma tihna a ni.
6.            Vawin ah chuan Kawlphetha siamchhuah zawng zawng atanga 1,63,000 MW chu Renewable Energy hmanga siamchhuah a ni tawh a ni.
7.           Cheng vaibelchhe 2,01,722 hmangin sub-station 2,921 thar bun a ni a, sub- station 3,926 thuam that a tih changtlun ni bawk a. Voltage hniam, Low- Tension lines 6,04,465 ckm leh Voltage sang High-Tension lines 2,68,838 KV bun thar a ni a, agriculture lam chawm tur 1,22,123 ckm Feeder segregation bun thar a ni bawk a ni.
9.            Central Government chuan Electricity (Rights of Consumers ) Rules, 2020 a siam thar a, tah chuan,
a)            A hun tak bill sem chhuah te,
b)            Meter chungchanga complaint dan mumal zawk te,
c)            DISCOMs (Distribution Company) te chuan consumer te tan complaint theih na call center 24x7 an nei tur a ni tih te,
d)            Kum 2018 chhungin thingtlang (18,374) ah current luh kim tir te,

e)            Solar pump scheme thar a siam bawk a, tah chuan Central Government in 30% subsidy a pe anga, State Government in 30% subsidy a pe anga, chu bakah 30% loan pek chhuah te a tel a ni.

Vawiin ‘Ujjwal Bharat, Ujjwal Bhavishya, Power @ 2047’ hmanna hun hi Er. R. Romawia, Chief Electrical Inspector, P&E Department chuan kaihruaiin, Er. M. Lalhmingthanga, Sr. Electrical Inspector-in  inlawmna thu a sawi a, sawrkar laipuiin a buatsaih India ramin kawlphetha tihchangtlun kawngah hma a sawn tawh zia tarlanna video clip pariat (8) – Universal Household Electrification, Village Electrification, Distribution System Strengthening, Capacity Addition, Renewable Energy, One Nation One Grid, Energy Conservation leh Consumer Rights te chu enho a ni bawk a ni.




 
 
 
- DIPR

No comments

He post chungchanga i ngaihdan lo sawi ve rawh:

Powered by Blogger.