DM&R Minister Lalchamliana'n Aizawl Republic Venga lei tawlh/lei che a enfiah


 
Aizawl | July 27, 2022: DM&R Minister Pu Lalchamliana, Home Minister ni bawk chuan nimin chawhnu khan Lunglui tuikhur bul, Aizawl Republic venga lei che/lei tawlh chu a endik a. He lei tawlh/lei che hi tunhma lamah pawh a lo che zeuh tawh thin a sawi a ni a, tunhnaia ruah sur nasa avang khan tuna chhiatna hi a lo thleng nia hriat a ni a. Tunah hian helai hmun hi  a la him lo thei nia hriat a nih avangin chhungkaw tam tak chu an riak chhuak mek a ni.
 

Khawtlang hruaitute nenabinkawmna an neihnaah  DM&R Minister Pu Lalchamliana chuan Republic Venga leimin avanga chhiat tawk chhungkua tam tak an awm chu pawi a tih thu a sawi a. Vanduaina tawk te thinlung takin a tawrhpui tih a sawi a ni. Heng harsatna a lo thlen lai hian Mizo nih a nawm thu sawiin YMA te kan thlamuanpui a, kan chhuang a ni a ti.

Heng chhiatrupna a lo thlen thulh a DM&R atanga tanpuina awm thei te pawh ngaihven nghal a ni tih a sawi a. Tanpuina pek tur zat hi Central sawrkarin inkaihruaina a siam angin pek a ni ang a ti. In chhe tanpuina tur zat bituk a awm thu sawiin in thiah ngai thiahna senso pawh  bituk awm sa angin sawrkar atanga pek chhuah a ni leh dawn a ni a ti.

DM&R Minister hian Chairperson, Local Level Disaster Management Committee, Republic Veng hnenah tanpuina Rs 50,000/- leh relief camp a awm te  tana ni 3 chhung atan relief Rs 17760/- a hlan a. YMA hnenah thingpui lumna Rs 10,000/- a pe bawk a ni.

Dr Lalhriatzuali Ralte, Chairman, ADDMA chuan Aizawl DDMA atanga hmalak theih ang ang te chak taka bawhzui a ni dawn tih a sawi a. Fur ruahtui a lo awm tam hmaa kan lo him tlanna tur mipui hnena hriattirna leh ngenna chhuah tawh te pawh ngai pawimawh thar leh theuh turin ngenna a siam a. Chhung tin ten tui chhe paihna leh tuiluankawr te an vil that hle a ngai a ni a ti. Veng tinah Local Level Disaster Management Committee chu thuneihna sang tak nei leh dan bawhchhiate hrem theihna neiin din an nih thu sawiin. Henga mawhphurtute zawng zawngte pawh tan la thar leh turin a chah a ni.

Lei khi hi July 22 leh 23 a che nasa zual a. July 24 khan Zonal Officer, DM&R leh a team ten an lo enfiah tawh a. Heta an thil hmuh te hi Deputy Commissioner/ Chairman DDMA, Aizawl District hnenah an thlen tawh a ni.

Pi Lalhruaitluangi, Zonal Officer, DM&R report pek dan chuan helai lei che hi nikum October a khan an enfiah tawh a tih a sawi a. Kumin July 23 atang khan a rawn che nasa zual tih a sawi a. A theih ang angin chhiatna liantham pumpelh nan inthiar chhuah, ruahtui luhna lai silpouline a khuh leh thil tul dang te tih nghal mawlh mawlh a ni a ti. Tun dinhmunah ruah a la sur deuh reng rih  inthiah leh thenfai hna thawh pawh duh angin a la khawih ngam awm loh tih a sawi a. Enfiah nawn leh pawh a la tul in a rinawm a ti.

Helai lei che avanga an chenna in chhuahsan ngai a chhungkaw riakchhuak zat chu -  chhungkaw 36 niin heng chhungkaw member te hi 146 an ni. Heng zingah hian chhungkaw 17 chuan bungrua an thiar chhuak nghal a, chhungkaw 19 erawh bungraw la chhuak lovin an riak chhuak thung a ni.

Pu C.Lalsawivunga, MLA, Aizawl South - I, Pu Lalrinenga Sailo, Mayor of Aizawl, Pi K.Lalrinzuali, Secretary, DM&R,  Aizawl District  Bawrhsap Dr Lalhriatzuali Ralte, Pu C.Lalruaia, Superintendent of Police, Aizawl District, Pu Benjamin Lalzama, Director, DM&R, Pu Hrangthanga Zote, SE, PWD, Geology & Mineral Resources a mithiam te, concerned official te leh khawtlang hruaitute chu a hmunah an lo awm sa a. DM&R Minister ho hial hmalak dan tur leh thil tih ngai hmasate an sawiho a ni.
 







 
 
 
- DIPR

No comments

He post chungchanga i ngaihdan lo sawi ve rawh:

Powered by Blogger.