Home Minister in Sainik Welfare & Resettlement Department buatsaih lehkhabhu 'Lest We Forget' tlangzarh

Aizawl | July 29, 2022: Home Minister Pu Lalchamliana'n vawiin khan Assembly Annexe ah Sainik Welfare & Resettlement Department hnuaia awm District Sainik Welfare  & Resettlement, Aizawl buatsaih Mizo sipaiten India Independence hma leh hnua ram tana an hnathawh leh inpekna chungchang, thlalak leh thuziah telna lehkhabu Coffee Table Book 'Lest We Forget' tih chu a tlangzarh a ni.

Home Minister Pu Lalchamliana chuan hetiang lehkhabu British hunlaia Indopui II-na atanga India a zalen hnua Indo hrang hranga Indian Army ah tang tawh Mizo sipaite chanchin tarlanna lehkhabu buatsaih chu a hlu tak zet tiin thangthar leh academic research buaipui te tan phei chuan a hlut leh zual ka ring a, sipaia Mizote thawhhlawk dan chhuina kawnga lehkhabu tangkai tak a nih ngei ka beisei, a ti. Sipai tang tawh te chu sipai atanga an ban hnu in ram tan an tangkai zel thu sawiin Mizo khawtlangah phei chuan an thawh hlawk hle a, Mizo society a tha zawnga siamtu an ni tih hi tuman an hai lovang, a ti a. Politics ah phei chuan Mizo sipai officer pension engemawzatin hmingchherin ram tan an thawhhlawk hle tiin  chung zingah chuan Brig. T Sailo te, Pu J Lalsangzuala te, Pu Hmingdailova leh Lt. Col. ZS Zuala leh midangte an tel thu a sawi.

Home Minister hian Indopui II-na a tel zinga la dam mi 11 zingah he programme hmang tura lo kal mi 5 – Hav. Lalbiakthanga, Padma Shri, Lance Naik Kawlhlira, Sepoy Rosanga, Sepoy Zaduha leh Hav. Kaphlira te; Rfl. C Kamlova Padma Shri leh ram tanna nunna hlan sipai nupui 3 te hnenah lehkhabu copy hi a hlan a ni.

Programme ah hian Surg. Lt. Cdr. Lalnuntluanga, Director, Sainik Welfare & Resettlement in lawmna thusawiin Rev. Darkhuma in Pathian hnena inhlanna hun a hmang a. Lehkhabu thlirna leh a chanchin sawizauna chu Capt(Prof) Lalkima'n neiin lehkhabhu ah hian Mizote’n Indopui I-na leh Indopui II-ah an tel dan te, India Independence hnua Indo hrang hrang awm a, ram tana an inpekna chanchin te tarlan a nih thu a sawi a. Mizote zinga huaisenna leh chawimawina dang dawngtu chanchin te pawh Prof. Lalkima'n a sawilang bawk a ni.

He lehkhabu tlangzarhna ah hian Indopui II-na Mizo sipai tel la dam mi 5 leh sipai bang thahnem tak an tel bakah Assam Rifles, Station Headquarters leh Field Ambulance lamah sipai hotute an tel a ni.

He lekhabu ah hian Mizo sipai leh officer a lo tang tawh chhuanawm tak tak te chanchin tawi a tel a. Indopui II-a V-Force a tel Mizo zawng zawng te hming a tel kim vek bawk a. Hei bakah Sipai chawimawina hrang hrang dawngte, Indo hrang hrang leh Operation hrang hranga a ram tana nunna pe sipai hming te pawh tarlan a ni.

Mizo zinga British hunlaia Army Commission Officer hmasa ber pahnih te chu Maj. R.K. Hranga leh Brig. T. Sailo te an ni. Indopui II-ah khan Mizote zinga huaisen lawmman Military Cross dawng mi 2 – Sgt. Saihnuna leh Sub. R Khawma an awm a ni.  Subhash Chandra Bose a din Indian National Army zawmtu a hunlaia British sipai Darthawma chu Mizo zinga Indian Freedom Fighter awmchhun niin zalenna sualtu te hnena chawimawina sang pek thin Tamra Patra dawngtu awmchhun a ni.
 
- DIPR

No comments

He post chungchanga i ngaihdan lo sawi ve rawh:

Powered by Blogger.